រាជធានីភ្នំពេញ៖ យោងតាមលទ្ធផលបឋមនៃការបោះឆ្នោតជ្រើសរើសក្រុមប្រឹក្សាខណ្ឌ នៅរាជធានីភ្នំពេញ របស់គណៈកម្មាធិការជាតិរៀបចំ ការបោះឆ្នោត(គជប) ចុះថ្ងៃទី១៨ ខែឧសភា ឆ្នាំ២០១៤ នៅរាជធានីភ្នំពេញ មានគណបក្សពីរចូលរួមការបោះឆ្នោត ដោយក្នុងនោះមានតែ
គណបក្សប្រជាជនកម្ពុជា និងគណបក្សសង្គ្រោះជាតិ។
តាមប្រភពនេះបានបង្ហាញថា ៖សំឡេងឆ្នោតរបស់គណបក្សប្រជាជនកម្ពុជាតាមខណ្ឌ (ខណ្ឌចំការមនទទួលបាន៧៥សំឡេង ខណ្ឌដូនពេញ៦២ ខណ្ឌ៧មករា៤៦ ខណ្ឌទួលគោក៦៣ ខណ្ឌដង្កោ៦២ ខណ្ឌមានជ័យ២៨ ខណ្ឌឬស្សីកែវ៣៥ ខណ្ឌសែនសុខ២៧ ខណ្ឌពោធិ៍សែនជ័យ៥៨ ខណ្ឌច្បារអំពៅ៥៥ ខណ្ឌជ្រោយចង្វារ២៩ និងខណ្ឌព្រែកព្នៅចំនួន៣១សំឡេង)។
ដោយឡែកសំឡេងឆ្នោតរបស់គណបក្សសង្គ្រោះជាតិតាមខណ្ឌ (ខណ្ឌចំការមនទទួលបាន៣៣សំឡេង ខណ្ឌដូនពេញ២៦ ខណ្ឌ៧មករា២៤ ខណ្ឌទួលគោក៣៧ ខណ្ឌដង្កោ១១ ខណ្ឌមានជ័យ១៦ ខណ្ឌឬស្សីកែវ២២ ខណ្ឌសែនសុខ១១ ខណ្ឌពោធិ៍សែនជ័យ១៤ ខណ្ឌច្បារអំពៅ២៤ ខណ្ឌជ្រោយចង្វារ១២ និងខណ្ឌព្រែកព្នៅចំនួន៦សំឡេង)។
សម្រាប់ទូទាំងប្រទេស លទ្ធផលបឋមនៃការបោះឆ្នោត ជ្រើសរើសក្រុមប្រឹក្សាក្រុង ស្រុករបស់គជប បង្ហាញថា គណបក្សប្រជាជនកម្ពុជាទទួលបានសំឡេងឆ្នោតគាំទ្រ ៨៣៧៩ និងគណបក្សសង្គ្រោះជាតិ ទទួលបាន២៩៥៩។
ការបោះឆ្នោតក្រុមប្រឹក្សា អាណត្តិទី២នេះ ត្រូវបានប្រព្រឹត្តទៅនៅព្រឹកថ្ងៃអាទិត្យបានបញ្ចប់ទៅនៅម៉ោងប្រមាណ ១១:៣០នាទីព្រឹក លើកលែងតែមណ្ឌលចំនួន៣ទេ ដែលបិទបញ្ចប់ការបោះឆ្នោតនៅម៉ោង ៣រសៀល ក្នុងនោះមានមណ្ឌលមួយនៅខេត្តត្បូងឃុំ និងពីរមណ្ឌលទៀតនៅរាជធានីភ្នំពេញ ហើយស្ថានការបោះឆ្នោតបានប្រព្រឹត្តទៅដោយរលូន ពុំមានបញ្ហាអ្វីគួរឲ្យកត់សម្គាល់នោះទេ បើទោះជា គជប បានទទួលពាក្យបណ្តឹងមួយក៏ដោយ។
លោកទេព នីថា ឲ្យដឹងថា សមាជិកក្រុមប្រឹក្សាឃុំសង្កាត់ ដែលជាអង្គបោះឆ្នោតមកពីគណបក្សប្រជាជនកម្ពុជា ចំនួន ៨២៩២នាក់ ត្រូវចូលរួមបោះឆ្នោត ខណៈដែលអង្គបោះឆ្នោតមកពីគណបក្សសម រង្ស៊ី មានចំនួន ២១៥៥នាក់ និងគណបក្សសិទ្ធិមនុស្សចំនួន ៨០០នាក់ បានចូលរួមបោះឆ្នោត៕
