សៀមរាបៈ(ដោយប៊ុតវិចិត្រ)ក្រុមគរុសិស្ស២៥៨នាក់ នៅព្រឹកថ្ងៃទី១ខែកក្កដាឆ្នាំ២០១៤ បានឈរកាន់បដាធ្វើកូដកម្ម នៅមុខ សាលាគរុកោសល្យទាមទារឲ្យ ដាក់បញ្ចូលឈ្មោះគរុសិស្ស២រូប ជាបេកភាពប្រឡងវិញ នៅពេលដែលលោកនាយក សាលាបានដកឈ្មោះ គរុសិស្ស
២រូប ចេញពីបេកភាពប្រឡង នៅថ្ងៃទី៤ខែកក្កដាខាងមុខនេះ។ តែស្ថានការ បានវិលទៅរកភាពដើមវិញ ក្រោយប្រធានមន្ទីរអប់រំយុវជន និងកីឡា ធ្វើការសម្របសម្រួល។
ការធ្វើកូដកម្មទាមទារនោះ ក្រុមគរុសិស្សបានលើកឡើងថា ពួកគាត់ភាគច្រើនមកពីបណ្តាស្រុកឆ្ងាយៗ ដោយ ក្នុងមួយឆ្នាំៗ ពួកគាត់ត្រូវចំណាយប្រាក់ក្នុងការរៀនសូត្រ អស់ជិត២០០០ដុល្លារ។ ដូច្នេះបើត្រឹមតែពួកគាត់មាន កំហុសក្នុងវិន័យសាលាបន្តិចបន្តួច ហើយលោកនាយកដកឈ្មោះចេញពីបេកភាពប្រឡងយ៉ាងនេះ គឺប្រៀបបាន នឹងឲ្យពួកគាត់ដើរថយក្រោយមួយឆ្នាំទៀតអីយ៉ាងចឹង។
គរុសិស្ស២រូបដែលបានដកឈ្មោះចេញពីបែកភាពប្រឡង ទី១ឈ្មោះវិន សាវី ភេទប្រុស រស់នៅក្នុងស្រុកស្វាយលើ ទី២ឈ្មោះស៊ិញ លីហុង ភេទប្រុស រស់នៅ ក្នុងស្រុកអង្គរធំ ពួកគាត់ជាគរុសិស្ស ជំនាន់ទី៣១ ឆ្នាំទី២។
សិស្សវិន សាវី បានឲ្យដឹងថា ពួកគាត់ពិតជាមានកំហុស ក្នុងវិន័យសាលាខ្លះមែន ដោយស្លៀកពាក់ឯក សណ្ឋានខុសពីរដង មកយាមយប់មិនទានពេលម្តង កំហុសនេះក៏មិនទាន់ដល់ ដកឈ្មោះចេញពីបែកភាព ប្រឡងនោះទេ។ តែពេលប្រជុំ ក្រុមប្រឹក្សាវិន័យ បានទាមទារឲ្យដកឈ្មោះពួកគាត់ពីរនាក់ ហើយនាយកសាលា ក៏បានធ្វើលិខិតទៅមន្ទីរ ដោយខាងមន្ទីរស៊ីញ៉េដកតែម្តង។ ចឹងនៅព្រឹកថ្ងៃទី១ខែកក្កដានេះ ពួកគាត់គ្រាន់តែធ្វើ កូដកម្មទាមទារឲ្យដាក់បញ្ចូលឈ្មោះ រូបគេ២នាក់ បានចូលប្រឡងតែប៉ុណ្ណោះ គឺគ្មានបំណងអ្វីទាំងអស់។
ប្រធានមន្ទីរអប់រំយុវជន និងកីឡាខេត្តលោកអ៊ុង សិរីឌី បានបរិយាយជាមួយអ្នកកាសែតថា គ្រប់យ៉ាង បានវិលទៅរកភាពដើមវិញហើយ។ វាជាកំហុសតិចតួចទេ ក្រោយលោកបានហៅគរុសិស្សទាំងនោះចូលប្រជុំ ដោះស្រាយអ្វីៗក៏បានបញ្ចប់អស់ហើយ។
លោកបន្ថែមថា តាមពិតក្នុងសាលាត្រូវមានវិន័យ ចឹងពួកគាត់ពីរនាក់ ខាងលើបានធ្វើខុសវិន័យសាលា។ ចំណែកការចុះហត្ថលេខាដកឈ្មោះចេញ ពីបេកភាពប្រឡងនោះ ជាអនុ ប្រធានរបស់លោកទេ។
លោកលាវ ឪរ៉ា នាយកសាលាគរុកោសល្យ ពុំអាចសុំការពន្យល់បានទេ ដោយសាពុំមានវត្តមាន នៅ ពេលមានកូដកម្ម។
ចំណែកលោកនាយករងដែលស្ថិតក្នុងហេតុការណ៏ ក៏ពុំអាចសុំការពន្យល់បានដែរ ដោយអ្នកយាម ប្រាប់ថា លោករវល់ខ្លាំងគ្មានពេល៕
