កាលពីថ្ងៃអាទិត្យ ទី ២៩ ខែ មិថុនា ឆ្នាំ២០១៤ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទីស្តីការគណៈរដ្ឋមន្ត្រី និង ជាប្រធានអាជ្ញាធរអប្សា និង ឯកឧត្តមឧបនាយករដ្ឋមន្ត្រី ទៀ បាញ់ រដ្ឋមន្ត្រី ក្រសួងការពារជាតិ និងជាប្រធានក្រុមការងារថ្នាក់ជាតិចុះជួយ
ខេត្តសៀមរាប បានដឹកនាំកិច្ចប្រជុំ ដើម្បីធ្វើការកំណត់ទីតាំង និងទំហំដីសម្រាប់ការសាងសង់អគាររដ្ឋបាលរបស់មន្ទីរជំនាញចំនួន២៦មន្ទីរ ដោយមានការអញ្ជើញចូលរួមពីឯកឧត្តម លោកជំទាវ ជាគណៈអភិបាលខេត្ត ក្រុមប្រឹក្សាខេត្ត អស់លោក លោកស្រីជាក្រុមការងារបច្ចេកទេស ថ្នាក់ដឹកនាំមន្ទីរពាក់ព័ន្ធ ជុំ វិញខេត្ត ចូលរួមផងដែរ ។
ឆ្លងតាមស្វាគមន៍ និង សេចក្តីរាយការណ៍របស់ឯ.ឧ ឃឹម ប៊ុនសុង អភិបាលនៃគណៈអភិបាលខេត្ត បាន លើកឡើងនូវរាល់សំណើររបស់ខេត្ត ដែលបានស្នើសុំដីទំហំ២៤០ពាន់៩៣៧ម៉ែត្រក្រឡា ដែលគ្រប់គ្រងដោយអាជ្ញាធរអប្សរា ស្ថិតនៅដីបុរីទេសចរណ៍ និង វប្បធម៌ សម្រាប់សាងសង់អគារ មន្ទីរ អង្គភាព ចំនួន២៦ ព្រមទាំងមានការសាងសង់ការិយាល័យតំណាងរាស្ត្រ ,ស្ថានីយ៍ឧតុនិយម ,ស្ថានីយ៍ទូរទស្សន៍ខេត្ត និង សម្រាប់ការផ្លាស់ប្តូរផ្សាររាត្រីតំបន់អង្គរឃ្យុងយូរ និង ទីលានសាធារណៈ សម្រាប់ធ្វើមិទ្ទិញ បុណ្យជាតិ អន្តរជាតិ និង ព្រឹត្តិការណ៍ វប្បធម៌ទេសចរណ៍ក្នុងខេត្ត
ក្នុងនោះកិច្ចប្រជុំទាំងមូលក៏បានធ្វើការត្រួតពិនិត្យទៅលើគំនូសនៃប្លង់សាងសង់អគារ ដែលរៀបចំឡើង ដោយមន្ទីររៀបចំដែនដីនគរូបនីយកម្ម សំណង់ និង សុរិយោដីខេត្ត និង គម្រោងប្លង់របស់អាជ្ញាធរអប្សរា ដើម្បីធ្វើ ការពិភាក្សា និង ពិចារណាជ្រើសរើសគម្រោងប្លង់សមស្របមួយ ដើម្បីដាក់ជូនទៅរាជរដ្ឋាភិបាលធ្វើការសម្រេច ។
ក្រោយពីធ្វើការពិនិត្យយ៉ាងល្អិតល្អន់ លើតម្រូវការជាក់ស្តែង ដើម្បីធ្វើការសាងសង់អគារមន្ទីរឲ្យបានធំទូលាយ និង មានសោភណ្ឌភាព ដោយមានសួនច្បារ ចំណតរថយន្តផងនោះ អង្គប្រជុំទាំងមូលបានឯកភាពគ្នា កំណត់យកទីតាំងដែលខេត្តបានស្នើសុំ នូវទំហំដី ៦ហិកតា ហើយចំពោះទីលានសាធារណៈ គឺតម្រូវការជាក់ស្តែង ដើម្បីឲ្យសាលាខេត្តសៀមរាប ប្រើប្រាស់ផលប្រយោជន៍សាធារណៈ ដូចជាវេទិកាសាធារណៈ ការប្រជុំមហាជន និង ពិធីផ្សេងៗជាដើម ។
ចំពោះប្លង់ស្ថាបត្យកម្ម និង សំណង់ អង្គប្រជុំទាំងមូលក៏បានឯកភាពគ្នា កំណត់យកប្លង់អគារភ្លោះ ដែលសាលាខេត្តសៀមរាបបានរៀបចំ ហើយក្រុមការងារបច្ចេកទេសរបស់អាជ្ញាធរអប្សរា និង សាលាខេត្ត ត្រូវធ្វើការរួមគ្នា ដើម្បីសិក្សាឲ្យបានច្បាស់លាស់នូវប្លង់បច្ចេកទេសលម្អិត ព្រមទាំងរៀបចំសៀវភៅបន្ទុក ហើយអាជ្ញាធរអប្សរា ទទួលបន្ទុកលើការសាងសង់សំណងអគារទាំងនេះផងដែរ ៕
