ខេត្តកំពង់ឆ្នាំង៖ ឯកឧត្តមបណ្ឌិត អ៊ុក រ៉ាប៊ុន បានថ្លែងថា៖ “ ខ្ញុំសប្បាយចិត្តខ្លាំងណាស់ ដោយបានឃើញបងប្អូនប្រជាកសិករ ទទួលបានទិន្នផលខ្ពស់ក្នុងការប្រមូលផលស្រូវឆ្នាំនេះ ហើយនេះក៏ដោយសារបងប្អូនបានយល់ដឹង និងទទួលយកតាមការណែនាំ របស់មន្ទីរកសិកម្មខេត្ត ដែលតែងតែពន្យល់ និងបង្ហាត់បង្រៀន អំពីការដាំដុះដំណាំស្រូវ ដោយយកែប្រែ ពីការដាំស្រូវធ្ងន់ មកដាំស្រូវកណ្តាលវិញ” ។ឯកឧត្តម បណ្ឌិត អ៊ុក រ៉ាប៊ុន មានប្រសាសន៍បែបនេះ នៅព្រឹកថ្ងៃទី ០៦ ខែធ្នូ ឆ្នាំ២០១៥ ក្នុងពេលដឹកនាំក្រុមការ ងារចុះមកត្រួតពិនិត្យការប្រមូលស្រូវ និងជួយច្រូតស្រូវប្រជាពលរដ្ឋ ក្នុងភូមិប្រខ្លូត ឃុំធ្លកវៀន ស្រុកសា មគ្គីមានជ័យ ខេត្តកំពង់ឆ្នាំង។
នៅក្នុងពេលនោះដែរ ឯកឧត្តមក៏បានសួរ និងបានស្តាប់ចម្លើយ ស្ត្រីប្រជាកសិករ និងជាម្ចាស់ស្រែឈ្មោះ ម៉ម យួន អាយុ៧០ឆ្នាំ បាននិយាយអោយដឹងថា៖ ឆ្នាំមុនក្រុមគ្រួសារគាត់បានធ្វើស្រូវធ្ងន់ មិនបានទទួលផលទេ ដោយតែគ្មានទឹកគ្រប់គ្រាន់នៅចុងរដូវ ។ប៉ុន្តែនៅក្នុងឆ្នាំនេះដោយសារតែមានការណែនាំពីមន្ទីរកសិកម្មខេត្ត និងកសិកម្មស្រុក ក្រុមគ្រួសារគាត់ បានផ្លាស់ប្តូរមកធ្វើស្រូវកណ្តាលវិញ ទើបទទួលបានទិន្នផលល្អពេញចិត្តបែបនេះ ។ ស្ត្រីជាម្ចាស់ស្រែក៏បានថ្លែងអំណរគុណយ៉ាងជ្រាលជ្រៅ ដល់ឯកឧត្តមរដ្ឋមន្ត្រី និងក្រុមការងារ ដែលបានចុះមកជួយច្រូតស្រូវរបស់ក្រុមគ្រួសាគាត់នៅពេលព្រឹកនេះ ដែលជាធម្មតា បើគ្មានការជួយច្រូតបែបនេះទេ ក្រុមគ្រួសារបស់មានគ្នាតែ២នាក់ អាចច្រូតស្រូវ១ហិកតានេះហើយ ក្នុងរយៈពេល ២ទៅ៣ថ្ងៃឯណោះ ។
ឯកឧត្តមបណ្ឌិត អ៊ុក រ៉ាប៊ុន ក៏បានផ្តាំផ្ញើ ដល់លោកប្រធានមន្ទីរកសិកម្មខេត្ត និងការិយាល័យកសិកម្មស្រុក អោយយកចិត្តទុកដាក់ចុះអប់រំនិងណែនាំដល់ប្រជាពលរដ្ឋជាបន្តទៀត ក្នុងការផ្លាស់ប្តូរពីទម្លាប់ការធ្វើស្រូវធ្ងន់ មកធ្វើស្រូវកណ្តាល ឬ ស្រូវស្រាលវិញ ព្រោះថាការកែប្រែទម្លាប់បែបនេះ គឺដើម្បីសម្របសម្រួល ទៅនឹការប្រែប្រួលអាកាសធាតុដែលកំពុងកើតឡើងសព្វថ្ងៃនេះ ។
ដោយឡែក លោក ងិន ហ៊ុន ប្រធានមន្ទីរកសិកម្មកខេត្តកំពង់ឆ្នាំង បានអោយដឹងថា៖ ការប្រមូល
ផលស្រូវរដូវស្សា គិតត្រឹមថ្ងៃទី០៦ ខែធ្នូ ឆ្នាំ២០១៥នេះ ប្រជាកសិករបានប្រមូលផលស្រូវបានជាង៣ម៉ឺនហិកតាហើយ នៅលើផ្ទៃដីដែលអនុវត្តន៍បានចំនួន១២៥ ០៨១ហិកតា ស្មើនឹង២៧ ភាគរយ ដោយទទួលផលបានជាមធ្យម ២តោន៦០០គីឡូក្រាម ក្នុងហិកតា ។ ចំណែកស្រូវប្រាំងមកដល់ថ្ងៃនេះ ធ្វើបានជាង១៦. ០០០ហិកតាហើយ លើផែនការចំនួន២៩. ៧០០ហិកតា ស្មើនឹង៦៧ភាគរយ។ ដោយឡែកការសភាពការណ៍ទឹកស្រោចស្រពស្រូវប្រាំងគឺធានាបានល្អ មិនទាន់មានការប្រឈមនៅឡើយទេ៕
