កំពង់ឆ្នាំង៖ ស្ត្រីស្រស់ស្អាតម្នាក់ព្រោះតែភាពក្រីក្រក្នុងគ្រួសារបានយកកូនប្រុសតូចម្នាក់ទៅតាមខ្លួនមិនដឹងថា ជាទៅរស់នៅទីណាទេ ដោយដាច់ចិត្តរត់ចោលកូន២នាក់និងប្តី រយះពេល៦ថ្ងៃមកហើយ អោយរស់នៅលំបាកវេទនានៅក្នុងផ្ទះដោយមិនខ្វាយខ្វល់អ្វី ឡើយ។ករណីនេះបានកើតឡើងនៅថ្ងៃទី ២២ ខែកក្កដា ឆ្នាំ២០១៤ នៅក្នុងភូមិអាឡែង ឃុំជ្រៃបាក់ ស្រុករលារប្អៀរ។
បុរសឈ្មោះ ផាន់ សារឿន អាយុ ៤០ឆ្នាំ មានមុខរបរជាកម្មសំណង់ រស់នៅក្នុងភូមិឃុំកើតហេតុខាងលើ បានរៀបរាប់នៅព្រឹកថ្ងៃទី ២៨ ខែកក្កដា ឆ្នាំ២០១៤ នេះអោយដឹងថា៖ប្រពន្ធរបស់ខ្លួនឈ្មោះ មុត យ័ន អាយុ៣០ឆ្នាំ បានរៀបការជាមួយគ្នាជាង១០ឆ្នាំមកហើ យនិងមានកូនចំនួន៣នាក់ ប្រុស១ ស្រី២ កូនបងគេអាយុ ១៣ឆ្នាំ និងកូនពៅអាយុ៧ឆ្នាំ។ ក្នុងរយះពេលបានគ្នាជាប្តីប្រពន្ធជាង១០ឆ្នាំកន្លងមកនេះរស់នៅតែក្នុងខ្ទមស្លឹកតូចមួយរហែករយ៉ៃ ប្តីមានមុខរបរជាកម្មករសំណង់ ចំណែកប្រពន្ធស៊ីឈ្នួល ធ្វើស្រែចំការអោយគេ ពុំមានដីស្រែធ្វើនិងគេទេ។
ប៉ុន្មានឆ្នាំចុងក្រោយនេះដោយសារតែជីវភាពក្នុងគ្រួសារក្រីក្រនិងធ្លាក់ដុនដាប និងកូនៗមានជម្ងឺផងនោះ ពួកគាត់បានសម្រេចចិត្តខ្ចីលុយចងការអ្នកស្រុកចំនូនជាង៤លានរៀលមកដល់ពេលនេះទាំងការទាំងដើមឡើងជាង៥លានរៀលទៅហើយ រូបគាត់ពុំមានលទ្ធភាពរកប្រាក់សងគេបានឡើយ។ព្រោះតែហេតុនេះហើយទើបប្រពន្ធគាត់ដាច់ចិត្តរត់ចោលកូននិងប្តី មិនដឹងថាទៅរស់នៅទីណាឡើយ។ 
នៅក្នុងរយះពេល៦ថ្ងៃដែលម្តាយបានរត់ចោល កូនៗទាំង២នាក់ដែលទើបតែមានអាយុ១៣ឆ្នាំនិងអាយុ៩ឆ្នាំ បានរស់នៅត្រម៉ង់ត្រម៉ោចតែ២នាក់បងប្អូនយ៉ាងវេទនា នៅក្នុងរយះពេលនេះដែរឪពុករបស់គេទៅធ្វើជាកម្មករសំណង់នៅក្នុងទីក្រុងភ្នំពេញ ក្រោយពេលដឹងថាប្រពន្ធចេញពីផ្ទះបាត់រយះពេល៦ថ្ងៃហើយនោះ ទើបរូបគេត្រឡប់មករស់នៅគ្រប់គ្រងកូនៗទាំង២នាក់នៅក្នុងលំនៅដ្ឋានវិញ។ បុរសឈ្មោះ ផាន់ សារឿន សូមសំណូមពរដល់លោកនាយកសារព័ត៌មាន មេត្តាជួយផ្សាយរឿងនេះផង ដើម្បីអោយប្រពន្ធរបស់គាត់បានដឹងផង ថាគាត់មិនប្រកាន់និងរូបនាងឡើយ សូមអោយតែនាងវិលមករូមរស់នៅជាមួយកូនៗនិងប្តីវិញមក រូបប្តីនិងកូនៗរង់ចាំទទួលនាងជានិច្ច ៕
