កំពង់ចាម: ឯកឧត្ដម អ៊ុន ចាន់ដា អភិបាលខេត្តកំពង់ចាម បានណែនាំដល់មន្ត្រីជំនាញពាក់ព័ន្ធ ឱ្យធ្វើការសិក្សារៀបចំម៉ាស៊ីនស្វ័យប្រវត្តិខ្នាតធំប្រេីប្រាស់ដោយផ្ទាំងសូឡា ដេីម្បីបូមទឹកបញ្ចូលប្រឡាយ សម្រាប់ប្រជាកសិករបង្ហូរចូលស្រែ ឬប្រេីប្រាស់តាមតម្រូវការ ពោលគឺធ្វេីយ៉ាងណាកុំឱ្យប្រជាកសិករយេីងចំណាយ 
អស់ដេីមទុមច្រើន ក្នុងការប្រកបមុខរបរកសិកម្ម ហេីយគម្រោងរៀបចំម៉ាស៊ីនបូមទឹកដោយស្វ័យប្រវត្តិនេះដែរ គឺយើងត្រូវប្រេីប្រាស់កញ្ចប់ថវិការបស់រដ្ឋបាលខេត្តតែម្ដង ។ ការណែនាំបែបនេះក្នុងឱកាសចុះពិនិត្យការងារបង្កបង្កើនផល និងស្ថានភាពទឹក នៅទំនប់តំបន់ ឃុំព្រៃចារ ស្រុកជើងព្រៃ និងទំនប់អណ្តូងអាង ឃុំបារាយណ៍ នៅស្រុកព្រៃឈរ នាព្រឹកថ្ងៃទី៨ ខែកញ្ញា ឆ្នាំ២០២៣ ។
លោក អ៊ុម វិបុល ប្រធានមន្ទីរធនធានទឹក និងឧតុនិយមខេត្តកំពង់ចាម បានឲ្យដឹងថា ការជួសជុលទំនប់អាងទឹកតំបន់នេះឡើងវិញ ដើម្បីលើកកម្ពស់កម្រិតជីវភាពរបស់បងប្អូនប្រជាពលរដ្ឋ ក៏ដូចជាការចូលរួមជាមួយរាជរដ្ឋាភិបាល ក្នុងការកាត់បន្ថយភាពក្រីក្រ តាមរយ:ការបង្កើនលទ្ធភាព នៃការបង្កបង្កើនផល របស់ប្រជាកសិករ ដោយទំនប់តំបន់នេះអាចមានលទ្ធភាពរក្សាទឹកទន្លេមេគង្គទុកបានរហូតជាង១២លានម៉ែត្រត្រីគុណ សម្រាប់ស្រោចស្រពបន្ថែមលើផ្ទៃដីបង្កបង្កើនផលស្រូវវស្សា ៤៥២ហិកតា ស្រូវប្រាំង១.២៥០ហិកតា និងដំណាំរួមផ្សំ ៤០ហិកតា របស់ប្រជាពលរដ្ឋ ចំនួន១១ភូមិ ក្នុងឃុំសំរោង ស្រុកព្រៃឈរ និង ៦ភូមិ ក្នុងឃុំព្រៃចារ ស្រុកជើងព្រៃ សរុប ៤៧២៩គ្រួសារ ដែលបានពឹងអាស្រ័យលើអាងតំបន់នេះ ម្យ៉ាងវិញទៀត ខ្នងទំនប់អាងទឹកតំបន់ ជាមធ្យោបាយធ្វើដំណើរភ្ជាប់ពីមូលដ្ឋាន មកទីប្រជុំជន និងដឹកជញ្ជូនកសិផល កសិកម្ម យកទៅលក់នៅទីផ្សារ បានយ៉ាងល្អប្រសើរ ផងដែរ ។
លោកខេង ម៉េងឈុន អភិបាលស្រុកព្រៃឈរ បានឱ្យដឹងថា ទំនប់អណ្តូងអាង ស្ថិតក្នុងឃុំបារាយណ៍ ស្រុកព្រៃឈរ ខេត្តកំពង់ចាម ប្រព័ន្ធធារាសាស្ត្រនេះមានប្រវែង ១.០០០ម៉ែត្រ ប្រឡាយមេប្រវែង ៧១១ម៉ែត្រ ប្រឡាយរងប្រវែង ៤.០៧៥ម៉ែត្រ សំណង់ទ្វារទឹក ៣កន្លែង និងសំណង់លូចែកចាយទឹក ២កន្លែង ដែលផ្ទៃអាងសរុប ១៦០.៤១ហិកតា អាចស្រោចស្រពផ្ទៃដីស្រែបាន ៨០០ហិកតា និងប្រើប្រាស់បាន ១១ភូមិ និងអ្នកទទួលផលមានចំនួន ៣៨៨៥គ្រួសារ ៕
