ក្រចេះ៖ សាខាកាកបាទក្រហមកម្ពុជា ខេត្តក្រចេះ កាលពីព្រឹកថ្ងៃទី១២ ខែឧសភា ឆ្នាំ២០១៥បានប្រារព្ឋពិធីអបអរសាទរខួបលើកទី១៥២ ទិវាពិភពលោក កាកបាទក្រហម អឌ្ឍច័ន្ទក្រហម ក្រោមអធិបតីភាព លោកទេសរដ្ឋមន្ត្រី អ៊ឹម ឈុនលឹម រដ្ឋមន្ត្រីក្រសួងរៀបចំដែនដី នគរូបនីយ
កម្ម និងសំណង់ និងមានការចូលរួមពី សមាជិកព្រឹទ្ធសភា រដ្ឋសភា ក្រុមប្រឹក្សាខេត្ត អភិបាល អភិបាលរងខេត្ត មន្ត្រីរាជការមន្ទីរជុំវិញខេត្ត និងសប្បុរសជននានា ។ពិធីនេះប្រារព្ឋឡើងក្រោមប្រធានបទ “កម្លាំង មនុស្សធម៌ គោលការណ៍ គ្រឹះក្នុងសកម្មភាព” គឺមានបំណងគូសបញ្ជាក់ នូវភាពសមស្របនៃគោលការណ៍ គ្រឹះដែលនៅបន្តជានិរន្តរ៍ នៅក្នុងសេវាកម្មមនុស្សធម៌ និងជាមគ្គុទ្ទេសក៍ដ៏សំខាន់ ក្នុងការបំពេញការងាររបស់ខ្លួន ហើយជាមួយគ្នានោះគឺបានប្រមូលថវិកា បានជាង១៤ម៉ឺនដុល្លារអាម៉េរិក ដើម្បីចូលរួមឧបត្ថម្ភទៅដល់ កាកបាទក្រហមកម្ពុជា ដើម្បីយកថវិកាទៅជួយដល់រងគ្រោះផ្សេងៗនៅក្នុងប្រទេសកម្ពុជា។
ថ្លែងទៅកាន់អង្គពិធី លោកទេសរដ្ឋមន្ត្រី អ៊ឹម ឈុនលឹម មានប្រសាសន៍ថា ទិវានេះបានធ្វើឲ្យយើងទាំងអស់គ្នា ចងចាំជានិច្ចនូវប្រវត្ដិនៃការបង្កើត ចលនាកាកបាទក្រហម អឌ្ឍចន្ទក្រហម ដែលមានគោលដៅលើកទឹកចិត្ដ ដល់ការងារក្នុងបុព្វហេតុមនុស្សធម៌ ពិសេសការជួយ សម្រាលទុក្ខលំបាកដល់ជនទុរគត ជនងាយរងគ្រោះដោយគ្រោះមហន្ដរាយ ឬឧបទ្ទវហេតុផ្សេងៗ រួមទាំងសកម្មភាពអប់រំ ថែទាំសុខភាព លើកកម្ពស់តម្លៃមនុស្សធម៌ សេចក្ដីថ្លៃថ្នូររបស់មនុស្សជាតិ និងវប្បធម៌អហិង្សា ដែលជាការផ្ដល់ក្ដីសង្ឃឹម និងភាព កក់ក្ដៅដល់គ្រួសារ ងាយរងគ្រោះ ជាពិសេសជនចាស់ជរា ជនគ្មានទីពឹង នឹងស្ដ្រីមេម៉ាយ កុមារកំព្រា អ្នករស់នៅ
ជាមួយមេរោគអេដស៍ និងជំងឺអេសដ៍ ស្ដ្រីមានផ្ទៃពោះ និងទារក-កុមារមានបញ្ហាសុខភាព និងកិច្ចការជួយសង្គ្រោះជនរងគ្រោះ ពិតជារួមចំណែកយ៉ាងសំខាន់ជាមួយរាជរដ្ឋាភិបាល ក្នុងការដោះស្រាយទុក្ខលំបាក ជូនប្រជាពលរដ្ឋទូទៅ ចែករំលែក ជួយគ្នាទៅវិញទៅមក រួមគ្នារកដំណោះស្រាយ បញ្ហាប្រឈមនានា ជួយសង្គ្រោះជនរងគ្រោះ បានទាន់ពេលវេលាក្នុងគ្រាមានអាសន្នហើយនាពេលកន្លងទៅ សាខាកាកបាទក្រហមខេត្តក្រចេះ បានធ្វើសកម្មភាព ក្នុងការងារមនុស្សធម៌ ជួយដល់ជនរងគ្រោះនានា ដូចជាកុមារកំព្រា ចាស់ជរាគ្មានទីពឹង និងបានចុះសាកសួរសុខទុក្ខ និងចែកចាយសម្ភារៈសង្គ្រោះដល់គ្រួសារក្រីក្រ, គ្រួសារទុរគតជន, 
គ្រួសារទទួលរងនូវគ្រោះអគ្គិភ័យ, ខ្យល់ព្យុះ, និងទឹកជំនន់ជាដើម បើទោះបីជាមិនបានតាមសេចក្តីត្រូវការរបស់ប្រជាពលរដ្ឋ ក៍អាចជួយសម្រួលដល់កាទុកលំបាក បានមួយចំណែកផងដែរ ។
