ខេត្តរតនគិរីៈ ក្នុងគោលបំណងនាំមកនូវការគ្រប់គ្រងហានិភ័យគ្រោះមហន្តរាយ និងត្រៀមរៀបចំឆ្លើយតបទៅនឹងគ្រោះមហន្តរាយ និងលទ្ធភាពក្នុងការស្តារឡើងវិញនៅ។ នៅព្រឹកថ្ងៃទី១៣ ខែតុលា ឆ្នាំ២០១៤អាជ្ញាធរខេត្តរតនគិរី បានរៀបចំប្រារព្ធទិវាអាស៊ានស្តីពីការគ្រប់គ្រងគ្រោះមហន្តរាយ និងទិវាអន្តរជាតិកាត់បន្ថយគ្រោះមហន្តរាយនៅសាលមហោស្រពស្តេចតេជោហ៊ុន សែន ស្ថិតនៅបរិវេណមន្ទីរវប្បធម៌និងវិចិត្រសិល្បៈខេត្ត។ ពិធីនេះមានការអញ្ជើញចូលរួមជាគណៈអធិបតីពីសំណាក់ឯកឧត្តមមួង ប៉យ ប្រធានក្រុមប្រឹក្សាខេត្ត និងឯកឧត្តមថង សាវុន អភិបាលនៃគណៈអភិបាលខេត្ត។ លោក ផែន ប៊ុនធឿន តំណាងអង្គការPlan បានសម្តែងការចាប់អារម្មថា ការប្រារព្ធទិវាអាស៊ានស្តីពីការគ្រប់គ្រងគ្រោះមហន្តរាយ និងទិវាអន្តរជាតិកាត់បន្ថយគ្រោះមហន្តរាយក្រោមប្រធានបទ ការបោះជំហានរបស់សហគមន៍សម្រាប់ភាពធននឹងគ្រោះមហន្តរាយ គឺពិតជាឱកាសដ៏ល្អសម្រាបនាំមកនូវចំណេះដឹងសម្រាប់
ការប្តេជ្ញាចិត្តទាំងអស់គ្នា ក្នុងការគ្រប់គ្រងគ្រោះមហន្តរាយ ហើយទិវានេះបានបញ្ជាក់អោយឃើញពីកិច្ចសហការកម្លាំងសាមគ្គីភាព និងការឯកភាពគ្នាតាមរយៈនៃការចូលរួមរបស់ថ្នាក់ដឹកនាំមន្ត្រីរាជការរបស់ស្ថាប័នរដ្ឋនិងអង្គការដៃគូអភិវឌ្ឍន៍នានា ដើម្បីរួមគ្នាគិតគូរការត្រៀមបង្ការបង្កើតការយល់ដឹងដល់សហគមន៍លើការគ្រប់គ្រងគ្រោះមហន្តរាយ ដែលអាចនឹងកើតមានក្នុងទឹកដីខេត្តរតនគិរី។
ក្នុងសារលិខិតរបស់ឯកឧត្តមញឹម វណ្ណដា ទេសរដ្ឋមន្ត្រីទទួលបន្ទុកបេសកម្មពិសេស អនុប្រធានទី១គណកម្មាធិការ ជាតិគ្រប់គ្រងគ្រោះមហន្តរាយ ដែអានដោយឯកឧត្តមថង សាវុន បានសង្កត់ធ្ងន់ថា ហានិភ័យគ្រោះមហន្តរាយកំពុងតែកើតមានឡើងនៅទូរទាំងពិភពលោក កម្រាមកំហែងដល់ការអភិវឌ្ឍន៍ និងជីវភាពរស់នៅរបស់ប្រជាពលរដ្ឋដែលងាយរងគ្រោះ។ ដោយឡែកនៅកម្ពុជាស្ទើរតែរៀងរាល់ឆ្នាំតែងកើតមានគ្រោះមហន្តរាយដោយ
ធម្មជាតិ និងមនុស្សដូចជាទឹកជំនន់ រាំងស្ងួត ខ្យលកន្ទ្រាក់ រន្ទះបាញ់ ជម្ងឺផ្តាសាយបក្សី ជម្ងឺឆ្លងផ្សេងៗ។ សារលិខិតបានលើកឡើងថាប្រធានបទការបោះជំហានរបស់សហគមន៍សម្រាប់ភាពធន់ទៅនឹងគ្រោះមហន្តរាយ គឺទាមទារការអនុវត្តវិធានការកាត់បន្ថយហានិភ័យគ្រោះមហន្តរាយរួមគ្នារក្សាអោយរឹងមាំប្រកបដោយឆន្ទៈ ប្រុងប្រយ័ត្នទប់ស្កាត់ទៅនឹងកម្លាំង
បំផ្លិចបំផ្លាញពីគ្រោះមហន្តរាយក្នុងន័យនេះ ការបោះជំហានរបស់សហគមន៍គឺជាចំណុចចាប់ផ្តើមការកសាងភាពធន់របស់សហគមន៍ទៅនឹងគ្រោះមហន្តរាយ។
ចុងបញ្ចប់អង្គពិធីក៏បានរៀបចំដង្ហែក្បួនតាមផ្លូវជុំវិញរង្វង់មូល និងតាមផ្លូវសំខាន់ៗក្នុងក្រុងបានលុង ដើម្បីជាការពញាក់អារម្មដល់មហាជនទូរទៅចូលរួមបង្ការគ្រោះមហន្តរាយទាំងអស់គ្នា៕
