អ្នកចាត់ការក្រុមខ្លា Hull City លោក ស្ទាវ ព្រូស (Steve Bruce) បានលើកឡើងថា គាត់មានចំណាប់អារម្មណ៍លើការទិញយកខ្សែការពារ រីយ៉ូ ហ្វឺឌីណាន់ (Rio Ferdinand) របស់ក្រុមបិសាចក្រហម Manchester United ។
ហ្វឺឌីណាន់ (Ferdinand) បាននិយាយកាលពីថ្ងៃច័ន្ទថា គាត់នឹងចាកចេញពីទឹកដី Old Trafford បន្ទាប់ពីរួមរស់ជាមួយក្លិបអស់រយៈពេល១២ឆ្នាំ ។ ស្របពេលជាមួយគ្នានោះ លោក ស្ទាវព្រូស Bruce បានបង្ហើបឲ្យដឹងថា គាត់នឹងព្យាយាមនាំយកកីឡាករសញ្ជាតិអង់គ្លេសរូបនេះមកកាន់ទឹកដី KC Stadium ឲ្យបាន ។
គ្រូបង្វឹកវ័យ៥៣ឆ្នាំរូបនេះនិយាយប្រាប់គេហទំព័រ Daily Mail ថា “Ferdinand ជាកីឡាករដ៏អស្ចារ្យម្នាក់ហើយគាត់ជាខ្សែការពារដ៏រឹងមាំជាពិសេសគាត់ពោរពេញទៅដោយបទពិសោធន៍ យើងចង់បានគាត់” ។
គួរបញ្ជាក់ថា Hull City អាចនឹងមានឱកាសលេងក្របខណ្ឌ Europa League នៅរដូវកាលក្រោយបើសិនជាពួកគេប្រកួតឈ្នះ Arsenal នៅវគ្គផ្តាច់ព្រ័ត្រពានរង្វាន់ FA Cup ៕
