កំពង់ចាម: ឯកឧត្ដម គួច ចំរើន អភិបាលនៃគណៈអភិបាលខេត្តកំពង់ចាម អមដំណើរដោយមន្ត្រីជំនាញពាក់ព័ន្ធ បានអញ្ជើញជាគណៈអធិបតី ក្នុងការដេញថ្លៃគម្រោង មូលនិធិឃុំ-សង្កាត់ សម្រាប់ធ្វើការសាងសង់ផ្លូវ ក្រាលគ្រួសក្រហម ផ្លូវបេតុង ស្តាប្រឡាយ និងគម្រោងអភិវឌ្ឍន៍ផ្សេងៗ ចំនួន១០ឃុំ របស់ស្រុកបាធាយ នាព្រឹកថ្ងៃទី២៤ និង១១គម្រោងរបស់ ស្រុកជើងព្រៃ ខេត្តកំពង់ចាម នារសៀលថ្ងៃទី២៤ ខែសីហា ឆ្នាំ២០១៨។ 
នេះជាលើកទី១ហើយ ដែលឯកឧត្តម អភិបាលខេត្ត បានអញ្ជើញចុះពិនិត្យដោយផ្ទាល់ក្នុងការអនុវត្តន៍និតិវិធី នៃការដេញថ្លៃគម្រោងមូលនិធិឃុំ-សង្កាត់ របស់គណៈកម្មការជាតិសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ យ៉ាងមានរបៀបរៀបរយ ខណៈដែលប្រពលរដ្ឋទន្ទឹងរង់ចាំ ការអភិវឌ្ឍន៍ ក្នុងមូលដ្ឋាន។
នាឱកាសនោះដែរ ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម បានស្នើរសុំឲ្យតំណាងក្រុមហ៊ុនទទួលការទាំងអស់ ដែលមានវត្តមានចូលរួមក្នុងការដេញផ្លៃនេះ គឺសូមឲ្យមានការដេញថ្លៃដោយសេរី និងយុត្តិធម៌ ជៀសវាងការឃុបឃិតគ្នា ក្នុងរូបភាពណាមួយជាដាច់ខាត ព្រោះនេះជាកញ្ចប់ថវិកា សម្រាប់ធ្វើការអភិវឌ្ឍក្នុងមូលដ្ឋាន ដូច្នេះការដេញថ្លៃត្រូវឲ្យមានតម្លាភាព និងការសាងសង់ផ្លូវ ធ្វើឲ្យត្រូវតាមស្តង់ដារ លក្ខណៈបច្ចេកទេសផងដែរ។
ឯកឧត្តម អភិបាលខេត្ត បានសង្កត់ធ្ងន់ថា ការដេញថ្លៃគម្រោងមូលនិធិឃុំ-សង្កាត់ ត្រូវតែធ្វើឡើង ជាសាធារណៈ នៅចំពោះមុខអ្នកចូលរួមដេញថ្លៃទាំងអស់ ដើម្បីតម្លាភាព និងជៀសវាងជាដាច់ខាតនូវភាពអនាធិបតេយ្យ ក្នុងអំឡុងពេលដំណើរការនីតិវិធីដេញថ្លៃ ជាពិសេសត្រូវលុបបំបាត់ឲ្យខានតែបាន ចំពោះជនឆ្លៀតឱកាសចាំយកលុយទឹកតែ។ ដោយឡែកអ្នកទទួលការ ដែលឈ្នះក្នុង
ការដេញថ្លៃត្រូវគោរពឲ្យបានត្រឹមត្រូវ ទៅតាមលក្ខខណ្ឌ បច្ចេកទេស និងរយៈពេលកំណត់ នៃកិច្ចសន្យា។
ដោយសារការដេញថ្លៃគម្រោងមូលនិធិឃុំ រួមមានស្រុកបាធាយ ចំនួន១០គម្រោង និងនៅស្រុកជើងព្រៃ ចំនួន ១១គម្រោង មានទំហំទឹកប្រាក់ប្រមាណ ១,៣៤០លានរៀល បានដំណើរការទៅដោយរលូន និងតម្លៃមានការធ្លាក់ចុះលើសពី៥០%ទៀតនោះ គឺកញ្ចប់ថវិការបស់យើងនៅសល់ច្រើន ដូច្នេះយើងអាចតគម្រោងធ្វើផ្លូវ ឬប្រឡាយ បានជាច្រើនម៉ែត្រទៀត។ 
បន្ទាប់ពីការដេញថ្លៃគម្រោងមូលនិធិឃុំទាំង២ស្រុក ស្មើនឹង២១គម្រោង បានដំណើរការដោយរលូន និងមានរបៀបរៀបរយល្អ ដោយតម្លៃធ្លាក់ចុះជាច្រើនទៀតនោះ ដូច្នេះប្រធានគណៈកម្មាការម្ចាស់លទ្ធកម្ម ឃុំ បានធ្វើការប្រកាសទទួលយកដោយរីករាយ ព្រមទាំងបានធ្វើការផ្តាំផ្ញើរថា ក្រុមហ៊ុនអ្នកទទួលការទាំងអស់ ត្រូវអនុវត្តន៍ការងារសាងសង់ ឲ្យមានគុណភាពល្អ និងត្រូវតាមស្តង់ដារ លក្ខណៈបច្ចេកទេស ប្រយោជន៍ដល់ការប្រើប្រាស់ របស់ប្រជាពលរដ្ឋ ដែលកំពុងតែទន្ទឹងរង់ចាំ ផងដែរ។
សូមបញ្ជាក់ផងដែរថា ដោយសារកន្លងមកការដាក់ដេញថ្លៃគម្រោងនៅតាមឃុំ-សង្កាត់ម្តងៗ តែងតែមានភាពរញ៉េរញ៉ៃ និងមិនប្រក្រតីទៀតនោះ ដូច្នេះការដាក់ដេញថ្លៃគម្រោងខាងលើនេះ ត្រូវបានប្រមូលផ្ដុំធ្វើឡើងនៅសាលាស្រុក ហើយឯកឧត្តម អភិបាលខេត្ត បានអញ្ជើញចុះពិនិត្យការដេញថ្លៃជាសាធារណៈនេះ ដោយផ្ទាល់ ដើម្បីឲ្យដំណើរការនៃការដេញថ្លៃ បានប្រព្រឹត្តទៅដោយរលូន និងមានភាពសុក្រិតយុត្តិធម៌ផងដែរ ៕
