ខេត្តកំពង់ឆ្នាំង ៖ លោក សោម ភិរុណ នាយខណ្ឌ័រដ្ឋបាលជលផល កំពង់ឆ្នាំង បាននិយាយថា៖ “នៅក្នុងខ្នើតខែមិគសិរនេះ ត្រីប្រហុកចាប់ផ្តើមសំបូរហើយ ដោយត្រីនឹងសំបូរខ្លាំង ចាប់ពីថ្ងៃ ៤ – ៥កើត រហូតដល់ដាច់ខ្នើតខែនេះ បើសិនជា គ្មានការប្រែប្រួលអាកាសធាតុ ទេនោះ” លោកបាននិយាយបែបនេះនៅព្រឹកថ្ងៃទី ១២ ខែធ្នូ ឆ្នាំ២០១៥ នៅពេលលោកបានដឹកនាំមន្ត្រីខណ្ឌ័រដ្ឋបាលជលផល ចុះពិនិត្យស្ថានភាព ត្រីចុះ និងការនេសាទត្រី របស់ប្រជាពលរដ្ឋតាមដងទន្លេ ពីភូមិចុងកោះ ក្រុងកំពង់ឆ្នាំង រហូតដល់ឃុំឆ្នុកទ្រូ ស្រុកបរិបូណ៌ ។
លោកបានអោយដឹងថា៖ បើមើលតាមស្ថានភាពត្រី ដែលចាប់ផ្តើមត្រូវពី ថ្ងៃ២កើតនេះទៅ ផលត្រីអាច នឹងសំបូរខ្លាំងក្នុងឆ្នាំនេះ ព្រោះថាតាមធម្មតារាល់ឆ្នាំ ត្រីប្រហុកសំបូរ ពីថ្ងៃ ៥-៦កើត ខែមិគសិរ ។ ទន្ទឹមនឹងត្រី ប្រហុកចាប់ផ្តើមត្រូវជាបណ្តើរៗហើយនោះ គឺជាសញ្ញាថានៅតែប៉ុន្មានថ្ងៃទៀតត្រីនឹងសម្រុ ក ត្រូវខ្លាំង លោកសូមអំពាវនាវ ដល់បងប្អូន ប្រជាពលរដ្ឋ ក្នុងខេត្តសូមត្រៀមលក្ខណៈ មកធ្វើត្រីប្រហុក
អោយបានរួសរាន់ កុំអោយហួសពេល ។
ដោយឡែកទីតាំងដែលសំបូរត្រីប្រជាពលរដ្ឋនិយមមកធ្វើត្រីប្រហុកនោះមាន នៅមាត់កំពង់ទឹកផ្សារ ឃុំឆ្នុកទ្រូស្រុកបរិបូណ៌ នៅភូមិចុងកោះ ក្រុងកំពង់ឆ្នាំង នៅភូមិកំពង់ប្រាសាទ និងភូមិកំពង់ត្រឡា ចក្រោម ក្នុងស្រុកកំពង់ត្រឡាច ។ ចំណែកមាត់កំពង់ឃុំឆ្នុកទ្រូ និងកំពង់ផែយឿត្រីភូមិចិងកោះវិញ គឺជាចំណតរថយន្តដឹកត្រីគ្រប់ប្រភេទ យកទៅតាមបណ្តាខេត្តផ្សេងៗ មាន ខេត្តត្បូងឃ្មុំ កំពង់ចាម ប៉ោយប៉ែត្រ និងរាជធានីភ្នំពេញជាដើម ។
នៅព្រឹកថ្ងៃទី ១៤ ខែធ្នូ ឆ្នាំ២០១៥នេះ ត្រីដែលឈ្មួញចាំទិញពីប្រជានេសាទ គឺត្រីរៀលថ្លៃ ៨០០រៀល ត្រីចង្កែងថ្លៃ៣.៥០០រៀល ត្រីរ៉ស់ ត្រីអណ្តែង និងត្រីឆ្កោក ថ្លៃ៧.០០០រៀល ក្នុង១គីឡូក្រាម ដែលកាលត្រីមិនទាន់ត្រូវ គឺត្រីខាងលើនេះមានតម្លៃ១គុណនិង២។
អាជ្ញាធរខេត្ត និងលោកនាយខណ្ឌ័រដ្ឋបាលជលផលកំពង់ឆ្នាំង សូមអំពាវ ដល់អាជ្ញាធរមូលដ្ឋាន ភូមិ ឃុំ និងស្រុក រួមទាំងសមត្ថកិច្ចគ្រប់ជាន់ថ្នាក់ សូមមេត្តាជួយបង្កលក្ខណៈងាយស្រួល ដល់ប្រជាពល រដ្ឋដែលមកស្នាក់នៅធ្វើប្រហុក ផ្អក ដោយសូមយកចិត្តទុកដាក់ ការពារសន្តិសុខ សណ្តាប់ធ្នាប់ និងសុវត្តិភាពអោយបានល្អ ជូនប្រជាពលរដ្ឋយើងផង ។
ប្រជានេសាទជាអ្នកបណ្តែតមងម្នាក់ បាននិយាយអោយដឹងថា៖ ត្រីចាប់ផ្តើមត្រូវ ពីថ្ងៃ១កើតមក គាត់នេសាទបានត្រីពីដើមខ្នើតនេះ គាត់មិនទាន់លក់ទេ គឺបានធ្វើការឆ្អើរទុកលក់រយះ២ថ្ងៃកន្លងទៅនេះគាត់ឆ្អើរបានជាង២រយចង្កាក់ ក្នុង១ចង្កាក់ៗលក់បាន១.៥០០ រៀល ប៉ុន្តែបើត្រីត្រូវខ្លាំង ក៏ត្រូវតែលក់ត្រីស្រស់ដែរព្រោះធ្វើឆ្អើរមិនទាន់ ៕
