សៀមរាប៖ យ៉ាងហោចណាស់ក៏មានមនុស្សប្រុស ស្រីចំនួន៦នាក់រងរបួសធ្ងន់ និង ស្រាល ក្នុងចំណោមមនុស្សទាំង១២នាក់នៅក្នុងរថយន្តសាំយ៉ុងមួយគ្រឿងដែលក្រឡាប់ផ្ងាជើង ខណៈពេលដែលបើកលឿនដល់ចំនុចផ្លូវកោងមិនប្រុងប្រយត្ន័ ក្នុងដំណើរឆ្ពោះទៅកំសាន្តនៅភ្នំគូលេននៃខេត្តសៀមរាប។ 
ហេតុការគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៩និង៣០នាទីព្រឹកថ្ងៃទី១១ខែសីហា នៅចំនុចខាងកើតរង្វង់មូលបន្ទាយស្រី ក្នុងភូមិស្រះខ្វាវ ឃុំត្បែង ស្រុកបន្ទា យស្រី ខេត្តសៀមរាប។ លោកអនុសេនីយ៍ទោ ហឿល សារ៉ែម នាយផ្នែកសណ្តាប់ធ្នាប់ស្រុកបន្ទាយស្រីបាន ប្រាប់ថា រថយន្តសាំយ៉ុងដឹកភ្ញៀវនេះបើកចេញពីខេត្តកំពង់ស្ពឺ ឆ្ពោះមកលេងខេត្តសៀមរាប ប៉ុន្តែអ្នកបើករថយន្តនោះមិនបានប្រុងប្រយត្ន័ត្រង់ផ្លូវ
កោងទើបឱ្យក្រឡាប់ផ្ងាជើងឡើងលើ បណ្តាលឱ្យមនុស្សប្រុស ស្រីចំនួន៦នាក់រងរបួសធ្ងន់ និង ស្រាល ។លោកបន្តថា រថយន្តសាំយ៉ុងដែលក្រឡាប់នោះពាក់ស្លាកលេខ កំពង់សោម 2A2381 បើកបររថយន្តដោយឈ្មោះ ថា រតនា ភេទប្រុសអាយុ២៩ឆ្នាំ រស់នៅខេត្តកំពង់ស្ពឺ ក្នុងនោះមានអ្នកជិះរថយន្តចំនួន១២នាក់។ លោកបន្តទៀតថា ជនរងគ្រោះទាំង៦នាក់ត្រូវបានដឹកជញ្ជូនទៅកាន់មន្ទីរពេទ្យ ដើម្បីជួយសង្គ្រោះ៕ 
