ភ្នំពេញ ៖ បុរស បានរងរបួសធ្ងន់ធ្ងរបាក់ជើងម្ខាងខណៈដែលរថយន្តកុងតឺន័រ គ្រឿងពណ៌ ខៀវបានធ្វើដំណើរយ៉ាងលឿនតាមបណ្តោយផ្លូវព្រះស៊ីសុវត្តិក្នុងទិសដៅពីត្បូងទៅជើង លុះមកដល់ចំណុចមុខវត្តណាឡោម ក៏រថយន្តនេះបើកជ្រុលទៅកៀរម៉ូតូឌ្រីមសងសេ១២៥មួយគ្រឿង ពណ៌ខ្មៅ ពាក់ស្លាកលេខ ភ្នំពេញ 1AY-9287 ជិះដោយបុរសម្នាក់កំពុងបើកនៅពីមុខ បណ្តាលឲ្យម៉ូតូដូលចូលក្រោមកង់រថយន្តអូសជាង១០ម៉ែត្រ
សំណាងល្អម្ចាស់ជិះម៉ូតូខ្ទាត់ចេញក្រោមកង់រថយន្តមិនបណ្តាលឲ្យរងគ្រោះដល់អាយុជិវិត គ្រាន់តែរងរបួសធ្ងន់ត្រូបានរថយន្តសាមុយដឹងយកទៅមន្ទីរពេទ្យដើម្បីព្យាបាលភ្លាមៗ ចំណែក រថយន្តបង្កវិញបានបើករត់គេចបាត់ស្រមោលតែម្តង។
ហេតុការណ៍នេះ បានកើតឡើងកាលពីវេលាម៉ោង ១២និង ២០នាទី យប់រំលងអាធ្រាត្រឈានចូលថ្ងៃទី០១ខែមីនា ឆ្នាំ ២០១៤ស្ថិតក្នុងសង្កាត់ផ្សារកណ្តាល១ ខណ្ឌដូនពេញ ។ ក្រោយពេលកើតហេតុសមត្ថកិច្ចបានចុះមកដល់កន្លែងកើតហេតុនិងអូសយកម៉ូតូជនរងគ្រោះខាងលើទៅរក្សាទុកនៅខណ្ឌ័ដូនពេញ រងចាំបងប្អូនមកទទួលយកវិញ ហើយចំណែករថយន្តបង្កវិញសមត្ថកិច្ចកំពុងតែស្រាវជ្រាវតាមរកព្រោះថានៅក្បែរកន្លែងកើតហេតុមានអ្នកឃើញស្លាក់លេខរថយន្តបង្កនេះច្បាស់ណាស់៕
