ខេត្តសៀមរាប ៖ នាព្រឹកថ្ងៃទី០២ ខែតុលា ឆ្នាំ២០១៤ ឯ.ឧ តុប សំ ប្រធានក្រុមប្រឹក្សាជាតិប្រឆាំងអំពើពុករលួយ នៃព្រះរាជាណាចក្រកម្ពុជា បានអញ្ជើញជាគណៈអធិបតីក្នុងកិច្ចប្រជុំថ្នាក់តំបន់ស្ដីពីការទប់ស្កាត់បទល្មើសពុករលួយបរទេសក្នុងសហគមន៍សេដ្ឋកិច្ចអាស៊ាន ដែលរៀបចំឡើងដោយអង្គភាពប្រឆាំងអំពើពុករលួយ នៃព្រះរាជាណាចក្រកម្ពុជា សហការជាមួយការិយាល័យអង្គការសហប្រជាជាតិទទួលបន្ទុកគ្រឿងញៀន និងឧក្រិតដ្ឋកម្ម ។
កិច្ចប្រជុំនេះ បានប្រារព្វធ្វើឡើងនៅសណ្ឋាគារអ៊ីមប្រៃសអង្គរ ដោយមានការចូលរួមពីសំណាក់គណៈប្រតិភូបរទេស ភ្ញៀវជាតិ អន្តរជាតិ ដែលជាអ្នកធ្វើការសម្រេចចិត្ត អ្នកជំនាញ អ្នកអនុវត្តផ្ទាល់ ផ្នែកសិក្សាធិការ វិស័យឯកជន និងសង្គមស៊ីវិល សរុបជាង៦០នាក់ មកពី១៩ប្រទេស រួមមានសមាជិកអាស៊ានទាំង១០ និងទីម័រខាងកើត ចិន ជប៉ុន អូស្ត្រាលី អាមេរិក បារាំង ស្លូវែនៀ ស្វីស និងណ័រវេ ។
កិច្ចប្រជុំនេះ ធ្វើឡើងក្នុងគោលបំណងគាំទ្រប្រទេសអាស៊ាន ទប់ស្កាត់បទល្មើសអំពើពុករលួយបរទេសឲ្យកាន់តែមានប្រសិទ្ធភាព តាមរយៈការពិនិត្យឡើងវិញនូវក្របខ័ណ្ឌគោលនយោបាយ ការអនុវត្តច្បាប់ កិច្ចសហការប្រតិបត្តិការអន្តរជាតិ ក្នុងទម្រង់ជំនួយផ្នែកច្បាប់ឆ្លងដែនទៅវិញទៅមក និងការបង្ការ ទប់ស្កាត់បទល្មើសពុករលួយបរទេស ជាពិសេសក្នុងរបរការណ៍នៃសមាហរណកម្មសេដ្ឋកិច្ចអាស៊ាន ចូលទៅក្នុងសហគមន៏សេដ្ឋកិច្ចតែមួយចាប់ពីឆ្នាំ២០១៥ ដែលនឹងចូលមកដល់ក្នុងពេលឆាប់ៗខាងមុងនេះ ។ 
ឯ.ឧ តុប សំ បានមានប្រសាសន៍ថា ដើម្បីសម្រេចបាននូវគោលបំណងនេះ កិច្ចប្រជុំនឹងស្ដាប់នូវបទបង្ហាញពីវាគ្មិន និងអ្នកជំនាញជាច្រើន ហើយក៏នឹងពិភាក្សា ជជែក វែកញែកក្នុងចំណោមអ្នកចូលរួមទាំងអស់ សំដៅឈានដល់ការដាក់ចេញនូវអនុសាសន៍ ស្ដីពីការទប់ស្កាត់បទល្មើសពុករលួយបរទេស ក្នុងសហគមន៍សេដ្ឋកិច្ចអាស៊ាន ។
ឯ.ឧ បានមានប្រសាសន៍បន្តថា ការប្រយុទ្ធប្រឆាំងអំពើពុករលួយក្នុងបាតុភូតថ្មីនេះ នឹងទាមទារឲ្យមាការយល់ដឹង និងច្បាប់ថ្មីៗ ដើម្បីអាចយកមកប្រើប្រាស់ប្រកបដោយប្រសិទ្ធភាព និងប្រសិទ្ធផល ។ ហើយដើម្បីប្រយុទ្ធប្រឆាំងអំពើពុករលួយក្នុងទម្រង់បែបនេះ គឺយើងទាំងអស់គ្នាត្រូវគិតអំពីទិដ្ឋភាពចំនួន៤ សំខាន់ៗ ដូចជាៈ-ក្របខ័ណ្ឌច្បាប់សម្រាប់ប្រទេសនីមួយៗ ក្នុងការស៊ើបអង្កេត និងផ្ដន្ទាទោស -ការចូលរួម និងការគោរពប្រតិបត្តិរបស់ផ្នែកសាជីវកម្ម -កិច្ចសហការប្រតិបត្តិការអន្តរជាតិ ជាពិសេសក្នុងទម្រង់ជំនួយផ្នែកច្បាប់ទៅវិញទៅមក និងការអនុវត្តច្បាប់ផងដែរ ។
លោក ខេង ខេមរា
