កំពង់ធំៈ សម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា បានយកចិត្តទុលដាក់ មកលើអតីតយុទ្ធជនគ្រប់រូប ដែលបានចាត់ទុកជាវរៈជនដ៏អង់អាចក្លាហាន ហ៊ានពលីជីវិតដោយសារប្រទេសជាតិ ថែមទាំងបូជាកំលាំងចិត្ត កំលាំង សាច់ស្រស់ឈាមស្រស់ ដើម្បីបុព្វហេតុប្រទេសជាតិ ទើបបានផ្តល់ផ្ទះមួយខ្នងជូន តាមរយះសមាគមអតីតយុទ្ធជនខេត្តកំពង់ធំ ។
ឯកឧត្តម ឧត្តមសេនីយ៍ត្រី សោម ស៊ុន ប្រធានសមាគមអតីតយុទ្ធជនខេត្ត និងជាមេបញ្ជាការតំបន់ប្រតិបត្តិការសឹករងកំពង់ ធំ បានដឹកនាំសហការី ព្រមទាំងអាជ្ញាធរ ប្រគល់ផ្ទះមួយខ្នង ដែលជាខ្នងផ្ទះលើកទី៣១ជូនអតីតយុទ្ធជនឈ្មោះ អ៊ុក រុន នៅល្ងាចថ្ងៃទី២១ខែមិនាឆ្នាំ២០១៧ ដែលមានទំហំផ្ទះ ៥.៥០គុណ៧ម និងត្រូវបានចំណាយថវិកានៃការសាងសង់អស់ទឹកប្រាក់៦.៩៥០.០០០រៀល ស្ថិតនៅភូមិសំណាក ឃុំកកោះ ស្រុកសន្ទុក ខេត្តកំពង់ធំ។
ឯកឧត្តម ឧត្តមសេនីយ៍ត្រី សោម ស៊ុន បានបញ្ជាក់ផងដែរថា ដោយសមាគមអតីតយុទ្ធជនខេត្តកំពង់ធំ ព្រមទាំងប្រធានសមាគមអតីតយុទ្ធជន ស្រុកក្រុង បានបន្តសកម្មភាពយ៉ាងមមាញឹក ក្នុងការស្រាវជ្រាវរកអតីតយុទ្ធជនបន្តទៀត នៅក្នុងភូមិ សាស្រ្តខេត្តកំពង់ធំ ដោយមិនបណ្តោយឲ្យអតីតយុទ្ធជនរូបណា រងទុក្ខវេទនាដោយពុំបានមើលថែរនោះទេ ក្នុងនោះអតីត យុទ្ធជនគ្រប់រូបដែលគ្មានផ្ទះសំបែង និងមានជីវភាពទីទ័លក្រ សុទ្ធតែត្រូវបានផ្តល់នូវផ្ទះមួយខ្នងជូនសម្រាប់ការរស់នៅឲ្យមានជីវភាពសមរម្យនឹងគេ។
ឧត្តមសេនីយ័ត្រី សោម ស៊ុន បានបន្តថា ជាក់ស្តែងថ្ងៃនេះបានប្រគល់ផ្ទះជូន លោក អ៊ុក រុន ព្រមទាំងភរិយា ដែលមានកូន ៥នាក់ ហើយការប្រគល់ផ្ទះនេះ ដោយមានការចូលរួមពី ព្រះតេជព្រះគុណព្រះនាម ជុំ ម៉ាប់ ព្រះគ្រូចៅអធិការវត្តក្រចាប់ ក្រុងស្ទឹងសែន ខេត្តកំពង់ធំ បាននិមន្តចូលរួមក្នុងប្រស់ព្រហ្មឡើងផ្ទះថ្មី ដើម្បីសុំសេរីមង្គល់ ឲ្យបានសេចក្តីសុខរកស៊ីមានបាន ត្រជាក់ត្រជុំក្នុងផ្ទះថ្មីនេះ ក្នុងពិធីនេះផងដែរ ក្រុមការងារបានផ្ដល់ជូនគាត់នូវ អង្ករចំនួន២៥គីឡូក្រាម មីយើងមួយកេស និងថវិកាចំនួន១០0.០0០៛ ។
លោក អ៊ុក រុន អតីតយុទ្ធជន បានថ្លែងអំណរគុណសម្ដេចតេជោហ៊ុន សែន និងឯកឧត្ដមនាយឧត្តមសេនិយ គន់ គីម អគ្គលេខាធិការសមាគមអតីតយុទ្ធជនព្រមទាំង ឯកឧត្តម សោម ស៊ុន ប្រធានសមាគមអតីតយុទ្ធជនខេត្តកំពង់ធំ បានសាងសង់ផ្ទះជូនខ្ញុំបាទ ដោយខ្ញុំបាទមិនអាចបំភ្លេចនូវគុណបំណាច់ដ៍ធំធេងនេះបានឡើយ ហើយនឹងស្ម័គ្រស្មោះចំពោះសម្តេចតេជោ ហ៊ុន សែន ជារៀងរហូត ។
ដោយ ប៊ុន រដ្ឋា
