ខេត្តសៀមរាប៖ នាព្រឹកថ្ងៃទី ២០ ឧសភា ឆ្នាំ២០១៤នេះ នៅបរិវេណវត្តទេពពោធិវង្ស អតីតវត្តអដ្ឋិស្មសាន្ត ហៅវត្តថ្មី ស្ថិតនៅភូមិត្រពាំងសេះ សង្កាត់គោកចក ក្រុង ខេត្តសៀមរាប មានប្រារព្វធ្វើទិវារំលឹក វិញ្ញាណក្ខ័ន្ត ជូនដល់បងប្អូន ប្រជាពលរដ្ឋស្លូតត្រង់ កម្មាភិបាល យុទ្ធជន យុទ្ធនារី អ្នកស្នេហាជាតិ ដែលបានបាត់បង់ជីវិត ដោយភាពអយុត្តិធម៌ ក្នុងរបបប្រល័យពូជសាសន៍ ប៉ុល ពត ។
ពិធីនេះរៀបចំឡើងដោយគណបក្សប្រជាជនកម្ពុជាខេត្តសៀមរាប ក្រោម អធិបតីភាពឯកឧត្តមឃឹម ប៊ុនសុង ប្រធានគណៈកម្មាធិការនៃគណបក្សប្រជាជនកម្ពុជាខេត្ត និងជាអភិបាល នៃគណៈ អភិបាលខេត្តសៀមរាប ព្រមទាំងមានការនិមន្ត និង អញ្ជើញចូលរួមពីព្រះសង្ឃឯកឧត្តម លោកឧកញ៉ា លោកជំទាវ និង ថ្នាក់ដឹកនាំមន្ទីរ ស្ថាប័ន អង្គភាព មន្ត្រីរាជការជុំវិញខេត្ត កងកម្លាំងប្រដាប់អាវុធ ក្រុមប្រឹក្សាសង្កាត់ ប្រជាពលរដ្ឋ និង ពុទ្ធបរិស័ទជាច្រើនចូលរួម ។
ទិវា ២០ឧសភា គឺជាថ្ងៃដែលប្រជាជនកម្ពុជាទូទាំងប្រទេស បានកំណត់យកជាថ្ងៃរំលឹកដល់វិញ្ញាណក្ខ័ន្ធ បងប្អូនប្រជាជនខ្មែរ កម្មាភិបាល យុទ្ធជន យុទ្ធនារី ដែលបានបាត់បង់ជីវិត ដោយភាពអយុត្តិធម៌បំផុត ក្នុងរបបប្រល័យ ពូជសាសន៍ ប៉ុល ពត ដែលជាថ្ងៃធ្វើឲ្យប្រជាជនកម្ពុជាយើង មិនអាចបំភ្លេចបាន នូវប្រវត្តិជូរចត់ រស់នៅក្នុងសមុទ្រ ឈាមនឹងទឹកភ្នែក ហើយត្រូវបានចារិកទុកនៅក្នុងក្រអៅបេះដូងរបស់ប្រជាជនកម្ពុជាយើងគ្រប់ៗរូប ។
ក្នុងពិធីនោះ ឯ.ឧ ឃឹម ប៊ុនសុង ក៏បានអាននូវវិយោគកថា ដោយបានគូសបញ្ជាក់ថា ថ្វីត្បិតពេលវេលានៃ អតីតកាលបានកន្លងផុតជាង៣ទសវត្សក៏ពិតមែន តែភាពឈឺចាប់ខ្លោចផ្សារបស់ប្រជាជនកម្ពុជា នៅតែដិតដាមជាប់ក្នុងក្រអៅបេះដូងរបស់ប្រជាជនយើងគ្រប់រូប នូវមហាវិនាសកម្ម របស់ប្រជាជនជាង៣លាននាក់ ដែលបានបាត់ បង់ជីវិតយ៉ាងភាពអយុត្តិធម៌ និង អណោចអធមក្រៃលែង ។
