ខ្សែការពារក្លិបកាំភ្លើងធំ Arsenal កីឡាករ Per Mertesacker មានទំនុកចិត្តថា Arsenal មានលទ្ធភាពអាចយកឈ្នះលើ Bayern Munich បានក្នុងការប្រកួត Champions League ។ ការលើកឡើងបែបនេះគឺស្របពេលកាំភ្លើងធំ Arsenal ត្រូវប្រកួតជាមួយម្ចាស់ជើង Champions League មួយនេះនៅវគ្គ ១៦ ក្រុមចុងក្រោយដែលជើងទី ១ ត្រូវធ្វើឡើងនៅទឹកដី Emirates Stadium នៅយប់ថ្ងៃពុធ ។
កូនក្រុមរបស់លោក Arsene Wenger ត្រូវបាន Bayern Munich ទម្លាក់ម្តងរួចមកហើយកាលពីរដូវកាលមុនប៉ុន្តែទោះបីជាយ៉ាងណាក៏ដោយ Mertesacker បានអះអាងថា នៅពេលនេះពួកគេគឺខ្លាំងក្លាជាងមុន ។
Mertesacker ប្រាប់គេហទំព័រ The Mirror ថា “យើងត្រូវប្រកួតជាមួយពួកគេទាំងក្នុងនិងក្រៅទឹកដី ឥឡូវយើងអាចមានលទ្ធភាពឈ្នះគេបានព្រោះក្រុមរបស់យើងខ្លាំងជាងមុន” ។ គួរបញ្ជាក់ថា ទោះបីជាយ៉ាងណាក៏ដោយ Arsenal នឹងត្រូវប្រឹងប្រែងឲ្យបានខ្លាំងបំផុតដោយសារតែបច្ចុប្បន្ន Bayern Munich កំពុងឡើងជើងដោយ ១៣ ប្រកួតចុងក្រោយនេះពួកគេមិនដែលស្គាល់ពាក្យថាចាញ់ឡើយ ៕
