ភ្នំពេញៈ សេចក្តីប្រកាសព័ត៌មាន របស់ក្រសួងធនធានទឹក និងឧតុនិយម នៅថ្ងៃទី២០ ខែកក្កដា ដែលបានចុះហត្ថលេខាដោយឯឧ លឹម គានហោ បានឲ្យដឹងថា នៅរយៈ ពេល ៣-៤ ថ្ងៃខាងមុខទៀតនេះ ទឹកទន្លេមេគង្គនៅខេត្តស្ទឹងត្រែង ក្រចេះ និងខេត្តកំពង់ចាម នឹងហក់ឡើងខ្លាំង ពោលអាច នឹងហក់
ឡើងជិតដល់កម្រិតប្រកាសឲ្យមានការប្រុងប្រយ័ត្ន។
ក្រសួងធនធានទឹក ក៏បានប្រកាសឲ្យដឹងទៀតថា ទឹកទន្លេមេគង្គក្រោម ទន្លេសាប និង ទន្លេបាសាក់ ទឹកក៏នឹងបន្តហក់ ឡើងជាបន្តបន្ទាប់ផងដែរ។ ការបន្តហក់ឡើង នៃកំពស់ទឹកទន្លេ នឹងធ្វើឲ្យទឹកហូរចូលព្រែក និងលិចតំបន់ទំនាបតាមដង ទន្លេមួយចំនួន នាំឲ្យប៉ះពាល់ដល់ជីវភាពរស់នៅប្រចាំ និង ដំណាំកសិកម្ម។
ក្រសួងបានបញ្ជាក់ទៀតថា ទឹកជំនន់នេះ កើតឡើងដោយសារតែមានទឹកភ្លៀងធ្លាក់ខ្លាំងនៅអាងទន្លេមេគង្គក្នុង ប្រទេស កម្ពុជា ឡាវ និង ថៃ ក្រោមឥទ្ធិពលព្យុះទី៩ ឈ្មោះថា រ៉ាម៉ាសាន់។
សេចក្តីប្រកាស ដែលបានចុះហត្ថលេខាដោយ ឯឧ លឹម គានហោ រដ្ឋមន្រ្តីក្រសួធនធានទឹក និងឧតុនិយម ដដែលនេះ ក៏បានអំពាវនាវដល់អាជ្ញាធរ ដែនដី និងប្រជាពលរដ្ឋ ដែលរស់នៅតាមដងទន្លេមេគង្គ ទន្លេសាប និង ទន្លេបាសាក់ មានវិធានការ និងបង្កើនការយកចិត្តទុកដាក់ ប្រុងប្រយ័ត្នខ្ពស់ ចំពោះស្ថានភាពទឹកជំនន់ខាងលើ ដើម្បីចៀសវាងនូវ គ្រោះថ្នាក់ផ្សេងៗ ដែលអាចកើតមានឡើង ជាយថាហេតុ៕
