ព្រះសីហនុ ៖ ពិធីតាំងពិព័រណ៍ផលិតផលខ្មែរភូមិមួយផលិតផលមួយត្រូវបានបើកដំណើរការជាផ្លូវការហើយនៅល្ងាចថ្ងៃអង្គារទី២៥ខែកញ្ញាឆ្នាំ២០១៨ដូចការគ្រោងទុក នៅទីតាំងឆ្នេរឯករាជ្យ ក្រុងព្រះសីហនុ ខេត្តព្រះសីហនុដោយមានស្តង់ប្រមាណ២០០បានចូលរួម។
ពិធីនេះដែរបានប្រព្រឹត្តទៅក្រោមវត្តមានគណៈអធិបតី លោក ប៉ោ ទ្រី អនុប្រធានគណៈកម្មាធិការជាតិជម្រុញចលនាភូមិ១ផលិតផលមួយ និងជាតំណាង ឯកឧត្តម យឹម ឆៃលី ,លោក ជំទាវ គួច ចន្ថា សមាជឹកក្រុមប្រឹក្សាខេត្តព្រះសីហនុ តំណាងលោក ជាម ហ៊ីម ប្រធាមក្រុមប្រឹក្សាខេត្តព្រះសីហនុ និងលោក ផៃ ប៊ុនវណ្ណៈ អភិបាលរងខេត្តព្រះសីហនុ និងជាតំណាងលោក យន្ត មីន អភិបាលនៃគណៈអភិបាលខេត្តព្រះសីហនុ។
ពិធីនេះតាំងពិព័រណ៍ភូមិមួយផលិតផលមួយនេះធ្វើឡើងចាប់ពីថ្ងៃទី២៥ ដល់ថ្ងៃទី៣០ខែកញ្ញាឆ្នាំ២០១៨ ដោយមានកិច្ចសហការគាំទ្រពីក្រុមហ៊ុន ឯកជនមួយចំនួនផងដែរ។តាម គណៈកម្មការរៀបចំការដាក់តាំងពិព័រណ៍នេះ កាអោយដឹងថា៖មានស្តង់ចំនួន២០០ស្តង់បានចូលរួមដាក់តាំងលក់ទំនិញរបស់ខ្លួនក្នុងនោះ៥០ស្តង់ដាក់តាំងផលិតផលខ្មែរសុទ្ធ ១០ស្តង់ជាររបស់សាលាខេត្តព្រះសីហនុ ក្រៅពីនោះជាង១០០ ស្តង់ទៀតមានការដាក់តាំងទំនិញចំរុះ។
ទំនិញដែលបានយកមកដាក់តាំងលក់នាឱកាសនេះដែរមានដូចជា៖ ម្រេច ក្រម៉ាខ្មែរ អាវខ្មែរ បន្លែ ណែម គ្រាប់ស្វាយបន្ទីរ ផលិតផលធ្វើពីដើមត្នោត ស្រាទំពាំងបាយជូ ផលិតផលស្នែង ដូង សាប៊ូ ប្រេងកូឡា ជាដើម …។ល។
លោក ផៃ ប៊ុនវណ្ណៈ មានប្រសាសន៍ថា ការតាំងពិព័រណ៍ផលិតផល ភូមិ១ផលិតផលមួយ នាពេលនេះមានបំណងសំខាន់លើកកំពស់ផលិតផលរបស់ពលរដ្ឋខ្មែរយើងក្នុងស្រុក និងជម្រុញ កសិករ សិប្បករ ចំពោះផលិតភាពក្នុងស្រុកអោយកាន់តែប្រសើរថែមទៀត៕
