ភ្នំពេញៈ លោក គឹម វុត្ថា ប្រធានសន្តិសុខ សាលាខណ្ឌដូនពេញបានបដិសេធថា ជុំវិញការលក់ដូរនិងកន្លែងផ្ញើកង់ ម៉ូតូ និងរថយន្ត របស់បងប្អូនប្រជាពលរដ្ធ នៅក្នុង និងនៅជុំវិញផ្សាររាត្រីនេះ គ្មានអ្វីពាក់ពន្ធ័ជាមួយនឹងសាលាខណ្ឌដូនពេញនោះទេ
ពីព្រោះផ្សារនេះ គ្រប់គ្រងដោយសាលារាជធានីភ្នំពេញ និងមានក្រុមហ៊ុនឯកជនបានដេញថ្លៃធ្វើអាជីវកម្មពីសាលារាជធានីស្របតាមផ្លូវច្បាប់ ក្នុងនោះ ក្រុមហ៊ុន រត្ន័ សែនសុភាព បានទទួលសិទ្ធ នៃការទទួលខុសត្រូវ ក្នុងការផ្ញើរកង់ម៉ូតូ និង រថយន្ត ដែលបានចរចាគ្នាជាមួយនឹងភាគីផ្សាររាត្រីក្នុងការធ្វើអាជីវកម្ម ។
ការបំភ្លឺរបស់លោក គឹម វុត្ថា ប្រធានសន្តិសុខ សាលាខណ្ឌដូនពេញ នាពេលនេះ បានធ្វើឡើង ក្នុងគ្រាដែលមានការរិះគន់ ពីមហាជនមួយចំនួន ដែលបានចោទលើអាជ្ញាធរមានសមត្ថកិច្ចថា៖ ការបង្កើតនេះ ដោយសារតែមានការអនុញ្ញាតពីអាជ្ញាធរខណ្ឌដូនពេញ តាមរយៈនៃការទទួលលាភសក្ការៈពីផ្សាររាត្រី ។
សូមបញ្ជាក់ថា៖ ផ្សាររាត្រី ជាផ្សារមួយ ក្នុងចំណោមផ្សារធំនានា ក្នុងខណ្ឌដូនពេញ រាជធានីភ្នំពេញ ហើយត្រូវបានប្រជាពលរដ្ឋ និងក្រុមអាជីវករនាំគ្នាមកលក់ដូរនៅពេលយប់ ។ ម្យ៉ាងទៀត បើចំថ្ងៃមានគេប្រគំតន្ត្រីផងនោះ មានភ្ញៀវជាច្រើន បាននាំគ្នាមកទស្សនាកំសាន្ត បង្កឲ្យមានការកកស្ទះជាអន្លើ ។ ដោយមើលឃើញពីការកើនឡើងរបស់ភ្ញៀវជាលំដាប់ និងធ្វើឲ្យភ្ញៀវមានការលំបាក នៃការទុកដាក់ កង់ ម៉ូតូ និងរថយន្ត គេឃើញមានក្រុមអាជីវករ បានមកបង្កើតកន្លែង ទទួលផ្ញើរកង់ម៉ូតូ និងរថយន្ត ដើម្បីសំរួលដល់ការលំបាករបស់ភ្ញៀវ ។
លោក គឹម វុត្ថា ប្រធានសន្តិសុខ សាលាខណ្ឌដូនពេញបានឱ្យដឹងទៀតថា កន្លងមកសាលារាជធានីភ្នំពេញ បានកោះអញ្ជើញភាគីពាក់ពន្ធ័ទៅប្រជុំនៅសាលារាជធានី និងសាលាខណ្ឌដូនពេញ ក្នុងគោលបំណងឲ្យមានការសហការគ្នាឱ្យបានល្អប្រសើរ ក្នុងការជួយសំរួលដល់ការកកស្ទះចរាចរ នៅក្នុងតំបន់នេះ ហើយកន្លងមក កម្លាំងសណ្តាប់ធ្នាប់របស់លោកក៏បានចុះជួយធ្វើអន្តរាគមន៏សំរួលចរាចរភ្លាមៗផងដែរ ។
ដូចនេះហើយ លោក គឹម វុត្ថា សូមជំរាបជូនបងប្អូនប្រជាពលរដ្ឋ និងអ្នកធ្លាប់បានរិះគន់កន្លងមកនេះ ថា៖ កន្លែងនេះ ពិតជាគ្មានការពាក់ពន្ធ័ទៅនឹងរឿងលុយកាក់ ជាមួយភាគីក្រុមហ៊ុននោះឡើយ ៕