ឯកឧត្តមបានបន្តទៀតថា ដោយទ្រាំនូវភាពវេទនាលំបាក នៃនរកអវចីនេះ ក៏មានកម្លាំងអ្នកស្នេហាជាតិបរិសុទ្ធ ដែលប្រសូទ្រចេញពីគណបក្សប្រជាជនកម្ពុជា បានបង្កើតនូវ រណសិរ្សសាមគ្គីសង្គ្រោះជាតិកម្ពុជា ធ្វើការប្រយុទ្ធប្រឆាំងនិងពួកបនប្រល័យពូជសាសន៍ ប៉ុល ពត រហូតទទួលបាន ជ័យជំនះនាថ្ងៃ ៧មករា ១៩៧៩ បាននាំមកនូវសិទ្ធិសេរីភាពជូនប្រជាជន និង បន្តខិតខំស្តារ កសាងប្រទេស ពីគំនរ ផេះផូផង់ ឲ្យប្រែក្លាយមានការអភិវឌ្ឃន៍រីកចម្រើន ព្រមទាំងការពារសុខសន្តិភាព ស្ថេរភាពនយោបាយ និង លើក កម្ពស់ជីវភាពរស់នៅរបស់ប្រជាជន រហូតដល់ពេលបច្ចុប្បន្ន ។
ឯ.ឧ ឃឹម ប៊ុនសុង ក៏លើកឡើងផងដែរ រាល់ការ អភិវឌ្ឍន៍ ការកសាង នូវ សមិទ្ធិផលជូនជាតិមាតុភូមិ របស់គណបក្សប្រជាជនកម្ពុជា ក្រោមការដឹកនាំរបស់សម្តេច ទាំងបី ជាពិសេសកិច្ចដឹកនាំប្រកបដោយគតិបណ្ឌិតដ៏ខ្ពង់ខ្ពស់របស់ សម្តេចតេជោ ហ៊ុន សែន នាយករដ្ឋមន្ត្រី ឲ្យមាន ការអភិវឌ្ឍន៍រីកចម្រើននៅតាមបណ្តាមូលដ្ឋាន ទាំងវិស័យពុទ្ធចក្រ និង អាណាចក្រ ។ ក្នុងនោះដែរឯកឧត្តមក៏លើក ឡើង ពីការកាត់ទោសមេដឹកនាំធំៗ របស់ខ្មែរក្រហម ដែលបានកំពុងដំណើរការនៅសាលាក្តីខ្មែរក្រហម ។
ម្យ៉ាងទៀតក៏បានឧទ្ទិសដល់ថ្ងៃទិវារំលឹកវិញ្ញាណក្ខ័ន្តនេះ ឲ្យប្រែក្លាយទៅជាកិច្ចអភិវឌ្ឍន៍សេដ្ឋកិច្ចជាតិ សំដៅទៅរកការកាត់ បន្ថយនូវភាពក្រីក្ររបស់ប្រជាជន ។ បន្តមកគណៈអធិបតី សមាជិកនៃអង្គពិធីទាំងមូល បានធ្វើការបូជា ទៀន ធូក ដាក់នូវកម្រងផ្កា គោរពវិញ្ញណក្ខ័ន្ត ដល់ប្រជាជនកម្ពុជា អ្នកស្នេហាជាតិ ដែលបានបាត់បង់ជីវិតយ៉ាងអយុត្តិធម៌ ក្នុង របបប្រល័យពូជសាសន៍ ព្រមទាំងបាននិមន្តព្រះសង្ឃ៦៤អង្គ ប្រារព្វធ្វើពិធីសូត្រមន្ត បង្សុកូល និង រាប់បាត្រ ដើម្បី ឧទិ្ទសមហាកុសលផលបុណ្យជូនដល់ប្រជាជន យុទ្ធជន យុទ្ធនារី កម្មាភិបាលអ្នកស្នេហាជាតិ និង បុព្វការីជនដែលបានចែកឋានទៅដោយអំពើឃោឃៅ ព្រៃផ្សៃ និង អយុត្តិធម៌ នៃរបបកម្ពុជាប្រជាធិបតេយ្យប្រល័យពូជសាសន៍ឲ្យ បានទៅកាន់ក្នុងសុគតិភពជានិច្ចនិរន្តតរៀងទៅ ៕
