សៀមរាប ៖ នៅព្រឹកថ្ងៃទី១៥ ខែឧសភា ឆ្នាំ២០១៤ ឯ.ឧ ឃឹម ប៊ុនសុង ប្រធានគណ:កម្មាធិកាគណ:បក្សប្រជាជនកម្ពុជាខេត្តសៀមរាប ព្រមទាំង ឯ.ឧ អស់លោក លោកស្រីជាអនុប្រធាន ជាសមាជិក សមាជិកាក្រុមការងារគណបក្សខេត្តចុះជួយក្រុងសៀមរាប បានអញ្ជើញជួបសំណេះសំណាលជាមួយក្រុមប្រឹក្សាទាំង១៣សង្កាត់ ក្នុងក្រុងសៀមរាប ក្នុងយុទ្ធនាការឃោសនាបោះឆ្នោត និងការណែនាំនូវនីតិវិធីបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី២ នៅស្នាក់ការគណបក្សខេត្តសៀមរាប ។
ក្នុងកិច្ចស្វាគមន៍របស់លោក ទេព ប៊ុនឆាយ ប្រធានគណ:បក្សប្រជាជនកម្ពុជាក្រុងសៀមរាបបានមានប្រសាសន៍ថា ពិធីសំណេះសំណាលនាពេលនេះ ធ្វើឡើងដើម្បីពញ្ញាក់ស្មារតី និងក្រើនរំលឹកដល់បេក្ខជនឈរឈ្មោះក្រុមប្រឹក្សា និងសមាជិក សមាជិកាក្រុមប្រឹក្សាទាំង១៣ សង្កាត់ ក្នុងមុខតំណែង និងជាអង្គបោះឆ្នោត បានជ្រួតជ្រាបច្បាស់ពីការបោះឆ្នោត និងការចូលរួមបោះឆ្នោតទាំងអស់គ្នារបស់សមាជិក សមាជិកាក្រុមប្រឹក្សា ដែលត្រូវចូលរួមបោះឆ្នោតដោយផ្ទាល់នោះផងដែរ ។
មានប្រសាសន៍សំណេះសំណាលនោះដែរ ឯ.ឧ ឃឹម ប៊ុនសុង បានមានប្រសាសន៍កកោតសរសើរចំពោះបេក្ខជនឈរឈ្មោះក្រុមប្រឹក្សា និងសមាជិក សមាជិកាក្រុមប្រឹក្សាក្នុងមុខតំណែង និងជាអង្គបោះឆ្នោត ដែលបានចូលរួមក្នុងកម្មវិធីសំណេះសំណាលនេះ ហើយឯ.ឧ ក៏បានជម្រុញឲ្យបេក្ខជនឈរឈ្មោះទាំងអស់ខិតខំ ប្រឹងប្រែង ស្វែងរកការគាំទ្រឲ្យបានច្រើន ជាពិសេស សមាជិក សមាជិកាក្រុមប្រឹក្សាទាំង១៣សង្កាត់ ក្នុងក្រុងសៀមរាបក្នុងមុខតំណែង និងជាអង្គបោះឆ្នោត ត្រូវពិនិត្យឲ្យច្បាស់នូវលេខរៀង ដែលបានកំណត់នៅលើសន្លឹកឆ្នោត ។
ឯ.ឧ ឃឹម ប៊ុនសុង ប្រធានគណ:កម្មាធិកាគណ:បក្សប្រជាជនកម្ពុជាខេត្តសៀមរាបបានមានប្រសាសន៍បន្តថា ការទទួលបានជោគជ័យក្នុងការបោះឆ្នោតនេះ គឺអាស្រ័យលើសមាជិក សមាជិកាក្រុមប្រឹក្សាទាំងអស់ ក្នុងមុខតំណែង និងជាអង្គបោះឆ្នោត តែប៉ុណ្ណោះ ។ យោងតាមខិតប័ណ្ណស្ដីពីការយល់អំពីការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី២ ឆ្នាំ២០១៤ នេះ បានឲ្យដឹងថា នឹងចាប់ផ្ដើមឡើងនៅថ្ងៃទី១៨ ខែឧសភា ឆ្នាំ២០១៤ ចាប់ពីម៉ោង៧ព្រឹក ដល់ម៉ោង៣រសៀល ។
សម្រាប់ការបោះឆ្នោតនេះ គឺសមាជិកក្រុមប្រឹក្សាសង្កាត់ទាំងអស់ក្នុងមុខតំណែង គឺជាអ្នកបោះឆ្នោត ត្រូវភ្ជាប់មកជាមួយឯកសារបញ្ជាក់អត្តសញ្ញាណសម្រាប់ប្រើប្រាស់នៅថ្ងៃបោះឆ្នោត ជាពិសេសបំផុតនោះ នៅថ្ងៃបោះឆ្នោតក៏មានអ្នកអង្កេតការណ៍មកពីគ្រប់គណបក្សឈរឈ្មោះបោះឆ្នោត ដើម្បីបង្ហាញ និងបញ្ជាក់ពីភាពយុត្តិធម៌នៃការបោះឆ្នោតផងដែរ ។ ដោយ លោក ខេង ខេមរា 
