ខេត្តកំពង់ធំ៖ នៅសាលប្រជុំសាលាខេត្តកំពង់ធំ បានបើកកិច្ចប្រជុំបូកសរុបលទ្ធផលការងារ របស់គណៈបញ្ជាការឯកភាពរដ្ឋបាលខេត្ត ប្រចាំខែសីហា និងដាក់ចេញនៅទិសដៅអនុវត្តបន្ត ដែលកិច្ចប្រជុំនេះ ស្ថិតក្រោមអធិបតីភាពឯកឧត្តម នួន ផារ័ត្ន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ និងដោយមាន
ការចូលរួមពីថ្នាក់ដឹកនាំខេត្ត មន្ទីរ អង្គភាពជុំវិញខេត្ត អាជ្ញាធរដែនដី ក្រុង ស្រុក ទាំង៩ និងស្ថាប័នពាក់ព័ន្ធមួយចំនួនបានចូលរួមផងដែរ នៅព្រឹកថ្ងៃទី៨ ខែកញ្ញា ឆ្នាំ២០២៥ ។
ឧត្តមសេនីយ៍ត្រី ពេជ្រ ថាល់ ប្រធានក្រុមលេខាធិការដ្ឋានគណៈបញ្ជាការឯកភាពរដ្ឋបាលខេត្ត បានឡើងរាយការណ៍អំពីសកម្មភាពការងារ និងលទ្ធផលសម្រេចបាន ក្នុងរយៈពេលមួយខែសីហាឆ្នាំ២០២៥កន្លងទៅ និងបានគូសបញ្ជាក់អំពីសកម្មភាពការងារមួយចំនួនទៀត ដែលគណៈបញ្ជាការឯកភាពរដ្ឋបាលខេត្តកំពង់ធំសម្រេចបាន ពិសេសការងាររក្សាសន្តិសុខ សណ្តាប់ធ្នាប់ និងការបង្ក្រាបបទល្មើសធនធានធម្មជាតិ នៅក្នុងខេត្តកំពង់ធំ ទទួលបានលទ្ធផលល្អ ។
ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានអចិន្ត្រៃយ៍នៃគណៈកម្មការ ការពារ ទប់ស្កាត់ និងបង្ក្រាបទល្មើសធនធានធម្មជាតិខេត្តកំពង់ធំ បានឡើងធ្វើបទអន្តរាគមន៍ អំពីលទ្ធផលសកម្មភាពការងារ ការពារ ទប់ស្កាត់ និងបង្ក្រាបបទល្មើសធនធានធម្មជាតិ ដែលគណៈបញ្ជាការឯកភាពរដ្ឋបាលខេត្តកំពង់ធំសម្រេចបាន ។ ក្នុងនោះបានគូសបញ្ជាក់អំពីលទ្ធផលនៃការ ការពារ ទប់ស្កាត់ និងបង្ក្រាប ការកាប់ទន្ទ្រានព្រៃឈើយកដីរដ្ឋធ្វើជាកម្មសិទ្ធិ គឺបានទប់ស្កាត់បានស្ទើរទាំងស្រុង ។ ដោយក្នុងរយៈពេលជាងមួយឆ្នាំកន្លងមកនេះ កងកម្លាំងចម្រុះបានរកឃើញផ្ទៃដីដែលជនល្មើសលួចកាប់ទន្ទ្រាន នាពេលកន្លងទៅ ហើយបានដកហូតយកមកគ្រប់គ្រងជាសម្បត្តិរដ្ឋបានជាង ៤,០០០ហិតា ។ ជាមួយនោះដែរ កងកម្លំាងនៃបញ្ជាការបញ្ជាការដ្ឋានតំបន់ប្រតិបត្តិការសឹករងកំពង់ធំ រួមជាមួយអាជ្ញាធរដែនដី និងកងកម្លាំងប្រដាប់អាវុធទាំងបី បានដាំស្ដារព្រៃឈើឡើងវិញ បានចំនួនជាង ៥៣,០០០ដើមផងដែរ ។
ឧត្តមសេនីយ៍ទោ សោម ស៊ុន ក៏បានគូសបញ្ជាក់អំពីលទ្ធផលនៃការបង្ក្រាបទល្មើសនេសាទ ក្នុងរយៈពេល ៨ខែកន្លងមក ដែលកងកម្លាំងចម្រុះ បានកាប់បំផ្លាញរបាំងស្បៃអួន និងរបាំស្បៃមុង ដែលជាឧបករណ៍នេសាទល្មើសច្បាប់ បានចំនួនជាង ១៩០គីឡូម៉ែត្រ និងបានចាក់លែងកូនលៀសដែលជនល្មេីសលួចនេសាទខុសច្បាប់ ប្រមាណជាង ១៥តោន ចូលទៅក្នុងបឹងទន្លេសាបវិញ ។ ក្រៅពីនោះទៀត បានរឹបអូសបំផ្លាញចោលឧបករណ៍នេសាទល្មើសច្បាប់មួយចំនួនទៀតផងដែរ ។
ឯកឧត្តម នួន ផារ័ត្ន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ បានថ្លែងនូវការកោតសរសើរ ចំពោះកងកម្លាំងចម្រុះ ការពារ ទប់ស្កាត់ និងបង្ក្រាបបទល្មើសធនធានធម្មជាតិ ដែលកន្លងមកនេះ ឧត្តមសេនីយ៍ទោ សោម ស៊ុន ដែលជាអនុប្រធានអចិន្ត្រៃយ៍ បានខិតខំប្រឹងប្រែងដឹកនាំបំពេញភារកិច្ចនេះទទួលបានជោគជ័យគួរជាទីមោទនៈ។
ឯកឧត្តម នួន ផារ័ត្ន បានប្រគល់ភារកិច្ចសំខាន់ៗមួយចំនួនបន្ថែមទៀតជូនដល់គណៈបញ្ជាការឯកភាពរដ្ឋបាល ក្រុង ស្រុក ត្រូវបន្តរួមគ្នាថែរក្សាសុខសន្តិភាព និងការអនុវត្តនូវគោលនយោបាយភូមិ ឃុំ មានសុវត្ថិភាព របស់រាជរដ្ឋាភិបាលឲ្យមានប្រសិទ្ធភាព ព្រមទាំងការសម្របសម្រួលរកការងារជូនពលករចំណាត់ស្រុក ដែលវិលត្រឡប់មកពីប្រទេសថៃវិញ ឱ្យបងប្អូនមានការងារធ្វើ និងទទួលបានប្រាក់កម្រៃសមរម្យសម្រាប់ចិញ្ចឹមជីវិត រួមចំណែកក្នុងការកសាងអភិវឌ្ឍន៍ប្រទេសជាតិយើង ឲ្យមានការរីកចម្រើនរុងរឿងបន្ថែមទៀត ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ៕
