សៀមរាប នៅរដ្ឋបាលសាលាខេត្តសៀមរាបនាព្រឹកថ្ងៃទី០៩ខែតុលាឆ្នាំ២០១៤នេះ មានធ្វើកិច្ចប្រជុំគណៈកម្មការរៀបចំព្រះរាជពិធីបុណ្យអ៊ុំទូកបណ្តែតប្រទីបអកអំបុកសំពះព្រះខែ ក្រោមការដឹកនាំរបសលោកឃឹមប៊ុនសុងអភិបាលនៃគណៈអភិបាលខេត្តសៀមរាប ដោយមានការចូលរួមពីសំណាក់ឯកឧត្តម លោកជំទាវ គណៈអភិបាលខេត្តនិងអស់លោក លោកស្រីជាថ្នាក់ដឹកនាំមន្ទីរ អង្គភាព អាជ្ញាធរក្រុង ស្រុក ផងដែរ ។
មានប្រសាសន៍បើកកិច្ចប្រជុំនោះ លោក ឃឹម ប៊ុនសុង ក៏បានលើកឡើង ពីខ្លឹមសារនៃកិច្ចប្រជុំនាពេលនោះ ដោយបានបញ្ជាក់អំពីការរៀបចំប្រារព្ធធ្វើពិធីអបអរសាទរព្រះរាជពិធីបុណ្យអ៊ុំទូក បណ្តែតប្រទីប អកអំបុក សំពះព្រះខែ ដែលនឹងប្រព្រឹត្តធ្វើឡើងនតាមបណ្តោយដងស្ទឹងប្រវត្តិសាស្ត្រសៀមរាប ដោយមានរៀបចំនូវកម្មវិធីកម្សាន្តផ្សេងៗ ជូន ដល់បងប្អូនប្រជាពលរដ្ឋទាំងក្នុង និង ក្រៅខេត្ត ព្រមទាំងភ្ញៀវទេសចរណ៍ បានទស្សនាកម្សាន្ត អំពីវប្បធម៌ ប្រពៃណី របស់ប្រជាពលរដ្ឋខែ្មរយើង ដែលមានរយៈពេល០២ថ្ងៃ ចាប់ពីថ្ងៃទី ០៥ និងទី០៦ ខែវិច្ឆិកា ឆ្នាំ២០១៤ ។
ឯកឧត្តមក៏បានឲ្យដឹងផងដែរថា ការរៀបចំព្រះរាជពិធីបុណ្យអ៊ុំទូក បណ្តែតប្រទីប អកអំបុក សំពះព្រះខែនេះ គឺធ្វើឡើងដើម្បីរំលឹក និង គោរពដល់វីរៈភាពនៃបុព្វបុរសទាហានជើង ទឹកជំនាន់ដើម ដែលបានពលីជិវិត ក្នុងការធ្វើសឹកសង្គ្រាមតាមផ្លូវទឹកក្នុងការកម្ចាត់ពួកសត្រូវឈ្លានពានហើយទទួល បានជ័យជំនះជូនជាតិមាតុភូមិអង្គរនៃយើង ។
លោក ឃឹម ប៊ុនសុង ក៏បានលើកឡើងពីការអាក់ខាន មិនបានធ្វើពិធីរៀបចំព្រះរាជពិធីបុណ្យអ៊ុំទូក បណ្តែតប្រទីប អកអំបុក សំពះព្រះខែរយៈពេល០៣ឆ្នាំមកនេះ ដោយប្រទេសជាតិយើងជួបរងនូវគ្រោះធម្មជាតិ និង ការយាងចូលទីវង្គត់របស់ព្រះករុណា ព្រះរតនកោដ្ឋ នរត្តម សីហនុ ។ ក្នុងនោះដែរឯកឧត្តមក៏បាន សូមឲ្យគ្រប់អនុគណៈកម្មការនីមួយៗ រាយការណ៍ អំពីសកម្មភាព របស់អនុគណៈកម្មការអនុវត្តបានកន្លងមក ។
បន្ទាប់ពីសេចក្តីរាយការណ៍របស់អនុគណៈកម្មការនីមួយៗ អំពីសកម្មភាព លទ្ធផលដែលអនុវត្តបាន ។ ក្នុងនោះឯកឧត្តមប្រធានអនុគណៈកម្មការបច្ចេកទេសទូក បានឲ្យដឹងថា ទូកដែលបានសុំដាក់ពាក្យចូលមកប្រកួត មាន ចំនួន ២៦ទូក ដែលក្នុង១ទូកមានចំណុះ ២២នាក់ ក្នុងនោះមានទូកស្រី ០៦ទូក ព្រមទាំងមានប្រទីប មកពីបណ្តាមន្ទីរ អង្គភាព និង ក្រុមហ៊ុន មានចំនួន១៤ ប្រទីបផងដែរ ។
