សៀមរាប ៖ អំណោយរបស់អ្នកនាង ថៃ លីន ដែលជាអាជីវករក្នុងផ្សារចាស់ក្រុងសៀមរាបបាននាំយកទៅចែកជូនដល់បងប្អូនប្រជាពលរដ្ឋចំនួន ៣០គ្រួសារ ក្នុងភូមិ ទួលវៀង ឃុំ ល្វា ស្រុក ពួក ខេត្តសៀមរាបដោយពិធីនេះបានប្រព្រឹត្តទៅកាលពីពេលថ្មីៗកន្លងទៅ ។
មានប្រសាសន៍សំណេះសំណាលជាមួយបងប្អូនប្រជាពលរដ្ឋទាំង៣០គ្រួសារនាឱកាសនោះអ្នកនាង ថៃ លីនដែលជាអាជីវករក្នុងផ្សារចាស់ក្រុងសៀមរាប បានបញ្ជាក់ថាកាយវិការដ៏សប្បុរសធម៌ នេះ គឺ ជាប្រពៃណីសិល្បះនៃការចែករំលែកក្នុងការជួយឩបត្ថមដល់ប្រជាពលរដ្ឋដែលមានជីវភាពក្រីក្រនិងមានជីវភាពខ្វះខាតពិតប្រាកដ ។
ជាក់ស្តែងអំណោយដែលបាននាំយកមកចែកជូនដល់បងប្អូននាពេលនេះក្នុងមួយគ្រួសារទទួលបាន អង្ករ ១០ គីឡូ មី ១ កេស ទឹកក្រូច ១ កេស ត្រី ខ ១ យួរ មាន១២កំប៉ុង ម៉ុង ១ កន្ទេល ១ គ្រឿងឩបភោគបរិភោគមួយចំនួនទៀតនិងថវិកា ១ម៉ឺនរៀលផងដែរ ។ អ្នកនាង ថៃ លីន បានបន្តប្រសាសន៍ថាថ្វីត្បិតតែអំណោយទាំងអស់នេះមានលក្ខណះទ្រង់ទ្រាយតូចក៏ពិតមែន តែវាក៏អាចជួយដោះ ស្រាយនូវភាពខ្វះខាតចំពោះមុខរបស់បងប្អូនបានមួយរយៈផងដែរ ។
អ្នកនាងក៏បានធ្វើការ ផ្តាំផ្ញើដល់បងប្អូនទាំង៣០គ្រួសារ សូមងោយ បងប្អូនត្រូវយកចិត្តទុកដាក់ទៅ លើសុខភាព អនាម័យរស់នៅ ក្នុងក្រុមគ្រួសារ នូវរាល់ចំណីអាហារ ត្រូវពិសារទឹកស្អាត ដើម្បីជៀសវៀងកុំឲ្យមានជម្ងឺឆ្លង និង រោគរាត្បាតផ្សេងៗ កើត មានក្នុងក្រុមគ្រួសារ និង ត្រូវប្រុងប្រយ័ត្ននៅពេលទឹកជំនន់ ក្នុងការគ្រប់គ្រងកូនចៅ កុំឲ្យក្មេងៗលេងទឹកនាំឲ្យមានគ្រោះ ថ្នាក់នូវប្រការណាមួយមកដល់ក្រុមគ្រួសាររបស់បងប្អូនផងដែរ ។
បន្តមកអ្នកនាង ថៃ លីន ដែលជាអាជីវករក្នុងផ្សារចាស់ក្រុងសៀមរាបក៏បានបន្តសំណេះសំណាលជាមួយក្មួយៗចំនួន៥០នាក់ទៀតដោយអ្នកនាងបានធ្វើការផ្តាំផ្ញើដល់ក្មួយៗទាំងអស់ត្រូវខិតខំរៀនសូត្រស្តាប់បង្គាប់ឳពុកម្តាយលោកគ្រូអ្នកគ្រូព្រោះក្មួយៗទាំងអស់គឺជាទំពាំងស្នងឫស្សីនៃប្រទេសជាតិ ។
ដោយនៅក្នុងឱកាសនោះអ្នកនាង ថៃ លីន ដែលជាសប្បុរសជនក៏បានផ្តល់ជូននូវថវិកាដល់ក្មួយៗទាំង៥០នាក់ក្នុងម្នាក់ៗទទួលបានថវិកា ២ពាន់រៀល ផងដែរ ៕
លោក ខេង ខេមរា
