ខេត្តកំពង់ធំៈ ដើម្បីការពារសន្តិសុខ និងសុវត្តិភាពដល់ប្រជាពលរដ្ឋ ក្នុងខេត្តកំពង់ធំ ឲ្យទទួលបាននូវភាព កក់ក្តៅ កម្លាំងតំបន់ប្រតិបត្តិការសឹករងកំពង់ធំ បានសហការជាមួយសមត្ថកិច្ច និងអាជ្ញាធរ ដើម្បីទប់ស្កាត់ សភាពការសន្តិសុខ និងរក្សាស្ថេរភាព និងការរស់នៅប្រកបដោយសុខសាន្ត ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានចាត់ប្រជុំមេបញ្ជាការង នាយ នាយរង និងបណ្តាអង្គភាពចូលរួម ដើម្បីទទួលផែនការ ការពារក្នុងភូមិសាស្ត្រខេត្តកំពង់ធំ។
ពិធីប្រជុំទទួលផែនការ ការពារសុវត្តិភាពត្រូវបានធ្វើឡើង នៅសាលប្រជុំតំបន់ប្រត្តិបត្តិការសឹករងកំពង់ធំ នៅព្រឹកថ្ងៃទី ១៧ ខែ ធ្នូ ឆ្នាំ ២០១៥ ដើម្បីត្រួតពិនិត្យសភាពការណ៏សន្តិសុខ ក្នុងភូមិសាស្ត្រខេត្តកំពង់ធំ និងដាក់ចេញនូវផែនការសហការណ៏ បង្ការ និងបង្ក្រាបក្រុមចោរប្លន់ប្រដាប់អាវុធដែលអាចកើតមានឡើងក្នុងភូមិសាស្ត្រខេត្តកំពង់ធំ ដោយសារតែបញ្ហាចោរលួច ចោរប្លន់នៅក្នុងសប្តាហ៍នេះ មិនថាទីក្រុងភ្នំពេញ ឬនៅ តាមបណ្តាខេត្តក្រុងមួយចំនួន បានកើតមានឡើងគួរឲ្យមានការព្រួយបារម្ភណ៍ ។
ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់សឹករងកំពង់ធំ បានមានប្រសាសន៍ថា ដើម្បីទប់ស្កាត់និងការពារ នូវបញ្ហាចោរប្លន់ ដែលគិតថាអាចនិងកើតឡើងនោះ គឺគ្រប់បណ្តាកងឯកភាព ត្រូវចូលរួម ជាមួយសមត្ថកិច្ច អាជ្ញាធរ និងប្រជាពលរដ្ឋ ដើម្បីឲ្យគាត់បានផ្តល់ព័ត៌មាន ផ្សេងៗចំពោះមនុស្សប្លែកមុខ ចូលធ្វើសកម្មភាពនៅក្នុងមូលដ្ឋាន ត្រូវផ្សាភ្ជាប់ជាមួយប្រជាពលរដ្ឋ ដើម្បីងាយស្រួលក្នុងការទំនាក់ទំនង និងទទួលបាននូវព័ត៌មាន ។
ឯកឧត្តម សោម ស៊ុន បានផ្តាំផ្ញើរដល់គ្រប់កងឯកភាព ចំណុះឲ្យតំបន់សឹក ធ្វើការផ្សព្វផ្សាយដំណឹងដល់ ប្រជាពលរដ្ឋ ដើម្បីឲ្យគាត់យល់ពីស្ថានភាព និងសភាពការណ៍នានា និងណែនាំឲ្យគាត់ថែរក្សានូវទ្រព្យសម្បត្តិ និងរបស់មានតំលៃ ការពារឲ្យមានភាពគង់វង្ស កុំបង្ហាញ កុំសំញ៉ែង ព្រោះអាចក្លាយជាមុខសញ្ញារបស់ក្រុមគិតមិនល្អ ដែលតែងតែប៉ុនប៉ងធ្វើបាបដល់ ប្រជាពលរដ្ឋ ។
ដោយ ប៊ុន រដ្ឋា
