ខេត្តក្រចេះ :រហូតមកដល់យប់ថ្ងៃទី ២៩ ខែកក្ដដា ឆ្នាំ២០១៤នេះ លោកធា ហើយនិងលោកចិន នៅតែបន្តរសកម្មភាពដឹកជញ្ជូនឈើធ្នង់ចេញពីចំណុច ឃុំកន្តួតនិងឃុំថ្មី ដោយធ្វើរចរាចរតាមកំណាត់ផ្លូវជាតិលេខ៧ ឆ្លងកាត់តាមស្រុកស្នួល ឆ្ពោះទៅកាន់ ចំណុច ត្រពាំងស្រែ ឃុំពីរធ្នូរ ស្រុកស្នួល ខេត្ត ក្រចេះ និងស្រុក មេមត់ ខេត្តត្បូងឃ្មុំ តែដដែល។ 
ប្រភព ព័ត៍មានបានឲ្យដឹងថា មានរថយន្តកាមរី ឆ្លាម បាឡែន និងហៃឡេនឌ័រ ព្រមទាំងម៉ូតូ ជាច្រើនគ្រឿងទៀត បាននឹងកំពុងតែបន្តរ សកម្មភាពដឹកជញ្ជូន ឈើធ្នង់ ចេញពីចំណុច ឃុំកន្តួត និង ឃុំថ្មី ស្រុកចិត្របូរី ខេត្តក្រចេះ ឆ្ពោះទៅកាន់ ចំណុចត្រពាំងស្រែ ឃុំពីរធ្នូរ ស្រុកស្នួល និង ស្រុកមេមត់ ខេត្តត្បូងឃ្មុំ ដោយមិនខុសពីពេលមុនៗនោះទេ ជាក់ស្ដែងគឺនៅយប់ថ្ងៃទី២៩ ខែកក្ដដាឆ្នាំ ២០១៤នេះតែម្ដង ហើយក្នុងចំណោមរថយន្តដឹកជញ្ជូនឈើធ្នង់ចេញពីឃុំទាំងនោះ ត្រូវគេបានដឹងយ៉ាងច្បាស់ថាជា រថយន្តរបស់ លោកធា និងលោក ចិន ដែលជាឈ្មួញរកស៊ីឈើខុសច្បាប់ យ៉ាងសកម្ម នៅចំណុច ឃុំ កន្តួតនិង ឃុំថ្មី នេះ ផងដែរ ហើយ ក៍ កំពុងតែបន្តរសកម្មភាព របស់ពួកគេ បានយ៉ាងរលូន ដោយ គ្មានអ្វីមករាំង ស្ទះបន្តិចសោះឡើយ ។
ប្រជាពលរដ្ឋនៅឃុំកន្តួតបានបង្ហើបឲ្យដឹងផងដែរថា បើទោះបីជា បទល្មើសព្រៃឈើ នៅលើទឹកដីនៃឃុំកន្តួតបាន កើតមានឡើងយ៉ាងពេញបន្ទុក ក៍ដោយក្ដី ក៍លោកសុខ គោ នាយសង្កាត់រដ្ឋបាលព្រៃឈើកន្តួត មិនបានចាត់ វិធានការ បង្ក្រាបនោះដែរ ពួកគាត់គ្រាន់តែឃើញលោកសុខ គោ យករថយន្តកែឆ្នៃ ទៅ ចតនៅតាមផ្លូវលំមួយកន្លែងដែលស្ថិតនៅចំណុចគល់ស្ពានខ្នាច ហើយដេកនៅក្នុងរថយន្តនោះ ហាក់បីដូចជារូប គាត់ អនុវត្តន៍ ទៅតាមជំនាញ យ៉ាងម៉ត់ចត់ អញ្ចឹង តែផ្ទុយ ទៅវិញ ពួកគាត់ពុំដែលឃើញ លោកសុខ គោ ចាប់ឫរឹបអូស
រថយន្តដឹកជញ្ជូនឈើខុសច្បាប់ ដែល ចេញពីចំណុច ឃុំកន្តួត បានមួយគ្រឿងណាសោះឡើយ នៅ ក្នុងកំឡុងពេលដែល បទល្មើសព្រៃឈើនៅលើទឹកដីនៃ ឃុំកន្តួត កំពុងតែកំរើកឡើងវិញ នាពេលថ្មីៗនេះ ហើយលោកសុខ គោ បែរជាទៅចាប់តែ រ៉ឺម៉ក ដឹកជន្លង់ម្រេចបន្តិចបន្តួចរបស់ប្រជាពលរដ្ឋ ក្រីក្ររនៅក្នុងតំបន់នោះទៅវិញ ។ ចំណែកឯលោកសុខ គោវិញ ភ្នាក់ងារ កាសែត កម្ពុជាថ្មីប្រចាំខេត្តក្រចេះបានទូរស័ព្ទទៅសុំការបំភ្លឺពីគាត់ផងដែរ ហើយគាត់ក៍ឆ្លើយតបមកវិញថា គាត់កំពុងតែជាប់ប្រជុំ ៕ ម៉េង ហ៊ាង
