សៀមរាប៖អាជ្ញាធរជាតិអប្សរាសហការជាមួយសាលាខេត្តព្រះវិហារ នឹងបង្កើតគណៈកម្មការចម្រុះមួយដើម្បីទប់ស្កាត់ការរុករានដី និងការកាប់ព្រែឈើ ក្នុងតំបន់អភិរក្សនៃប្រាសាទកោះកេរ។ ការសម្រេចបង្កើតគណៈកម្មការចម្រុះនេះ ស្របតាមស្មារតីនៃកិច្ចប្រជុំមួយនៅសាលា
ខេត្តព្រះវិហារ នាព្រឹកថ្ងៃទី៧ ខែធ្នូ ឆ្នាំ២០១៥ ក្រោមអធិបតីភាពឯកឧត្តមនាយឧត្តមសេនីយ មាស សុភាប្រធានក្រុមការងារចុះជួយខេត្តព្រះវិហារ ដែលមានការចូលរួម ពីសំណាក់អភិបាលបាលខេត្តព្រះវិហារ អគ្គនាយកអាជ្ញាធរជាតិអប្សរា អគ្គនាយកអាជ្ញាធរជាតិព្រះវិហារ និងមន្ត្រីពាក់ព័ន្ធជាច្រើនទៀត។
គណៈកម្មការចម្រុះនេះ នឹងមានអាជ្ញាធរជាតិអប្សរាដែលទទួលបន្ទុកអភិរក្សប្រាសាទតំបន់កោះកេរជាប្រធាន និងមានសមាសភាពចូលរួមពីអភិបាលរងខេត្តព្រះវិហារ មន្ទីរពាក់ព័ន្ធ និងសមត្ថកិច្ចមូលដ្ឋាន។ គណៈកម្មការនេះ មានតួនាទីសំខាន់ក្នុងការទប់ស្កាត់បទល្មើសរុនរានដីក្នុងតំបន់អភិរក្ស និងបទល្មើសកាប់ព្រៃឈើប្រណីតក្នុងតំបន់នេះ។
ក្នុងកិច្ចប្រជុំនេះផងដែរ ឯកឧត្តម ស៊ុំ ម៉ាប់ អគ្គនាយកអាជ្ញាធរជាតិអប្សរាក៏បានលើកឡើងនូវបទពិសោធន៍ ដែលកំពុងអនុវត្តនៅក្នុងរមណីយដ្ឋានអង្គរខេត្តសៀមរាប គឺការចុះអប់រំដល់ប្រជាពលរដ្ឋតាមសហគមន៍ អំពីតម្លៃបេតិកភណ្ឌ។ ឯកឧត្តមបញ្ជាក់ថា រយៈកាលកន្លងមក បទល្មើសនៅតំបន់កោះកេរ ភាគច្រើន កើតឡើងចេញពីប្រជាពលរដ្ឋនៅក្នុងតំបន់នោះផ្ទាល់ ដោយសារមិនបានយល់ដឹងអំពីតម្លៃនៃបេតិកភណ្ឌ។ ដូច្នេះ អាជ្ញាធរជាតិអប្សរាសុំកិច្ចសហការជាមួយ អាជ្ញាធរខេត្តព្រះវិហារ ដើម្បីឲ្យមន្ត្រីចុះអប់រំបេតិកភណ្ឌដល់ប្រជាពលរដ្ឋនៅតំបន់កោះកេរ ដូចដែលបានអនុវត្តនៅរមណីយដ្ឋានអង្គរដែរ។
ឯកឧត្តម អ៊ុ ម៉ារ៉ា អភិបាលខេត្តព្រះវិហារបានឯកភាពទាំងស្រុងលើការបង្កើតគណៈកម្មការ និងការបង្កើតឲ្យមានការចុះអប់រំបេតិកភណ្ឌនេះ។ ឯកឧត្តមបញ្ជាក់ថា កន្លងមក រដ្ឋបាលខេត្តព្រះវិហារក៏មិនដែលព្រងើយកន្តើយក្នុងកិច្ចសហការជាមួយអាជ្ញាធរជាតិអប្សរា ក្នុងការទប់ស្កាត់បទល្មើសឡើយ គ្រាន់តែយើងមិនទាន់មានការបង្កើតជាគណៈកម្មការផ្លូវការណាមួយប៉ុណ្ណោះ ដែលការនេះ អាចធ្វើឲ្យមានការយឺតយ៉ាវក្នុងការទប់ស្កាត់បទល្មើស។ ជាមួយគ្នានេះ ឯកឧត្តមក៏បានសម្រេចតាមសំណើរបស់អាជ្ញាធរជាតិអប្សរា ដែលសុំឲ្យមានសមត្ថកិច្ចឈរជើងជាប្រចាំក្នុងបរិវេណប្រាសាទកោះកេរ ដើម្បីអាចទប់ស្កាត់បានភ្លាមៗនូវករណីបទល្មើសផ្សេងៗ ជាពិសេសពាក់ព័ន្ធនឹងការកាប់ព្រៃឈើ។
ឯកឧត្តម មាស សុភា ក៏បានឯកភាពទាំងស្រុងលើការបង្កើតគណៈកម្មការចម្រុះនេះ ហើយឯកឧត្តមបានឲ្យអាជ្ញាធរជាតិអប្សរា ជាអ្នករៀបចំពង្រៀងនៃសេចក្តីសម្រេចនេះ ដាក់ជូនទីស្តីការគណៈរដ្ឋមន្ត្រីជាអ្នកសម្រេច។
តំបន់កោះកេរមានទីតាំងនៅឃុំស្រយ៉ង់ ស្រុកគូលែន ខេត្តព្រះវិហារមានផ្ទែដី៨១គីឡូម៉ែត្រក្រឡា ត្រូវបានរាជរដ្ឋាភិបាលប្រគល់ឲ្យអាជ្ញាធរជាតិអប្សរាគ្រប់គ្រងពីឆ្នាំ២០០៥មក៕
វេហាស៍
