កំពង់ចាម: ឯកឧត្តម អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មាធិការសាខា កាកបាទក្រហមខេត្ត រួមនឹងព្រះមន្ត្រីសង្ឃ នាព្រឹកថ្ងៃទី៣០ ខែឧសភា ឆ្នាំ២០២៥នេះ បានអញ្ជើញប្រគល់ផ្ទះមនុស្សធម៌ទី២៣ ជូនទុរគតជន ១គ្រួសារ នៅភូមិជើងដឹក ឃុំប្រាំយ៉ាម ស្រុកស្រីសន្ធរ និងនាំយកអំណោយសម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ចែកជូនប្រជាពលរដ្ឋងាយរងគ្រោះ រួមមាន ចាស់ជរាគ្មានទីពឹង ជនមានពិការភាព មានជំងឺប្រចាំកាយ ទ័លលំបាក សរុប ៨០គ្រួសារ មកពី ៥៦ភូមិ និង ១៤ឃុំ នៅក្នុងស្រុកស្រីសន្ធរ ។
ក្នុងឱកាសនោះដែរ ឯកឧត្ដម អ៊ុន ចាន់ដា បានបានថ្លែងថា អ្វីៗដែលយើងមានសព្វថ្ងៃនេះ គឺបានមកដោយសារប្រទេសយើង មានសុខសន្តិភាព ព្រោះសន្តិភាពមានតម្លៃធំធេងណាស់ សម្រាប់ប្រជាជនកម្ពុជា ផ្ទុយទៅវិញបើគ្មានសន្តិភាព ពិតជាគ្មានការអភិវឌ្ឍ គ្មានការវិនិយោគ ហើយប្រជាពលរដ្ឋពិតជារស់នៅ ពុំបានសុខសាន្ត នោះឡើយ ។
ឯកឧត្តមប្រធានគណ:កម្មាធិការសាខា បានសំណូមពរដល់បងប្អូនប្រជាពលរដ្ឋទាំងអស់ ពិសេសលោកយាយ លោកតាចាស់ៗ ក្នុងស្ថានភាពអាកាសធាតុ មានការប្រែប្រួល សូមយកចិត្តទុកដាក់ ក្នុងការថែទាំសុខភាព សុវត្ថិភាពផ្ទាល់ខ្លួន ហើយកត្តាដែលសំខាន់នោះ គឺត្រូវប្រកាន់ខ្ជាប់នូវអនាម័យ រស់នៅស្អាត ហូបស្អាត និងត្រូវសម្រាន្តក្នុងមុង ហើយសូមជូនពរលោកយាយ លោកតាបងប្អូនទាំងអស់ មានសុខភាពរឹងមាំ អាយុយឺនយូរ បន្តរស់នៅក្រោមដំបូលនៃសុខសន្តិភាព និងការអភិវឌ្ឍន៍ផងដែរ ។
គួរបញ្ជាក់ថា អំណោយដែលត្រូវប្រគល់ជូនគ្រួសារ ឈ្មោះ ប៊ូ ស្រឿន សម្រាប់សង្កត់ផ្ទះថ្មីរួមមាន រួមមាន អង្ករ ៥០គក្រ ត្រីខ ២០កំប៉ុង ទឹកត្រី ១២ដប ទឹកស៊ីអ៊ីវ ១២ដប មី ២កេស ឃីត ២សម្រាប់ អាវយឺត ១២ សាប៊ូ ១៦ដុំ សម្ភារផ្ទះបាយ និងថវិកា ២០ម៉ឺនរៀល ។ ចំពោះលោកតា លោកយាយ ដែលចូលរួមជាសាក្សី ចំនួន ១១នាក់ ក៏បានទទួលអំណោយមួយចំនួន និងថវិកា ២ម៉ឺនរៀល ។
ដោយឡែកលោកតា លោកយាយ បងប្អូន ជនងាយរងគ្រោះ ទាំង ៨០គ្រួសារ ក្នុង ១គ្រួសារ ទទួលបាន អង្ករ ២៥គ.ក្រ ទឹកត្រី ១យួរ មី ១កេស ទឹកស៊ីអ៊ីវ ១យួរ ត្រីខ ១០ កំប៉ុង ឃីត ១កញ្ចប់ និង ថវិកា ៥ម៉ឺនរៀលផងដែរ ៕
