រាជធានីភ្នំពេញ ៖ បុរស២នាក់ជិះម៉ូតូគុប ពណ៌ទឹកប៊ិច មកដល់ស្ដុបក៏បានបត់ត្រូវរថយន្តព្រូសមួយគ្រឿង ពណ៌ទឹកប្រាក់បើកបុកចំពេញទំហឹងធ្វើអោយបុរសទាំង២នាក់ប៉ើងខ្ទាតចេញពីម៉ូតូ ហើយរថយន្តព្យាយាមបើករត់គេចទាំងម៉ូតូនៅពីក្រោមអូសជាង៥០០ម៉ែត្រក៏ត្រូវប្រជាពលរដ្ឋឃាត់ជាប់
កាលពីវេលាម៉ោង១០និង១៥នាទីយប់ថ្ងៃទី១៨ខែមីនាឆ្នាំ២០១៤ ស្ថិតនៅ សង្កាត់អូឡាំពិច ខណ្ឌចំការមន។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ គេបានឃើញរថយន្តព្រូស ពណ៌ទឹកប្រាក់ ពាក់ស្លាកលេខ ភ្នំពេញ 2X-7167 បើកបរដោយបុរសម្នាក់ ទិសដៅពីត្បូងទៅជើងតាមបណ្ដោយផ្លូវព្រះមុនីវង្ស មកដល់ស្តុប៣១០ ក៏បានបត់ទៅលិចស្រាប់តែមាន ម៉ូតូគុបមួយគ្រឿង ពណ៌ទឹកប៊ិច ពាក់ស្លាកលេខ ទ-4096 ភព១ ធ្វើដំណើរពីជើងទៅត្បូង ក៏បានបុកគ្នាពេញទំហឹងតែម្តងបណ្តាលឱ្យបុរស២នាក់ខ្ទាតចេញពីម៉ូតូរបួសធ្ងន់និងស្រាល ចំណែករថយន្តព្រូសព្យាយាមបើករត់គេចតាមផ្លូវ៣១០ ពីកើតទៅលិច ដោយអូសម៉ូតូជនរងគ្រោះពីក្រោមប្រហែល៥០០ម៉ែត្រ លុះមកដល់ចំណុច មជ្ឈមណ្ឌលថែរថយន្ត ម៉ូលី ឃែរ ក៏ត្រូវប្រជាពលរដ្ឋនិងសមត្ថកិច្ចឃាត់ជាប់ ហើយជនរងគ្រោះទាំង២នាក់ត្រូវបានរថយន្តសាមុយរបស់មន្ទីរពេទ្យឯកជនដឹកយកទៅសង្គ្រោះភ្លាមៗផងដែរ។
ក្រោយពេលកើតហេតុសមត្ថកិច្ចមូលដ្ឋានសហការជាមួយសមត្ថកិច្ចជំនាញចរាចរធ្វើការវាស់វែងនិងនាំអ្នកបើកបររួមទាំងរថយន្តបង្កយកទៅអធិការដ្ឋាននគរបាលខណ្ឌចំការមនរង់ចាំធ្វើការដោះស្រាយ៕
