ប៉ោយប៉ែត៖ ប្រជាពលករខ្មែរដែលបានធើ្វចំណាកស្រុកចូលទៅស្វែងរកការងារនៅក្នុងប្រទេសថៃនោះបានសំរុកវិលមកស្រុកកំណើតវិញតាមច្រកព្រំដែនអន្តរជាតិ និងច្រករបៀងមួយចំនួនក្នុងភូមិសាស្ត្រតំបន់ប៉ោយប៉ែតច្រើនខុសពីសព្វមួយដងនាប៉ុន្មានថ្ងៃចុងក្រោយនេះ ។
ពលករម្នាក់ក្នុងចំណោមពលករទាំងនោះបានឲ្យដឹងថា៖រូបគេមានស្រុកកំណើតនៅឯខេត្តស្វាយរៀង ហើយបានចូលទៅធើ្វការនៅក្នុងប្រទេសថៃអស់រយៈពេលជាង១ឆ្នាំមកហើយដោយការនឹកអាល័យស្រុកកំណើតខ្លាំងពេករូបគេក៏បានវិលមកលេងស្រុកវិញមុនថ្ងៃចូលឆ្នាំប្រពៃណីជាតិខ្មែរនេះ។
ពលកររូបនោះបានបន្តថា៖ការងារដែលគាត់បានធើ្វនៅក្នុងប្រទេសថៃគឺកម្មករសំណង់ប៉ុន្តែទទួលបានកំរ៉ៃខ្ពស់ជាងការងារនៅក្នុងស្រុកខ្មែរ ជាងនេះទៅទៀតប្រទេសថៃជាប្រទេសមួយដែលសំបូរការងារធើ្វដូច្នេះហើយបានជាសព្វថ្ងៃនេះពលករខ្មែរជាច្រើននាំគ្នាសំរុកទៅប្រទេសថៃជិតអស់ពីស្រុកខ្មែរហើយ ។
ចំណែកជាពលករខ្មែរម្នាក់ទៀតដែលបានចូលទៅធើ្វការនៅក្នុងប្រទេសថៃដែរនោះ ក៏បានឲ្យដឹងថា៖រដូវកាលនេះគឺជារដូវកាលជិតខិតដល់ពេលចូលឆ្នាំប្រពៃណីយ៏ជាតិខ្មែរដូច្នេះពួកពលករដែលនៅក្នុងប្រទេសថៃនោះគឺម្នាក់ៗបានវិលមកស្រុកកំណើតវិញជាបណ្តើរៗ ដើម្បីបានជួបជុំបងប្អូននិងញាតិមិត្ត។
ពលករដដែលបានឲ្យដឹងទៀតថា៖អ្វីដែលត្រួយបារម្មណ៏នោះគឺមានក្រុមមេខ្យល់ដែលជាសាស្ត្រជាតិខ្មែរដូចគ្នា ចាំលក់សំបុត្រឡាននៅក្នុងផ្សាររោងក្លឿទឹកដីថៃឲ្យពលករខ្មែរមានតម្លៃខ្ពស់ហួសកំណត់ ពោលគឺសំបុត្រឡានក្រុង១តម្លៃដល់ទៅ៥០០បាតប្រាក់ថៃវាស្មើនិង០៦ម៉ឺនប្រាក់រៀលពីប៉ោយប៉ែតទៅភ្នំពេញ។កម្មកររូបនោះថា៖ រូបលោកបានចំណាយប្រាក់អស់៧០០បាតថ្លៃទិញសំបុត្រឡាន១និងថ្លៃមេខ្យល់គេដឹកឥវាន់របស់លោកមកដល់កម្ពុជាបើទោះជាថ្លៃក៏ដោយសម្រាប់ពលករដែលទើបមកពីប្រទេសថៃនៅតែទិញសំបុត្រឡានពីក្រុមមេខ្យល់ទាំងនោះដោយខានមិនបាន ។
កត្តារនេះលោកចង់ឲ្យអាជ្ញាធរនៅប៉ោយប៉ែតជាពិសេស់សមត្ថកិច្ចនៅតំបន់ក្រុងប៉ោយប៉ែតមេត្តាយកចិត្តទុកដាក់ជួយលុបបំបាត់ក្រុមមេខ្យល់ទាំងនោះ ដើម្បីការពារផលប្រយោជន៏ជូនប្រជាពលករខ្មែរដែលទើបមកពីប្រទេសថៃនេះផង ។
យ៉ាងណាក៏ដោយទាក់ទិននិងបញ្ហាខាងលើលោក អ៊ុំ សុផល អធិការនគរបាលក្រុងប៉ោយប៉ែតហាក់មិនបានមានចំណាត់ការលើក្រុមមេខ្យល់ដែលតែងតែបង្កផលអាក្រក់ដល់សង្គមជាតិនោះនៅឡើយទេ ។
ដោយឡែកលោកអនុសេនីយទោ សៅសារឿន នាយផ្នែកចរាចរណ៏ផ្លូវគោកនគរបាលក្រុងប៉ោយប៉ែត បានឲ្យដឹងនៅថ្ងៃទី១៧ខែមិនានេះថា៖ លោកនឹងសុំយោបល់ពីលោកអធិការដើម្បីទប់ស្កាត់រាល់ភាពអាណាធិបតេយ្យដែលនាំឲ្យប៉ះពាល់សណ្តាប់ធ្នាប់សាធារណៈជាងនេះទៅទៀតលោកនឹងរឹតបណ្តឹងឡានក្រុងដែលឡានដែលដឹកលើសចំណុះនៅថ្ងៃខាងមុខនេះ ។
ចំណែកប្រជាពលរដ្ឋមួយចំនួនក៏ចង់ឃើញសមត្ថកិច្ចមានចំណាត់ការលើរថយន្តក្រុងទាំងនោះផងដែរ ព្រោះរថយន្តទាំងនោះពិតជាបានបង្កភាពអាណាធិបតេយ្យចតគ្មានសណ្តាប់ធ្នាប់ ជាពិសេស់ចតនៅលើដងផ្លូវជាតិលេខ០៥តែម្តង សង្ឃឹមថាបើសមត្ថកិច្ចហានលូកដៃមែននោះពលរដ្ឋពិតជាបានសប្បាយចិត្តជាមិនខាន៕
