បីថ្ងៃក្រោយចេញផ្សាយជាថ្មី ទស្សនាវដ្តី Charlie Hebdo បាតុកម្មប្រឆាំងទស្សនាវដ្តីបារាំងបានកើតមានជាបន្តបន្ទាប់ នៅប្រទេសកាន់សាសនាអ៊ីស្លាម ចាប់ផ្តើមដំបូងពីប៉ាគីស្ថាន រហូតដល់នីហ្សេ។ ទំព័រមុខដែលមានរូបព្យាការី មូហាម៉េដ ឈរសម្រក់ទឹកភ្នែក និងមានកាន់ក្រដាសសរសេរថា “ខ្ញុំជាCharlie” បានបង្កឲ្យមានកំហឹងពុះកញ្ជ្រោល នៅក្នុងចំណោមបាតុករកាន់សាសនាអ៊ីស្លាម។ កាលពីថ្ងៃសៅរ៍ ថ្ងៃទីពីរនៃបាតុកម្មហិង្សា វិហារគ្រឹស្តសាសនាបីកន្លែងត្រូវបាតុករដុតបំផ្លាញ។ ឈាង បុប្ផារាយការណ៍ព័ត៌មាននេះ។
អស់ពីបាតុកម្មគាំទ្រ សឹងជាសកល កាលពីសប្តាហ៍មុន ទស្សនាវដ្តីបារាំង Charlie Hebdo នៅចុងសប្តាហ៍នេះ បានទាក់ទាញបាតុកម្មប្រឆាំង និងរលករិះគន់ មិនថា ពីសំណាក់រដ្ឋាភិបាល ឬក្រុមអ្នកកាន់សាសនាអ៊ីស្លាម នៅអេហ្ស៊ីប សេណេហ្កាល់ ទុយនីស៊ី ម៉ារ៉ុក។ អាល់ហ្សេរី ដែលជាប្រទេសនិយាយភាសាបារាំង បានហាមឃាត់មិនឲ្យមានចរាចរណ៍លក់ ទស្សនាវដ្តី Charlie Hebdo ដែលនៅលើទំព័រមុខ គេឃើញ មានរូបមូហាម៉េដ ឈរសម្រក់ទឹកភ្នែក។
នៅប៉ាគីស្ថាន បន្ទាប់ពីចប់ពិធីសូត្រធម៌ កាលពីថ្ងៃសុក្រ បាតុកម្មហិង្សាប្រឆាំង Charlie Hebdo បានបណ្តាលឲ្យអ្នកថតរូបរបស់ទីភ្នាក់ងារព័ត៌មានបារាំងម្នាក់ រងរបួសធ្ងន់។ បាតុកម្មហិង្សាដូចគ្នានេះ បានផ្ទុះឡើងនៅប្រទេសនីហ្សេ។ ការប្រឈមមុខរវាងបាតុករ និងប៉ូលិសបានបណ្តាលឲ្យមានមនុស្សស្លាប់៤នាក់ ក្នុងនោះម្នាក់ជាប៉ូលិសនីហ្សេ និងរបួស ៤៥នាក់។
បាតុកម្មហិង្សាបានកើតជាថ្មី នៅថ្ងៃសៅរ៍ នៅរដ្ឋធានីរបស់នីហ្សេ ដោយបាតុករ ដែលមានកាន់កាំបិត ពូថៅ ព្រួញ បានចូលដុតបំផ្លាញវិហារគ្រឹស្តសាសនាចំនួន៣ បន្ទាប់ពីបានដុតឆេះ វិទ្យាស្ថានភាសាបារាំង និងក្រុមហ៊ុនដែលជាប្រយោជន៍របស់បារាំង កាលពីថ្ងៃសុក្រ។ ស្ថានទូតបារាំង នៅថ្ងៃសៅរ៍បានណែនាំឲ្យប្រជាជនរបស់ខ្លួន នៅប្រទេសនីហ្សេ ប្រយ័ត្នប្រយែង ស្ថិតនៅក្នុងផ្ទះ។
នៅក្នុងប្រតិកម្មរបស់លោក ទៅនឹងបាតុកម្មហិង្សាប្រឆាំងនឹង Charlie Hebdo លោកប្រធានាធិបតីបារាំង François Hollande បានបញ្ជាក់ជាថ្មី បារាំងនៅការពារសិទ្ធិសេរីភាពបញ្ចេញមតិ។
ទំព័រមុខរបស់ Charlie Hebdo ដ៏ចម្រូងចម្រាសបានធ្វើឲ្យមានប្រតិកម្មថ្កោលទោសផងដែរ ពីលោកប្រធានាធិបតីអាហ្វហ្កានីស្ថាន។ Ashraf Ghani ដែលបានចូលរួមផ្ទាល់ថ្កោលទោសអំពើភេរវកម្មប្រឆាំងនឹង Charlie Hebdo បានវាយតម្លៃថា ទំព័រមុខរបស់ Charlie Hebdo ដែលមានរូបមូហាម៉េដ ស្រក់ទឹកភ្នែក និងកាន់ក្រដាសសរសេរថា ខ្ញុំជាឆាលី នោះ គឺជាការជេរប្រមាថដល់សាសនាដទៃ និងគ្មានការទទួលខុសត្រូវ។ សម្រាប់ប្រធានាធិបតីអាហ្វហ្កានីស្ថាន សេរីភាពបញ្ចេញមតិ គួរត្រូវប្រើក្នុងន័យស្ថាបនា គឺដើម្បីជំរុញការរស់នៅ រួមគ្នា ដោយសន្តិភាព រវាងអ្នកកាន់សាសនាផ្សេងគ្នា។
តាំងពីថ្ងៃសុក្រ បាតុកម្មប្រឆាំង Charlie Hebdo ដែលមានមនុស្សចូលរួម ពី១ពាន់ ទៅ ៣ពាន់នាក់ ត្រូវគេសង្កេតឃើញមានផងដែរ ទាំងហិង្សា និងសន្តិភាព នៅមុខស្ថានទូតបារាំង នៅក្នុងប្រទេសហ្សកដានី អាល់ហ្សេរី ម៉ាលី និងកាតារ។ ភាគច្រើន បាតុករដុតទង់ជាតិបារាំង ដើម្បីប្រឆាំងនឹង Charlie Hebdo ចំណែកនៅស៊ូដង់ខាងជើង បាតុករបានទាមទារឲ្យរដ្ឋាភិបាលបណ្តេញមន្ត្រីទូតបារាំងចេញពីស៊ូដង់៕
