(រូបភាព វីដេអូ ) សៀមរាប៖អស់លោកលោកស្រីជានគរបាលតាមបណ្តាការិយាល័យចំណុះស្នងការដ្ឋាននគរបាលខេត្តសៀមរាបសរុបចំនួន៦០នាក់បានចូលរួមនៅក្នុង វគ្គបណ្តុះបណ្តាលស្តីពីកត្តាហានិភ័យបើកបរក្រោមឥទ្ធិពលនៃជាតិស្រវឹង និងមិនពាក់មួកសុវត្ថិភាពរយះពេល១ថ្ងៃ នៅក្នុងសាលប្រជុំស្នងការដ្ឋាននគរបាលខេត្តសៀមរាបកាលពីព្រឹកថ្ងៃទី២៦ខែមីនា ឆ្នាំ២០១៤នេះ។ក្រោមអធិបតី លោកឧត្តមសេនីត្រី ទី ឡុង
អនុប្រធាននាយកដ្ឋានសណ្តាប់ធ្នាប់ នៃអគ្គស្នងការដ្ឋាននគរបាលជាតិ លោកវរសេនីយ៍ឯក តេង ច័ន្ទណាត ស្នងការរងទទួលបន្ទុកនគរបាលចរាចរណ៍នៃស្នងការដ្ឋាននគរបាលខេត្តសៀមរាបនិងគ្រូបង្គោលដែលអញ្ជើញមកពីនាយកដ្ឋានសណ្តាប់ធ្នាប់បានចូលរួមផងដែរ ។
លោកឧត្តមសេនីត្រី ទី ឡុង អនុប្រធាននាយកដ្ឋានសណ្តាប់ធ្នាប់ បានមានប្រសាសន៍ថា៖ក្រោមការយកចិត្តទុកដាក់ខ្ពស់ជាប្រចាំក៏ដូចជាដោយយោងទៅតាមចំណាឯកភាពដ៏ខ្ពង់ខ្ពស់ពីសំណាក់ ឯកឧត្តម នាយឧត្តមសេនីយ៍អគ្គស្នងការដ្ឋាននគរបាលជាតិ នាយកដ្ឋានសណ្តាប់ធ្នាប់បានសហការជាមួយនឹង អង្គការដៃគូសុវត្ថិភាពចរាចរណ៍ផ្លូវគោកសកល ហៅកាត់ថា (GRSP) បាន រៀបចំបើកវគ្គបណ្តុះបណ្តាលនេះឡើងដោយមានក្រុមគ្រូបង្គោលនៃនាយកដ្ឋានសណ្តាប់ធ្នាប់ជាអ្នកសម្របសម្រួល ផងនោះដោយផ្តោតសំខាន់ទៅលើកត្តាហានិភ័យចំនួន០២ គឺ ហានិភ័យនៃការបើកបរក្រោមឥទ្ធិពលនៃជាតិស្រវឹង និងហានិភ័យនៃការបើកបរមិនពាក់មួកសុវត្ថិភាព។
លោកឧត្តមសេនីត្រី ទី ឡុង បានបន្តប្រសាសន៍ទៀតថា សិក្ខាកាមដែលបានចូលរួមវគ្គបណ្តុះបណ្តាលថ្ងៃនេះ គឺកំណត់យកតែនគរបាលតាមបណ្តាការិយាល័យចំណុះស្នងការដ្ឋាននគរបាលខេត្តសៀមរាបចំនួន៦០នាក់ដែលមិនមែនជានគរបាលជំនាញចរាចរណ៍ ព្រោះថានគរបាលចរាចរណ៍ធ្លាប់ទទួលការបណ្តុះបណ្តាលតាមរយៈនាយកដ្ឋានច្រើនលើករួចមកហើយ។
ដោយផ្អែកតាមរបាយការណ៍របស់នាយកដ្ឋានសណ្តាប់ធ្នាប់ឆ្នាំ២០១៣ មានគ្រោះថ្នាក់ចរាចរណ៍កើតឡើងចំនួន ៤៣២២ ករណី, បណ្តាលឲ្យស្លាប់១៩០១នាក់ (ក្នុងនោះនគរបាលចំនួន២២នាក់), របួសធ្ងន់ ៤២០៥នាក់ និងរបួសស្រាល ៣០០៣នាក់ (ក្នុងនោះមិនពាក់មួកសុវត្ថិភាពពេលមានគ្រោះថ្នាក់មានចំនួន ២២៩៦នាក់)។
គ្រោះថ្នាក់ទាំងនេះបង្កដោយមូលហេតុធំៗចំនួន០៣ ១\ បើកបរល្មើសល្បឿនកំណត់ ៤៦%, ២\ មិនគោរពសិទ្ធអាទិភាព ១៤% និងទី ៣\ ស្រវឹង ១៣% ។
លោកឧត្តមសេនីត្រី ទី ឡុង អនុប្រធាននាយកដ្ឋានសណ្តាប់ធ្នាប់បានបញ្ជាក់ថាតាមរយៈវគ្គបណ្តុះបណ្តាលនេះ សិក្ខាកាមទាំងអស់នឹងបានពង្រីកចំណេះដឹងថែមមួយកម្រិតទៀតស្តីពីកត្តាហានិភ័យទាំងពីរខាងលើ នឹងអនុវត្តវិធានការណ៍សុវត្ថិភាពចរាចរណ៍ដើម្បីធ្វើជាគំរូ ល្អដល់ប្រជាពលរដ្ឋតាមរយៈការពាក់មួកសុវត្ថិភាពរាល់ពេលធ្វើដំណើរតាមម៉ូតូ និងមិនបើកបរក្រោមឥទ្ធិពលនៃជាតិស្រវឹង។
ក្រៅពីនោះភ្នាក់ងារនគរបាលជាតិដែលបានចូលរួមរៀនសូត្រនៅក្នុងវគ្គបណ្តុះបណ្តាលនេះហើយត្រូវយកទៅធ្វើការ ផ្សព្វផ្សាយចំណេះដឹងនេះបន្តទៀតដល់មន្ត្រីនគរបាលផ្សេងទៀតនៅក្នុងអង្គភាព ដើម្បីរួមគ្នាកាត់បន្ថយគ្រោះថ្នាក់ចរាចរណ៍ និងអាត្រាស្លាប់ដោយគ្រោះថ្នាក់ចរាចរណ៍នៅទូទាំងប្រទេសឲ្យកាន់តែមានកម្រិតទាបស្របតាមប្រសាសន៍ដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាដែលសម្តេចបានដាក់ចេញនូវពាក្យស្លោកថា ថ្ងៃនេះ ថ្ងៃស្អែកកុំឲ្យមានគ្រោះថ្នាក់ចរាចរណ៍៕ ដោយ ខេង ខេមរា
