ខេត្តរតនគិរី៖ រដ្ឋមន្ត្រីក្រសួងអភិវឌ្ឍន៍ជនបទ លោក ឆាយ ឫទ្ធិសែន បានដឹកនាំមន្ត្រីជំនាញ ថ្នាក់ដឹកនាំក្រសួង និងមន្រ្តីបច្ចេកទេស ដោយមានការរួមដំណើរពី លោក ញ៉ែម សំអឿន អភិបាលខេត្តរតនគិរី ព្រមទាំងអាជ្ញាធរដែនគ្រប់លំដាប់ថ្នាក់ នាថ្ងៃទី២៣ ខែតុលា ឆ្នាំ២០២៤ បានចុះពិនិត្យស្ថានភាពផ្លូវ ២ខ្សែ និងទីតាំងសាងសង់ស្ពាន១ នៅស្រុកកូនមុំ និងស្រុកលំផាត់ ខេត្តរតនគិរី។
រដ្ឋមន្ត្រីក្រសួងអភិវឌ្ឍន៍ជនបទ លោក ឆាយ ឫទ្ធិសែន មានប្រសាសន៍ឱ្យដឹងថា ការពិនិត្យផ្លូវទាំង ២ខ្សែនោះ គឺ ខ្សែទី១៖ ឈ្មោះ កញ្ចាញ-ចាអុង-ហាត់ប៉ក (RK-3) គ្រោងសាងសង់ជាផ្លូវក្រាលកៅស៊ូ ២ជាន់ ប្រវែង ៣៨,៦០គីឡូម៉ែត្រ ក្នុងនោះ ប្រវែងក្រសួងបានដាក់បញ្ចូលក្នុងគម្រោងស្ដារបន្ទាន់របស់មន្ទីរ មានប្រវែង ៧គីឡូម៉ែត្រ ស្ថិតក្នុងឃុំត្រពាំងច្រេស ដល់ឃុំសេរីមង្គល ស្រុកកូនមុំ។ លោកថា ខ្សែផ្លូវនេះត្រូវបានក្រសួងដាក់ជួសជុល ជាផ្លូវល្បាយក្រួសប្រវែង ៧គីឡូម៉ែត្រ និងឱ្យមន្ទីអភិវឌ្ឍន៍ជនបទខេត្តរតនគិរី ធ្វើការជួសជុលលក្ខណៈបន្ទាន់ ជាផ្លូវល្បាយក្រួសប្រវែង ៣គីឡូម៉ែត្រ ជូនប្រជាពលរដ្ឋប្រើប្រាស់មុននឹងលើកកម្រិតផ្លូវនេះ ជាផ្លូវក្រាលកៅស៊ូ ២ជាន់ DBST ក្នុងក្របខណ្ឌគម្រោង NRCIP ។
លោករដ្ឋមន្ត្រីបានឱ្យដឹងទៀតថា ផ្លូវខ្សែទី២៖ គឺជាគម្រោងស្ថាបនាផ្លូវដីល្បាយក្រួសប្រវែង ៩ គីឡូម៉ែត្រ និងបានពិនិត្យការដ្ឋានសាងសង់ទំនប់បង្ហៀរ ១កន្លែងមានប្រវែង ៦០ម៉ែត្រ ទទឹង ៧ម៉ែត្រ ស្ថិតក្នុងឃុំបាតាង ស្រុកលំផាត់ ស្ថិតក្នុងគម្រោងទឹកជំនន់។
បន្ទាប់មក លោករដ្ឋមន្រ្ដី ឆាយ ឫទ្ធិសែន រួមដំណើរដោយលោក ញ៉ែម សំអឿន និងនាយឧត្ដមសេនីយ៍ ខេង សុមេធ អគ្គស្នងការរងនគរបាលជាតិ និងជាមេបញ្ជាការកងវិស្វកម្មតេជោ ហ៊ុន សែន សៀមរាប ព្រមទាំងប្រតិភូ បានចុះពិនិត្យទីតាំងសាងសង់ស្ពាន ១កន្លែង ឆ្លងកាត់អូរទទឹង មានប្រវែង ៣៦ម៉ែត្រ ស្ថិតនៅភូមិសាមខា ឃុំជ័យឧត្តម ស្រុកលំផាត់ ។ បច្ចុប្បន្ន ទីតាំងនេះមិនទាន់មានស្ពានឆ្លងកាត់នៅឡើយ ដោយប្រជាពលរដ្ឋត្រូវប្រើប្រាស់ទូកសម្រាប់(ចម្លង)ឆ្លងទៅឆ្លងមក។
ស្របពេលជាមួយគ្នានោះ លោករដ្ឋមន្ត្រីក្រសួងអភិវឌ្ឍន៍ជនបទ បានណែនាំឱ្យមន្ទីអភិវឌ្ឍន៍ជនបទខេត្តរតនគិរី ពិនិត្យលទ្ធភាពក្នុងការសាងសង់ស្ពានដែក (បាឡេ) ជាបណ្តោះអាសន្ន សម្រាប់សម្រួលដល់ការធ្វើដំណើរបស់ប្រជាពលរដ្ឋទៅមក ដើម្បីឆ្លើយតបតាមសំណូមពរ និងសេចក្ដីត្រូវការជាចាំបាច់របស់អាជ្ញាធរ ក៏ដូចជាប្រជាពលរដ្ឋនៅតំបន់នោះ៕ដោយ៖ឡុង សំបូរ
