សៀមរាប=កម្លាំងនគរបាលការិយាល័យ ព្រហ្មទណ្ឌកម្រិតស្រាល ដែលដឹកនាំដោយតំណាងអយ្យការបានចុះបង្ក្រាបទីតាំងលក់ឆ្នោតដ៍ធំមួយ និងនៅក្នុងក្រុមហ៊ុនខូតែល (Coo Tel ) ដោយឃាត់ខ្លួនជនសង្ស័យប្រុសស្រី ចំនួន១៥នាក់ និងដកហូតឧបករណ៏ពាក់ពន្ធ័មួយចំនួន រួច
បញ្ជូនទៅតុលាការ ដើម្បីចាត់ការតាមច្បាប់ ហេតុការណ៍ចុះបង្ក្រាបល្បែងស៊ីសងខុសច្បាប់នេះធ្វើឡើងនៅរសៀលថ្ងៃទី២៩ខែកុម្ភៈឆ្នាំ២០១៦ ស្ថិតនៅចំណុចទល់មុខមន្ទីរពេទ្យកុមារអង្គរ ក្នុងភូមិមណ្ឌល១ សង្កាត់ស្វាយដង្គុំ ក្រុង-ខេត្តសៀមរាប។
លោកវីរសេនីយ៍ឯក ភឹង ចិន្តារ៉េត នាយការិយាល័យនគរបាលព្រហ្មទណ្ឌកម្រិតស្រាលខេត្ត បានឱ្យដឹងថា ការចុះបង្ក្រាបទីតាំងលក់ឆ្នោតចំនួនពីរកន្លែងផ្សេងគ្នាក្នុងថ្ងៃទី២៩ខែកុម្ភៈឆ្នាំ២០១៦ ទីតាំងទី១ លក់ឆ្នោតខ្មែរនិងឆ្នោតយួន ស្ថិតនៅក្នុងទឹកដីសង្កាត់គោកចក និងឃាត់ខ្លួនជនសង្ស័យប្រុសស្រីចំនួន៤នាក់ ជាអ្នកដើរលក់ឆ្នោតនៅក្នុងខេត្តឱ្យក្រុមហ៊ុនឆ្នោតខ្មែរខាងលើព្រមទាំងដកហូតសម្ភារៈកត់ឆ្នោតមួយចំនួនធំ រួចបន្តមកធ្វើការបង្ក្រាបទីតាំង ទី២ នៅក្នុង
ក្រុមហ៊ុនខូតែល ដែលលេងល្បែងស៊ីសង(ឆ្នោត)តាមប្រព័ន្ធអ៊ិធឺណែត រួចឃាត់ខ្លួនជនសង្ស័យប្រុស ស្រី ចំនួន១១នាក់ ក្នុងនោះមាននាយករងក្រុមហ៊ុនម្នាក់ និងដកហូតសម្ភារៈប្រើប្រាស់ ដែលពាក់ពន្ធ័មួយចំនួនរួមមាន៖កុំព្យូរទ័រចំនួន១៥គ្រឿង ម៉ាស៊ីនព្រីនកន្ទុយលេខ១គ្រឿង ផ្ទាំងលទ្ធផលឆ្នោតចំនួន៩ផ្ទាំង អត្តសញ្ញាណប័ណ្ណបុគ្គលិកក្រុមហ៊ុនចំនួន១០និងក្រដាសសៀវភៅកន្ទុយលេខមួយចំនួន ហើយក្រុមហ៊ុនឆ្នោតខ្មែរខាងលើនេះ អាចលក់បានតែឆ្នោតឡូតូ ឬឆ្នោតកោសជាសន្លឹក ដែលមានលេខចំនួន៥ខ្ទង់ និងរង្វាន់លួងចិត្តចាប់ពីលេខ៤ខ្ទង់ចុះតែប៉ុណ្ណោះ ផ្ទុយទៅវិញក្រុមហ៊ុននេះ បានលួចលាក់លក់ឆ្នោតលេខ២ខ្ទង់ គឺឆ្នោតយួន ឆ្នោតសៀមជាដើម ដែលខុសពីសេចក្តីសម្រេចរបស់សាលាខេត្ត គឺលក់តែឆ្នោត៥ខ្ទង់ឬឡូតូ ទើបជាការស្របច្បាប់។ 
ជនសង្ស័យប្រុសស្រីទាំង១៥នាក់ រួមទាំងវត្ថុតាង ត្រូវបានកម្លាំងជំនាញបានកសាងសំណុំរឿងបញ្ជូនទៅតុលាការខេត្តនៅរសៀលថ្ងៃទី១ខែមិនាឆ្នាំ២០១៦ ដើម្បីចាត់ការតាមច្បាប់ ជុំវិញករណីខាងលើនេះ លោកស្រី សុខ រម្យនា ប្រធានផ្នែកលក់ឆ្នោតខ្មែរឡូតូ៥ខ្ទង់ ទូទាំងប្រទេស បានបកស្រាយថា ក្រុមហ៊ុនឆ្នោតរបស់លោកស្រីមានអាញ្ញាបណ្ណ័ត្រឹមត្រូវ និងគោរពតាមសេចក្តីសម្រេចរបស់សាលាខេត្តសៀមរាប ចំណែក កូនកញ្ច្រែង) ប្រមាណជាង៦០នាក់ដែលកំពុងលក់ឱ្យរាល់ថ្ងៃ គឺក្រុមហ៊ុនបានកូពីអាញ្ញាបណ្ណ័ឱ្យពួកគាត់លក់ឆ្នោតខ្មែរ៥ខ្ទង់ ប៉ុន្តែអ្វីដែលសមត្ថកិច្ចឃាត់ខ្លួនពួកគាត់នោះ គឺមកពីពួកគាត់លោភលន់ចង់បានលុយហួសហេតុ ធ្វើឱ្យមេឆ្នោតនិងបុគ្គលិកមួយចំនួនឃុបឃិតគ្នា ធ្វើការក្រៅនិតិវិធីច្បាប់របស់ក្រុមហ៊ុន ៕ប៊ុន រិទ្ធី
