ខេត្តព្រះវិហារ ខណ្ឌរដ្ឋបាលព្រៃឈើព្រះវិហារប្រារព្វធ្វើពិធីអបអរសាទរបុណ្យរុក្ខទិវា០៩កក្កដានៅព្រឹកថ្ងៃទី០៣ខែសីហាឆ្នាំ២០១៤ក្រោមអធិបតីភាពឯកឧត្តមអ៊ុំម៉ារ៉ាអភិបាលខេត្តព្រះវិហារនិងឯកឧត្តមប្រធានក្រុមប្រឹក្សាខេត្តស្ថិតនៅភូមិស្រយង់ជើងឃុំស្រយង់ស្រុកគូលែន។ពិធីនេះមានអ្នកអញ្ជើញមកចូលរួមយ៉ាងអធិកអធមសរុបប្រមាណ៦០០នាក់។
លោកអិតភូម្រានាយខណ្ឌរដ្ឋបាលព្រៃឈើព្រះវិហារបានជំរាបជូនគណះអធិបតីអោយបានដឹងថាកម្មវិធីកំណែទម្រង់ព្រៃឈើជាតិគឺរាជរដ្ឋាភិបាលកម្ពុជាកំណត់អោយបាននូវគម្របព្រៃឈើ៦០ភាគរយនៃផ្ទៃដីទាំងមូលគិតត្រឹមឆ្នាំ២០១៥។ លោកនាយខណ្ឌរដ្ឋបាលព្រៃឈើបានជំរាបជូនបន្តទៀតថាផ្អែកតាមកម្មវិធីកំណែទម្រង់នេះក្រសួងកសិកម្មរុក្ខាប្រមាញ់និងនេសាទមានរដ្ឋបាលព្រៃឈើជាសេនាធិការផ្ទាល់បានសហការជាមួយនឹងអាជ្ញាធរមូលដ្ឋានអង្គការជាតិនិងអន្តរជាតិចូលរួមលើកកំពស់និងអនុវត្តការងារដាំកូនឈើទ្បើងវិញនៅលើផ្ទៃដីទំនេរនិងដីព្រៃរិចរិលនៅទូទាំងប្រទេស។
លោកបានថ្លែងថាគិតចាប់តាំងពីឆ្នាំ២០១១ដល់ឆ្នាំ២០១៣កន្លងមកខណ្ឌរដ្ឋបាលព្រៃឈើព្រះវិហារបានធ្វើការដាំកូនឈើប្រណីតចំរុះសរុបចំនួន៣៨.០៣៥ដើមលើផ្ទៃដីចំនួន៨៦០ហិកតានិងចែកជូនកូនឈើហូបផ្លែគ្រប់ប្រភេទដល់ប្រជាពលរដ្ឋនិងគ្រួសារកងទ័ពសរុបចំនួន១៩.៥៧៨ដើម។ក្នុងឆ្នាំ២០១៤នេះខណ្ឌរដ្ឋបាលព្រៃឈើព្រះវិហារបានចែកជូនកូនឈើហូបផ្លែនិងកូនឈើលម្អចំនួន១៥.១០០ដើមដល់ប្រជាពលរដ្ឋគ្រួសារកងទ័ពនិងអាជ្ញាធរក្រុងព្រះវិហារផងដែរ។
ឯកឧត្តមអ៊ុំម៉ារ៉ាអភិបាលខេត្តព្រះវិហារបានមានប្រសាសន៍សំណេះសំណាលទៅកាន់អង្គពិធីទាំងមូលថាពិធីបុណ្យរុក្ខទិវាពិតជាមានសារសំខាន់ខ្លាំងណាស់សំរាប់បំផុសស្មារតីប្រជាពលរដ្ឋមន្ដ្រីរាជការស៊ីវិលនិងប្រដាប់អាវុធសិស្សានុសិស្សអោយខិតខំយកចិត្តទុកដាក់ដាំដុះកូនឈើទ្បើងវិញ។
ការដាំកូនឈើគឺជាមូលដ្ឋានគ្រឹះនៃការអភិវឌ្ឍន៍សេដ្ឋកិច្ចជាតិនិងជាកិច្ចការពារបរិស្ថានអោយមានភាពស្រស់បំព្រង។ឯកឧត្តមអភិបាលខេត្តថ្លែងថាព្រៃឈើគឺជាសម្បត្តិធម្មជាតិដ៍មានតំលៃបំផុតចំពោះមនុស្សជាតិនិងសត្វលោករស់នៅលើភពផែនដីទាំងមូល។ ពិធីបុណ្យរុក្ខទិវាខាងលើនេះមានរៀបចំធ្វើពិធីចុះហត្ថលេខាលើសៀវភៅក្រាំងមាសដោយឯកឧត្តមអភិបាលខេត្តនិងមានពិធីចុះហត្ថលេខាគូស្វាមីភរិយាដែលទើបរៀបមង្គលការដើម្បីចូលរួមដាំកូនឈើទុកជាអនុស្សាវរីយ៍។
ចុងបញ្ចប់នៃពិធីគណះអធិបតីព្រមទាំងព្រះសង្ឃនិមន្តអញ្ជើញចូលរួមដាំកូនឈើទុកជានិមិត្តរូប។ពិធីបុណ្យរុក្ខទិវាឆ្នាំនេះមានកូនឈើប្រណីតប្រភេទគ្រញូងចំនួន២៥០០ដើមនិងអាកាស្យាចំនួន១ម៉ឺនដើមដាំលើផ្ទៃដីចំការ០២ហិកតាឧបត្ថម្ភដោយគម្រោងITTOនិងWCSហើយបានផ្ដល់កូនឈើហូបផ្លែចម្រុះដល់អ្នកមកចូលរួមចំនួន២១០០ដើមបន្ថែមទៀត៕
