ភ្នំពេញ៖ បុរស ៣នាក់ ត្រូវររបួសធ្ងន់ស្រាល ដោយសារពួកគេជិះម៉ូតូសង់កូរ៉េ មួយគ្រឿងឌុបគ្នា ហើយត្រូវរថយន្តធុនធំ ដឹកឥដ្ឋមួយគ្រឿងកំពុងបើកស្របគ្នាយ៉ាងលឿនជ្រុលបុកម៉ូតូសង់កូរ៉េពីក្រោយពេញទំហឹង កាលពីវេលាម៉ោង ១៨នឹង ០០ នាទីល្ងាចថ្ងៃទី ០២ ខែមីនា ឆ្នាំ២០១៤ នៅតាមបណ្តោយផ្លូវជាតិលេខ ៤ សង្កាត់ចោមចៅ ខណ្ឌពោធិ៍សែនជ័យ ។
យោងតាមប្រភពព័ត៌មានពីសមត្ថកិច្ចមូលដ្ឋានបានឲ្យដឹងថា មុនពេលកើតហេតុមានបុរស ៣នាក់ ជិះម៉ូតូសង់កូរ៉េ មួយគ្រឿងពណ៌ស្លាទុំ ឌុបគ្នាធ្វើដំណើរតាមបណ្តោយផ្លូវជាតិលេខ ៤ ទិសដៅពីកើតទៅលិច យ៉ាងលឿន ហើយខណៈនោះក៏មានរថយន្តម៉ាក FUSO មួយគ្រឿង ដឹកឥដ្ឋ ពេញក្នុងរថយន្ត ទិសដៅស្របគ្នា ជាមួយម៉ូតូ ប៉ុន្តែទំនងជាអ្នកបើកបររថយន្តស្រវឹងស្រាហើយងងុយដេកទើប បណ្តាលឲ្យរេចង្កូតរថយន្តបុកម៉ូតូ ពីក្រោយពេញទំហឹង រួចរថយន្តបានព្យាយាមបើករត់គេចខ្លួនក៏រេចង្កូតទៅខាងស្តាំដៃធ្លាក់ក្រឡាប់ចូលប្រឡាយ រង់ការខូចខាតស្ទើរទាំងស្រុង ។
គួរបញ្ជាក់ថា ក្នុងហេតុការណ៍បណ្តាលឲ្យបុរស ៣នាក់ ដែលជិះម៉ូតូសង់កូរ៉េឌុប គ្នាត្រូវរងរបួសធ្ងន់ស្រាល ចំណែកអ្នកបើកបររថយន្តបង្កបានចុះរត់គេចខ្លួនបាត់ស្រមោលភ្លាមៗ ។ បន្ទាប់ពីកើតហេតុសមត្ថកិច្ចមូលដ្ឋានបានចុះមកអន្តរាគមន៍ធ្វើការវាស់វែងអូសយករថយន្តបង្កហេតុ នឹង ម៉ូតូរបស់ជនរងគ្រោះទៅរក្សាទុកនៅអធិការដ្ឋាននគរបាលខណ្ឌពោធិ៍សែនជ័យរង់ចាំដោះស្រាយនាពេលក្រោយ ៕
