សេង ណារិទ្ធ
ខេត្តកំពត: នៅព្រឹកថ្ងៃទី២៣ ខែតុលា ឆ្នាំ២០២៤នេះ ឯកឧត្តម ម៉ៅ ធនិន អភិបាលខេត្តកំពត បានអញ្ជើញចុះចែកវិញ្ញាបនបត្រសម្គាល់អចលនវត្ថុ ជូនប្រជាពលរដ្ឋ ក្នុងភូមិកន្សោមអក ឃុំបន្ទាយមាសខាងលិច និងប្រកាសបិទផ្សាយជាសាធារណ: នូវឯកសារនៃការវិនិច្ឆ័យ ភូមិហុងស៊ុយ ឃីបន្ទាយមាសខាងលិច ស្រុកបន្ទាយមាស
សម្រាប់ចុះបញ្ជីដីធ្លីមានលក្ខណ:ជាប្រព័ន្ធ។ដែលពិធីនេះបានរៀបចំឡើង ក្នុងបរិវេណវត្ត សិរីសោភ័ណ្ឌ ហៅវត្តព្រៃលើ ស្ថិតក្នុងភូមិព្រៃលើ ឃីបន្ទាយមាសខាងលិច ស្រុកបន្ទាយមាស ខេត្តកំពត។
ដោយអនុវត្តន៍តាមគោលនយោបាយរបស់រាជរដ្ឋាភិបាល និងកិច្ចចង្អុលបង្ហាញ របស់ប្រមុខរាជរដ្ឋាភិបាល ក៏ដូចជារដ្ឋមន្ត្រីក្រសួងដែនដី អាជ្ញាធរខេត្តកំពត ក្រោមកិច្ចសហការជាមួយមន្ទីរជំនាញ អាជ្ញាធរក្រុង-ស្រុកទាំង៩ក្នុងខេត្ត ដើម្បីពន្លឿនការចេញបណ្ណកម្មសិទ្ធិដីធ្លីជូនពលរដ្ឋក្នុងខេត្តឱ្យបានអស់ក្នុងឆ្នាំ២០២៥ខាងមុខ។ ការពន្លឿនចេញបណ្ណកម្មសិទ្ធិជូនពលរដ្ឋនេះគឺផ្នែកទៅលើបទបញ្ជាយ៉ាងម៉ឺងម៉ាត់របស់ប្រមុខរាជរដ្ឋាភិបាលដែលបានគិតគូរយកចិត្តទុកដាក់ចំពោះតម្រូវការរបស់ពលរដ្ឋ។
ថ្លែងក្នុងពិធីចែកបណ្ណកម្មសិទ្ធិជូនដល់ពលរដ្ឋក្នុងភូមិកន្សោមអកនេះ ឯកឧត្តម ម៉ៅ ធនិន អភិបាលខេត្តកំពតបានលើកឡើងថា គោលនយោបាយលើវិស័យដីធ្លីគឺជាកិច្ចចង្អុលការរបស់ប្រមុខរាជរដ្ឋាភិបាល ចាប់តាំងពីអាណត្តិចាស់ដែលមានសម្តេចតេជោ ហ៊ុន សែន រហូតបន្តមកដល់អាណត្តិថ្មីគឺសម្តេចធិបតី ហ៊ុន ម៉ាណែត ជានាយករដ្ឋមន្ត្រី គឺសម្តេចនៅតែមានកិច្ចចង្អុលការយ៉ាងម៉ឺងម៉ាត់មកគណៈកម្មការសូរិយោដីខេត្ត គណៈកម្មការដីរដ្ឋ មន្ទីរជំនាញ ដើម្បីធ្វើយ៉ាងណាពន្លឿនក្នុងការចេញបណ្ណកម្មសិទ្ធិដីធ្លីជូនប្រជាពលរដ្ឋអោយបានលឿន ឆាប់រហ័ស ដើម្បីយកទៅប្រើប្រាស់ទៅតាមតម្រូវការ។
ឯកឧត្តមអភិបាលខេត្តបានបន្តថា ក្នុងដំណាក់នេះ លោកនឹងពន្លឿនក្នុងការចេញបណ្ណកម្មសិទ្ធិដីធ្លីជូនពលរដ្ឋក្នុងខេត្តកំពតឱ្យបានគ្រប់ នៅក្នុងឆ្នាំ២០២៥ ដើម្បីឱ្យស្របទៅតាមបទបញ្ជាយ៉ាម៉ឺងម៉ាត់របស់រាជរដ្ឋាភិបាល ក្រោមកិច្ចចង្អុលការដោយផ្ទាល់ពីសំណាក់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ឯកឧត្តមអភិបាលខេត្តបានបន្ថែមថា ក្រោមការដឹកនាំប្រកបដោយគតិបណ្ឌិតរបស់សម្តេចធិបតី ហ៊ុន ម៉ាណែត សម្តេចតែងតែគិតគូរជានិច្ចពីតម្រូវការរបស់បងប្អូនប្រជាពលរដ្ឋនៅទូទាំងប្រទេស។
បើយោងតាមរបាយការណ៍របស់លោក ព្រាប សុផាត ប្រធានមន្ទីរស្តីទីនៃមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពត បានឱ្យដឹងដែរថា សម្រាប់ការចែកបណ្ណជូនពលរដ្ឋក្នុងភូមកន្សោមអក ឃុំបន្ទាយមាសខាងលិច ស្រុកបន្ទាយមាស នាពេលនេះ មានបណ្ណសរុបចំនួន ១,៧៧៩បណ្ណ។ដោយឡែក ការប្រកាសបិទផ្សាយជាសាធារណ: នូវឯកសារនៃការវិនិច្ឆ័យដីធ្លី នៅភូមិហុងស៊ុយ ឃុំបន្ទាយមាសខាងលិច មានសរុបចំនួន ១,៨៣២ ក្បាលដី៕ 
