ខេត្តប៉ៃលិន ៖ មនុស្សក្មេងចាស់ប្រុសស្រី ដែលជាកម្មកដកដំឡូងមីជាង៥០នាក់ មានអាការៈវិលមុខក្អួតចង្អោ ស្លេកស្លាំង រាក់រួស ដែលគេសង្ស័យថា អាចពុលដោយសារទឹកស្រះមួយកន្លែង បន្ទាប់ពីអ្នកទាំងនោះបានប្រើប្រាស់រួមគ្នា ។ ហេតុការណ៏បណ្តាលឲ្យកម្មករមានអាកា
រៈវិលមុខ ក្អួតចង្អោខាងលើ បានកើតឡើងកាលពីវេលាម៉ោង៩ព្រឹកថ្ងៃទី១១ ខែឧសភា ឆ្នាំ២០១៥ ស្ថិតនៅខាងក្រោយស្តង់ដំឡូងមីយីហោម៉ៅ មិនា ក្នុងភូមិទំនប់ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។
ប្រភពពីកម្មករដកដំឡូងមី ដែលមានអាការៈវិលមុខ ក្អួតចង្អោរ បានឲ្យអ្នកយកព័ត៌មានកម្ពុជាថ្មីដឹងថា៖ ពួកគាត់មានអាការៈរបៀបនេះរយៈពេល២ថ្ងៃមកហើយ តែដោយនឹកឃើញថាវាមិនមានអាការៈធ្ងន់ធ្ងរ ទើបចេះតែហូបទឹកស្រះនេះបន្តទៀត ,ហើយការហូបទឹកស្រះនេះ ភាគច្រើនគឺមានអាការៈវិលមុខ ក្អួតចង្អោ ហើមមុខហើមមាត អស់កម្លាំង ស្លេកស្លាំង ផងដែរ ។ 
ប្រភពព័ត៌មានបន្តថា៖ ពួកគាត់ជាកម្មកចំណាកស្រុក ដែលមកពីខេត្តបាត់ដំបង ពោធិសាត៏ កំពង់ចាម និងខេត្តព្រៃវែង ដោយមកស៊ីឈ្មួលដកដំឡូងមីម្ចាស់មានឈ្មោះម៉ៅ នៅភូមិទំនប់ ឃុំស្ទឹងត្រង់ ស្រុកសាលាក្រៅ នេះ ,ហើយការមកស៊ីឈ្មួលដកដំឡូងមីនេះ បានត្រឹមតែមួយសប្តាហ៏នោះទេ ដោយធ្វើការងារចែកជាក្រុម ពេលកើតអាការៈពុលទឹកស្រះដូច្នោះពួកគាត់មិនមានថវិកាព្យាបាលជំងឺនោះឡើយ ។ ប្រភពបន្តទៀតថា៖ កាលពីមុនមានអ្នកខ្លះមកបាន២ទៅ៣ថ្ងៃ បានត្រលប់ទៅផ្ទះវិល ដោយសារមានអាការៈហើមមុខហើមមាត់ និងក្អួតចង្អោរដូច្នោះ ។
បើតាមសម្តីរបស់សមត្ថកិច្ច និងអាជ្ញាធរមូលដ្ឋានបានឲ្យដឹងថា៖ កម្មករដែលពុលទឹកស្រះទាំងនោះ ត្រួវបានដឹកជញ្ជូនយកទៅសង្គ្រោះជីវិតនៅមន្ទីរបង្អែកខេត្តប៉ៃលិន ហើយនៅល្ងាចថ្ងៃដដែលនេះ ប្រជាពលរដ្ឋទាំងនោះត្រូវបានក្រុមគ្រូពេទ្យ ជួយសង្គ្រោះ ទាន់ពេលវេលាមិនបង្កឱ្យអ្នកណាម្នាក់ស្លាប់នោះឡើយ ហើយពួកគាត់ក៏មានអាការៈធូស្បើយ វិញហើយផងដែរ។
ជុំវិញនៃករណីនេះ បើតាមការបញ្ជាក់ឱ្យដឹងពី លោកអធិការនគរបាលស្រុកសាលាក្រៅ ប្រាប់ ឱ្យដឹងថា ក្នុងចំណោមអ្នកពុលខាងលើសរុបចំនួន៥៥នាក់ គឺមានកូនក្មេងចំនួន៧នាក់ ពួកគាត់សុទ្ធតែជាចំណាកស្រុកមករស់នៅក្នុងស្រុកសាលាក្រៅ ខេត្តប៉ៃលិនបណ្តោះអាសន្នធ្វើជាកម្មករដកដំឡូងមីឱ្យគេ ។ មូលហេតុនាំឱ្យពុលទឹកស្រះបើតាមក្រុមគ្រូពេទ្យបញ្ជាក់ថា មកពី ការប្រើប្រាស់ទឹកខ្វះអនាម័យនិងប្រែប្រួលអាកាសធាតុ។
ពាក់ព័ន្ធនឹងបញ្ហានេះ អ្នកយកព័ត៌មានកម្ពុជាថ្មី បានទំនាក់ទំនងទៅ លោក សេង រ៉ន ប្រធាន មន្ទីរសុខាភិបាលខេត្តប៉ៃលិន តាមទូរស័ព្ទ ប៉ុន្តែទូរស័ព្ទរបស់លោកហៅចូលគ្មានអ្នកទទួល ៕
