សៀមរាប៖ ពិធីចុះអនុស្សរណៈនៃការយោគយល់គ្នាមួយ ដែលស្តីពីការងារជួសជុល និងកែលម្អឡើងវិញនូវសារមន្ទីរព្រះនរោត្តមសីហនុអង្គរ ត្រូវបានរៀបចំឡើងនៅទីស្នាក់ការ អាជ្ញាធរជាតិអប្សរា នាព្រឹកថ្ងៃទី២៥ ខែធ្នូ ឆ្នាំ២០១៥នេះ ។
អនុស្សរណៈនៃការយោគយល់គ្នានេះដែរធ្វើឡើងដោយមាន៤ភាគីចូលរួមគឺ អាជ្ញាធរជាតិអប្សរា មូលនិធិក្លឹប១%នៃក្រុមហ៊ុនអ៊ីអុង សាកលវិទ្យាល័យសូហ្វ៊ីយ៉ា និងក្រុមហ៊ុនសាតូកម្ពុជា។
តាមអនុស្សរណៈនៃការយោគយល់គ្នានេះ អាជ្ញាធរជាតិអប្សរា ជាអ្នកសម្រួលការងារជួសជុល ដឹកជញ្ជូនចម្លាក់ទុកដាក់ក្នុងទីសុវត្ថិភាព និងរៀបចំឡើងវិញក្រោយជួសជុលជុលរួច ចំណែក ការចំណាយទៅលើការជួសជុលជាបន្ទុករបស់មូលនិធិក្លឹប១%នៃក្រុមហ៊ុនអ៊ីអុង។
ប្រធានក្រុមប្រឹក្សាភិបាលនៃមូលនិធិក្លឹបអ៊ីងអុង១% លោក ហាយ៉ាស៊ី ណាអុគី បញ្ជាក់ក្នុងពិធីចុះអនុស្សរណៈនៃការយោគយល់គ្នានេះថា មូលនិធិក្លឹបអ៊ីអុងនឹងរៀបចំការងារសិក្សាលម្អិត ជាមួយក្រុមហ៊ុនសាតូកម្ពុជា ដែលជាក្រុមហ៊ុនសាងសង់ ហើយនឹងកំណត់ចំណុចអាទិភាពដែលត្រូវជួសជុលកែលម្អ ព្រមទាំងតម្លៃជួសជុលនៅមុនខែមីនា ឆ្នាំ២០១៦នេះ។ ចំណែកការងារជួសជុលអាចនឹងចាប់ផ្តើមឡើងនៅអំឡុងខែតុលាឆ្នាំ២០១៦ខាងមុខ ដោយចំណាយពេល៣ខែ។
ឯកឧត្តម ស៊ុំ ម៉ាប់ អគ្គនាយកអាជ្ញាធរជាតិអប្សរា បានសម្តែងថ្លែងអំណរគុណ និងអបអរសាទរចំពោះមូលនិធិក្លឹបអ៊ីអុង១% ដែលតែងយកចិត្តទុកដាក់ដល់ការងារអភិរក្សបេតិកណ្ឌវប្បធម៌ ជាមួយអាជ្ញាធរជាតិអប្សរា។ ឯកឧត្តមបញ្ជាក់ទៀតថា មិនត្រឹមតែសារមន្ទីរប៉ុណ្ណោះទេ នៅឆ្នាំ២០០៣កន្លងមក មូលនិធិនេះក៏បានចូលរួមដាំសួនដើមឈើអនុស្សាវរីយ៍មួយកន្លែង នៅក្បែរសួនគ្រឿងទេសនៃអាជ្ញាធរជាតិអប្សរាផងដែរ។ តទៅខាងមុខ អាជ្ញាធរជាតិអប្សរាក៏មានបំណងឲ្យមូលនិធិនេះចូលរួមចំណែក ក្នុងការងារសង្គមមួយចំនួនជាមួយអាជ្ញាធរជាតិអប្សរា ដូចជាការលើកតម្កើងជីវភាពប្រជាជនក្នុងរមណីយដ្ឋានអង្គរ តាមរយៈក្រុមការងារសហគមន៍របស់អាជ្ញាធរជាតិអប្សរាជាដើម។
សារមន្ទីរព្រះនរោត្តមសីហនុអង្គរកសាងឡើងនៅឆ្នាំ២០០៧ ក្រោមកិច្ចសហប្រតិបត្តិការរវាង អាជ្ញាធរជាតិអប្សរា និងសាកលវិទ្យាល័យសូហ្វ៊ីយ៉ា ដោយ “មូលនិធិនៃក្លឹប១%” របស់ក្រុមហ៊ុនអ៊ីអុង ដើម្បីដាក់តាំង និងតម្កល់វត្ថុបុរាណ ដែលបានរកឃើញក្នុងពេលសិក្សាស្រាវជ្រាវរបស់សាកលវិទ្យាល័យសូហ្វ៊ីយ៉ា កាលពីឆ្នាំ២០០០ និង២០០១នៅប្រាសាទបន្ទាយក្តី៕
វេហាស៍