ក្នុងកិច្ចប្រជុំនោះ ក៏បានពិភាក្សា ដោយផ្តោតយ៉ាងសំខាន់ ទៅ លើការងារសន្តិសុខ សណ្តាប់ធ្នាប់សាធារណៈ អនាម័យ សុខភាព បរិស្ថាន និង អគ្គិសនី ហើយជាងនេះទៅទៀតលើ ការស្នាក់នៅរបស់ក្រុមកីឡាករ កីឡាការីទៀតផង ។ ក្នុងព្រះរាជពិធីបុណ្យអ៊ុំទូកនេះ គណៈកម្មការបុណ្យជាតិថ្នាក់ខេត្ត ក៏បានធ្វើការរៀបចំបោះពុម្ពអាវ កីឡាករជាលក្ខណៈខ្មែរ ដោយសហភាពសហព័ន្ធយុវជនកម្ពុជាខេត្ត ព្រមទាំងមានការ រៀបចំស្តង់សម្រាប់បងប្អូនអាជីវករដែលមានបំណងចូលមកលក់ដូរនៅក្នុងឱកាសបុណ្យអ៊ុំទូក ដោយបានបន្តពីថ្ងៃបញ្ចប់អ៊ុំទូកទៅដល់ថ្ងៃទី០៩វិច្ឆិកាឆ្នាំ២០១៤និង មានការសម្តែងតន្ត្រីជូនដល់ភ្ញៀវជាតិអន្តរជាតិកម្សាន្តផងដែរ ។
បន្ទាប់ពីអនុគណៈកម្មការ និង អាជ្ញាធរស្រុក មន្ទីរ អង្គភាពបានលើកនូវរាល់ចំណុចមួយចំនួន ក្នុងការចូលរួមក្នុងព្រះរាជពិធីបុណ្យអ៊ុំទូកដោយផ្តោតទៅលើបញ្ហាបរិស្ថានភ្លើងបំភ្លឺនិង បង្គន់អនាម័យចល័តក្នុងឱកាសពិធីបុណ្យ ។ មានប្រសាសន៍បូកសរុបនោះដែរ លោក ឃឹម ប៊ុនសុង ក៏បានធ្វើការណែនាំមួយចំនួនដល់ថ្នាក់ដឹកនាំមន្ទីរ អង្គភាព អាជ្ញាធរក្រុង ស្រុក ដែលមានទូកចូលរួម ប្រកួតក្នុងពិធីបុណ្យអ៊ុំទូកក្នុងគោលដៅលើកស្ទួយវប្បធម៌ទំនៀបទំលាប់ប្រពៃណីជាតិ ហើយក៏ជាការផ្សព្វផ្សាយទាក់ទាញអារម្មណ៍ដល់ ភ្ញៀវ
ទេសចរណ៍ជាតិ អន្តរជាតិ ចូលមកទស្សនាកម្សាន្ត នូវសម្បត្តិវប្បធម៌ខ្មែរយើង ដែលសម្បូរទៅដោយប្រាង្គប្រាសាទរមណីដ្ឋានធម្មជាតិ នៅលើទឹកដីប្រវត្តិសាស្ត្រសៀមរាប ហើយបានទស្សនាវដី្តទេសចរណ៍របស់អាមេរិក ដែលជាក្រុងជាប់ លំដាប់ថ្នាក់ទី២ ជាទីក្រុងល្អបំផុតសម្រាប់ការមក ទស្សនារបស់ភ្ញៀវទេសចរណ៍នៅក្នុងតំបន់អាស៊ី ក្នុងចំណោម ក្រុង១០ ដែលបានជ្រើសរើសនៅឆ្នាំ២០១៤ និង នៅលើពិភពលោកជាប់លំដាប់លេខ៤ផងដែរ។
ម្យ៉ាងទៀតក៏ត្រូវធ្វើការយកចិត្តទុកដាក់ទៅលើការងារ សន្តិសុខសណ្តាប់ធ្នាប់សាធារណៈ ក្នុងការបម្រើនូវជូនដល់ប្រជាពលរដ្ឋ ទទួលបានការសប្បាយក្នុងឱកាសបុណ្យអ៊ុំទូក នៅខេត្តសៀមរាប។លោកឃឹមប៊ុនសុង បានសង្កត់ធ្ងន់ទៅលើសម្លៀកបំពាក់របស់កីឡាករអ៊ុំទូកឲ្យមានលក្ខណៈជាប្រពៃណីខ្មែរ ដែលមានសហភាពសហព័ន្ធយុវជនកម្ពុជាខេត្តជាអ្នកផលិត ដោយមិនឲ្យប្រើប្រាស់នូវសម្លៀកបំពាក់ធ្វើការផ្សព្វផ្សាយពាណិជ្ជកម្មឡើយ ស្រប
តាមការណែនាំរបស់គណៈកម្មាធិការបុណ្យជាតិ និង ក្រោយការបញ្ចប់បុណ្យ ត្រូវយកចិត្តលើការសម្អាតអនាម័យ បរិស្ថាន ពិសេសចំពោះអគ្គិសនី ត្រូវបន្តបើកបំភ្លឺនៅតាមស្តង់ និង កន្លែងឆាកតន្ត្រី រហូតដល់ថ្ងៃទី០៩ វិច្ឆិកា ឆ្នាំ២០១៤ ព្រមទាំងសូមឲ្យបណ្តាមន្ទីរ អង្គភាពក៏ដូចក្រុមហ៊ុនដែលគ្មានទូកចូលរួមប្រកួតសូមជួយធ្វើការឧបត្ថម្ភ ដល់ទូកទាំងនោះ ក្នុងគោលដៅលើកស្ទួយវប្បធម៌ទំនៀបទំលាប់ប្រពៃណីជាតិហើយក៏ជាការចូលរួមក្នុងកិច្ចអភិវឌ្ឍន៍ លើវិស័យទេសចរណ៍នៅលើទឹកដីប្រវត្តិសាស្ត្រនេះ ៕
