ខេត្តព្រះសីហនុ ៖ កាលពីថ្ងៃទី១៤ ខែមិនា ឆ្នាំ២០១៥ គណប្រតិភូនារីខេត្តព្រះសីហនុ ដឹកនាំដោយលោកជំទាវ ប្រាក់ ចន្ទ័សុខា អភិបាលរងខេត្តព្រះសីហនុ បាននាំយកអំណោយទៅសួរសុខទុក បងប្អូននារីក្រីក្រនៅចំណុចចំការក្រូចចំនួន៥០នាក់ និងចំណុចចំការខ្នុរ ភូមិឬទ្ធី២ 
ចំនួន៨០គ្រួសារ និងសិស្សានុសិស្សចំនួន២២០នាក់ នៅក្នុងឃុំកែវផុស ស្រុកស្ទឹងហាវ ខេត្តព្រះសីហនុ ។
លោកជំទាវ ប្រាក់ ចន្ទ័សុខា រួមនឹងគណប្រតិភូមន្ទីរកិច្ចការនារី សមាជិកក្រុមប្រឹក្សាខេត្ត និងសមាគមន៌មរណសង្គ្រោះ បានទៅសំណេះសំណាលសួរសុខទុកបងប្អូននារីក្រីក្រ និងនាំយកអំណោយទៅចែកជូនបងប្អូនស្ត្រី ១៣០គ្រួសារ និងសិស្សានុសិស្សក្នុងឃុំកែវផុស ស្រុកស្ទឹងហាវ ក្នុងឪកាសអបអរសាទរទិវានារីអន្តរជាតិ ៨មិនា ខួបលើកទី១០៤ ក្រោមប្រធានបទ ( ដំណើរឆ្ពោះទៅមុខ ស្ត្រីកម្ពុជាក្រោយសន្និសិទ្ធស្ត្រីពិភពលោកឆ្នាំ១៩៩៥) រាជរដ្ឋាភិបាលកម្ពុជា គិតគូរដល់ស្ត្រី ព្រោះស្ត្រីជាសមាជិកសង្គម ដែលមិនអាចខ្វះបាន ហើយបច្ចុប្បន្នស្ត្រីបានទទួលសិទ្ធិស្មើនិងបុរស ក្នុងការចូលរួមចំណែកជីវភាពនយោបាយ ផ្នែកសេវាអប់រំ សេវាសង្គម សេវាការពារផ្លូវច្បាប់ប្រកបដោយសមធម៌ និងយុត្តិធម៌សំរាប់សង្គមជាតិ និងសង្គមគ្រួសារទាំងមូល ។
លោកជំទាវ បានបន្តថា កន្លងមកស្រី្តបានជួបប្រទះអំពើហឹង្សាក្នុងគ្រួសារ ការរំលោភបំពានផ្សេងៗ ដោយស្ថានភាពសុខភាព សេដ្ឋកិច្ច វប្បធម៌ ចំណេះដឹងឋានះ តួនាទីក្នុងសង្គមមានភាពកក់ក្តៅការពារសុវត្ថិភាព ដើម្បីធានាការរស់នៅប្រកបដោយសុខក្សេមក្សាន្ត និងការអភិវឌ្ឍន៌គ្នានហឹង្សា និងមានកត្តាជាច្រើនទៀតផ្តល់ឪកាសឪ្យស្ត្រីចូលរួមក្នុងនយោបាយខានពុំបាន ។ តាមគោលនយោបាយចតុកោណ និងផែនការនារីរតនះរបស់រាជរដ្ឋាភិបាលកម្ពុជា ក្នុងការចូលរួមដោះស្រាយបញ្ហាប្រឈមទាំងឡាយចំពោះស្ត្រី ដើម្បីកាត់បន្ថយ និងទប់ស្កាត់នូវបញ្ហាប្រឈមនានាដូចជា ការរើសអើងគ្រប់រូបភាពដែលស្ត្រីកម្ពុជាជួបប្រទះ ហើយទិសដៅតែមួយគត់ គឺកសាងនិងអភិវឌ្ឍន៌សង្គមលុបបំបាត់នូវរាល់ទំរង់នៃការរើសអើងលើស្ត្រី ដើម្បីសង្គមមានស្ថេរភាពរុងរឿង និងមានតម្លាភាពប្រកបដោយសមធម៌ ដើម្បីកំណើនការងារនៅកម្ពុជា ពិសេសបងប្អូននារីក្នុងខេត្តព្រះសីហនុ ព្រមទាំងផ្តាំផ្ញើដល់នារីទាំងអស់ត្រូវថែទាំសុខភាពជាប្រចាំ ដើម្បីក្រុមគ្រួសារ និងសង្គមជាតិ ចៀសវាងការធ្វើចំណាកស្រុក ព្រោះបច្ចុប្បន្ននៅកម្ពុជាកំពុងតែខ្វះកម្លាំងពលកម្មបំរើការងារនៅតាមរោងចក្រ សហគ្រាសមួយចំនួន ជាពិសេសក្នុងខេត្តព្រះសីហនុរបស់យើង ។
បន្ទាប់មកគណះប្រតិភូបាននាំយកអំណោយចែកជូននារីចំនួន ១៣០គ្រួសារ ក្នុងមួយគ្រួសារទទួលបានកន្ទេល០១ មុង០១ ភួយ០១ និងសារុង០១ ដោយឡែកសិស្សានុសិស្សចំនួន ២២០នាក់ ក្នុងម្នាក់ទទួលបានសៀវភៅ ០២ក្បាល បិច០២ដើម ខ្មៅដៃ ០២ដើម ៕
