កំពង់ស្ពឺ= នៅព្រឹកថ្ងៃទី៣១ខែវិច្ចិកាឆ្នាំ២០១៤លោកវិរសេនីយ៏ត្រី ឃុត សុផល អធិការនគរបាលស្រុកសំរោងទងនិងក្រុមការងារបាននាំយកអត្តសញ្ញាណបណ្ណចំនួន១៥១៨សន្លឹកស្រី៨០៣នាក់យកទៅចែកជូនប្រជាពលរដ្ឋមកពី៨ឃុំក្នុងស្រុកសំរោងទងម្រាប់ប្រើប្រាស់និងសម្លាល់ជាពលរដ្ឋ
ពេញលេញស្របច្បាប់និងអាចប្រើការការងារសំខាន់ៗបានគ្រប់យ៉ាង។លោកឃុត សុផលអធិការ ស្រុកបានលើកឡើងឲ្យពលរដ្ឋបានដឹងថា ការដែលតម្រូវឲ្យពលរដ្ឋម្នាក់ៗ ត្រូវធ្វើអត្តសញ្ញាណប័ណ្ណនេះ គឺដើម្បីកំណត់សម្គាល់អំពីអត្តសញ្ញាណរបស់មនុស្ស ឬបុគ្គលណាម្នាក់ ឬដើម្បីដឹងថា នរណា ជានរណា ដើម្បីចៀសវាងការច្រឡំគ្នា។ ឧទាហរណ៍ថា មានមនុស្សឈ្មោះ «ក» ប៉ុន្តែ ឈ្មោះ «ក» នោះវាមានច្រើន។ ដូច្នេះគេត្រូវមើលពីអាយុ និងថ្ងៃខែឆ្នាំកំណើតរបស់ពួកគេដូចគ្នាឬអត់? បើថ្ងៃខែឆ្នាំកំណើតពួកគេដូចគ្នា នោះគេត្រូវពិនិត្យពីឈ្មោះ ឪពុកម្តាយ ឬយាយតានិងទីលំនៅរបស់ពួកគេទៀត។
ដូច្នេះ អត្តសញ្ញាណប័ណ្ណ គឺជាការសម្គាល់អំពីមនុស្ស ឬបុគ្គលម្នាក់ៗ ដែលចាំបាច់ណាស់ មនុស្សម្នាក់ៗ ត្រូវតែមាន (ត្រូវតែធ្វើ) សម្រាប់ប្រើប្រាស់ជាប្រចាំថ្ងៃ។លោកអធិការ បន្តទៀតថា តាមច្បាប់កម្ពុជា ពលរដ្ឋខ្មែរប្រុស ឬ ស្រីគ្រប់ៗរូបដែលមានអាយុចាប់ពី ១៦ ឆ្នាំឡើងទៅ គឺមានសិទ្ធិធ្វើអត្តសញ្ញាណប័ណ្ណបាន។ ដើម្បីទទួលបានអត្តសញ្ញាណប័ណ្ណ ចំពោះពលរដ្ឋខ្មែរ យើងគឺពួកគេត្រូវមានសំបុត្រកំណើត ឬ សៀវភៅគ្រួសារ លិខិត ឬឯកសារបញ្ជាក់មានសុពលភាព ដែលចេញដោយមេភូមិ-អាជ្ញាធរឃុំ/សង្កាត់ ដែលពួកគេបានស្នាក់ ឬរស់នៅ។ ចំណែកឯជនបរទេសវិញ លក្ខខណ្ឌចាំបាច់ គឺត្រូវមានព្រះរាជក្រឹត្យ ដែលចេញដោយព្រះមហាក្សត្រ និងត្រូវធ្វើនៅតាមសមត្ថកិច្ចនគរបាលនៅក្នុងតំបន់ដែលពួកគេស្នាក់ នៅនោះ។
លោក ឃុត សុផល អធិការបញ្ជាក់ ថា ក្រៅអំពីអត្តសញ្ញាណប័ណ្ណ ពលរដ្ឋត្រូវមានឯកសារសំខាន់ៗចាំបាច់សម្រាប់ប្រើប្រាស់ប្រចាំថ្ងៃរបស់ប្រជាពលរដ្ឋ កម្ពុជា សព្វថ្ងៃនេះរួមមាន សៀវភៅគ្រួសារ លិខិតអាពាហ៍ពិពាហ៍ លិខិតបញ្ជាក់ការស្នាក់នៅ។ល។ ដែលចេញដោយអាជ្ញាធរ ភូមិ-ឃុំ ឬសង្កាត់។ ដូច្នេះ ឯកសារទាំងនេះ មានសារៈសំខាន់ណាស់សម្រាប់ប្រជាពលរដ្ឋកម្ពុជាយើង ប្រើប្រាស់ប្រចាំថ្ងៃមិនត្រូវឲ្យបាត់ឡើយ។
លោកបញ្ជាក់ថា ថ្មីៗនេះ រាជរដ្ឋាភិបាល បានសម្រេចបន្តពន្យារសុពលភាពចំពោះអត្តសញ្ញាណប័ណ្ណរបស់ពលរដ្ឋ ដែលអស់សុពលភាពងាយស្រួលប្រើប្រាស់បន្ត។ បើតាមផ្លូវច្បាប់ អត្តសញ្ញាណប័ណ្ណដែលអស់សុពលភាព និងដែលត្រូវបានប្រកាសបន្តសុពលភាពនេះ គឺនៅមានតម្លៃ ជាធម្មតារហូតដល់រាជរដ្ឋាភិបាលប្រកាសឈប់ទទួលស្គាល់ និងប្រកាសឲ្យធ្វើអត្តសញ្ញាណប័ណ្ណថ្មីជំនួសដូចនេះពលរដ្ឋមិនត្រូវបារម្មណ៏ហួសពីនេះទេ៕
