សៀមរាបៈ លោក ថេង សំណាង តំណាងអយ្យការសាលាដំបូងខេត្តសៀមរាប ដឹកនាំកម្លាំងប៉ូលិស ប៉េអ៊ឹម ដោយមានការចូលរួម មេភូមិ និងចៅសង្កាត់ ដើម្បីអនុវត្តដោយបង្ខំទៅលើដីការសម្រេចបង្គាប់លេខ ៦៥១/១៥ ឲ្យកូនបំណុល លោក លិញ ធារី និងអ្នកស្រី ឡាក់ ស៊ីតា ប្រគល់អចលនវត្ថុ ឲ្យទៅម្ចាស់បំណុលឈ្មោះ ជិង ឌិន ភេទប្រុស អាយុ ២៨ឆ្នាំ និងឈ្មោះ ឡុត ស៊ី ភេទស្រីអាយុ២៩ឆ្នាំ លេខ៣៨៥/២០១៥ ចុះថ្ងៃទី ១៨ធ្នូ ឆ្នាំ ២០១៥ នៅវេលាម៉ោង៩ព្រឹក ដែលមានទីតាំងស្ថិតនៅភូមិបន្ទាយចាស់ សង្កាត់ស្លក្រាម ក្រុងសៀមរាប ខេត្តសៀមរាប។
អ្នកស្រី ឡាក់ ស្រីតា ភេទស្រី អាយុ ៤៥ឆ្នាំ ដែលជាកូនបំណុលបានរាប់រាប់ទាំងទឹកភ្នែក និងហួសចិត្តដែល នឹកស្មានមិនដល់ ថាលោកស្រីជំពាក់លុយលោក លី គាវផេង ភេទប្រុស ត្រឹមតែ២២០០ដុល្លា និងលុយខ្មែរ ៤៩៧០០០រៀលតែប៉ុណ្ណោះក្នុងរយះពេល២ឆ្នាំ តែបានអោយការប្រាក់មករហូត ក្រោយមកទើបលោក លីគាវផេង បានប្តឹងរូបគាត់សង់លុយទាំងអស់ជាង៥ម៉ឺដុល្លារួមទាំងការប្រាក់ តែក្នុងនោះលោកស្រីបានសងលុយចំនួន២៤០០ដុល្លារួចមកហើយនៅក្នុងតុលាការខេត្តសៀមរាប ដែលមានមន្ត្រីតុលាការជាសាក្សី លោក ស្រីបានបន្តថាចំណែកលុយដែលនៅសល់ គាត់បានសុំពន្យាពេល២ខែ១៥ថ្ងៃរហូតដល់ពេលកំណត់គាត់បានយកលុយទៅសង តែត្រូវបានលោក លី គាវផេង មិនព្រមទទួលយកលុយរបស់គាត់ទេ ហើយគេបាន ប្រាប់គាត់ថា ផ្ទះរបស់លោកស្រីត្រូវបានគេលក់រួចបាត់ទៅហើយ តាមអំណាចរបស់តុលាការ ដោយគាត់ពុំបានដឹងអ្វីទាំងអស់ ក្រោយមកគាត់បានដាក់ពាក្យប្តឹងទៅសាលាឧទ្ទរណ៍ ដើម្បីឲ្យជួយរកយុត្តិធម៌ តែត្រូវបានសាលាឧទ្ទរណ៍ ប្រាប់ថាពាក្យបណ្តឹងរបស់អ្នកស្រី ពុំមានសុពលភាពត្រូវបានច្រានចោល ចំណែកតុលាការបានឲ្យលោកស្រី សម្របសម្រួលជាមួយអ្នកទិញវិញ តែត្រូវបានអ្នកទិញបង្គាប់ឲ្យសងលុយ និងសងជំងឺចិត្តក្នុងមួយថ្ងៃ៩០០០ដុល្លា។
ប្រជាពលរដ្ឋដែលបានឃើញហេតុការ សុទ្ធតែនាំគ្នាស្លុតចិត្តនិងទប់ទឹកភ្នែកមិនបាន ខណៈពេលដែលឃើញ ទិដ្ឋភាពអនុវត្តច្បាប់ដោយគ្មានមនោសញ្ជេតនាជាខ្មែរដូចគ្នាសោះ ដែលត្រូវបានសមត្ថកិច្ចចាប់បោក ចាប់ញាត់ចូលឡាន បង្ករឲ្យសម្រែកទ្រហោយំរវាងកូនតូច និងម្តាយដែលត្រូវបានគេជួយសង្គ្រោះដោយសារតែ ភាពតក់ស្លុតរួមផ្សំជាមួយនិងរោគបេះដូង សកម្មភាពអនុវត្តច្បាប់នេះត្រូវបានគេងឿងឆ្ងល់ពីការគ្មានទឹកចិត្ត សណ្តោសប្រណីពំណាក់អ្នកក្រីក្រ ខណៈពេលដែលគាត់រកព្រឹខ្វះល្ងាច តែទោះជាសមត្ថកិច្ចខំប្រឹងចាប់កូន បំណុល និងសាច់ញាតិដែលបានជួយរារាំងក្នុងការអនុវត្តច្បាប់នេះ ក៏ការអនុវត្តរបស់តុលាការពុំទទួលបាន ជោគជ័យទេ ដោយសារតែភាពប្រទុសសារ៉ាយ និងការមនោសញ្ជេតនារបស់សមត្ថកិច្ចមួយចំនួនអាណិតអាសូរបស់គ្រួសារនេះចុងក្រោយត្រូវបានដកកម្លាំងត្រឡប់ទៅវិញ ។ ចំនែកលោក ថេង សំណាង តំណាងអយ្យការសាលាដំបូង បានឲ្យដឹងថា លោកពុំបានកាន់រឿងនេះទេ តែលោកគ្រាន់តែចុះមកអនុវត្តតាមដីការទេ ហើយយោងតាមឯកសារពាក្យបណ្តឹង បានឲ្យដឹងថាលោកស្រីឡាក់ ស៊ីតា មិនមែនជំពាក់លុយគេត្រឹមតែ២២០០ដុល្លាតែមួយម្ចាស់នោះទេ គឺមានទាំងអស់មានចំនួន៦ នាក់ ទី១ លោក លី គាវផេង ទី២ អឿន សំអុល ទី៣ លោក ឡោ គឹមសាន ទី៤ តាន់ សុំឃីម ទី៥ ធានាគារអេស៊ីលីដា ហើយការសម្របសម្រួលជាច្រើនលើកច្រើនសារ ដើមឡើយដើមបណ្តឹងប្តឹងតែម្នាក់ឈ្មោះលី គាវផេង ទេ តែក្រោយពីប្តឹងហើយ អ្នកទាំង៤នាក់ទៀតក៏ចូលរួមប្តឹងដែរ ដើម្បីទាមទារចំនែក ហើយតុលាការ បានសម្រេចយកផ្ទះមួយខ្នងដែលមាន ថ្មក្រោម ឈើលើនេះដាក់លក់ដេញថ្លៃចំនួន៣ដង ដំបូង៩ម៉ឺនដុល្លា តែពុំមានអ្នកទិញ លុះចុងក្រោយធ្លាក់ថ្លៃសល់៥ម៉ឺ៧ពាន់ដុល្លា ហើយបានចូលជាស្ថាពររួចហើយ ដោយមាន ម្ចាស់អ្នកទិញបានចេញប្លង់រួចរាល់ ទើបថ្ងៃនេះចុះអនុវត្តដីការបង្ខំឲ្យចុះចេញ ដើម្បីឲ្យម្ចាស់ថ្មីគ្រប់គ្រងស្របច្បាប់វិញ។ ដោយ ប៊ុន រដ្ឋា
