ខេត្តបាត់ដំបង៖ បន្ទាប់ពីឈប់សំរាកជាច្រើនខែ នគរបាលចរាចរណ៍ផ្លូវគោក ខេត្តបាត់ដំបង បានដាក់ប៉ុស្តិ៍គោលដៅ ត្រួតពិនិត្យយានយន្តគ្រប់ប្រភេទ ដែលខុសបច្ចេកទេស ដឹកសំពីងសំពោង ដើម្បីរក្សាសណ្តាប់ធ្នាប់ និងកុំឲ្យមានគ្រោះថ្នាក់ដល់អាយុជីវិតអ្នកដំណើរ កាលពីម៉ោង ៨ព្រឹកថ្ងៃទី១៧ ខែកុម្ភៈ ឆ្នាំ២០១៤ ចំណុចរង្វង់មូលព្រាបស ក្នុងភូមិច្រាបវាល ឃុំអន្លង់វិល ស្រុកសង្កែ ខេត្តបាត់ដំបង។ Wat-1702 សមត្ថកិច្ចបានឃាត់ រថយន្តកែច្នៃ ១គ្រឿង ដែលខុសបច្ចេកទេស ដឹកសំពីងសំពោង មានម៉ាកកាមរី ស៊េរីឆ្នាំ១៩៨៧ ពណ៌ស ពាក់ស្លាកលេខ៨៧៨ភ ដឹកកាដុងចំនួន៧០០ ស្បៃសំរាប់បាំងរបង
ពណ៌បៃតងចំនួន ២០ដុំ និងធុងស្ពិចត្រូចំនួន ៥០០ធុង។ ឈ្មោះ ឆន វុន ភេទប្រុស អាយុ ៣០ឆ្នាំ រស់នៅភូមិគោកទន្លាប់ ឃុំបន្ទាយនាង ស្រុកមង្គលបូរី ខេត្តបន្ទាយមានជ័យ ជាអ្នកបើកបររថយន្ត បានអោយដឹងថា ពួកខ្លួនមានគ្នា ៣នាក់។
ឈ្មោះ ឆន វុន បានឲ្យដឹងថា សម្ភារៈទាំងនេះ ត្រូវបានចេញពីក្រុងប៉ោយប៉ែត ខេត្តបន្ទាយមានជ័យ ឆ្ពោះទៅស្រុកមោងឬស្សី ខេត្តបាត់ដំបង យកទៅបោះអោយម៉ូយ ពេលធ្វើដំណើរមកដល់ ចំណុចរង្វង់មូលព្រាបស ក៏ត្រូវនគរបាល ចាប់ឃាត់តែម្តង។ មានការបញ្ចាក់ថា របរនេះ បើមិនដឹកលើសទេ គឺមិនគ្រប់សាហ៊ុយ ថ្លៃហូបចុកនិងសាំងឡើយ ហើយការរកស៊ីនេះ មានរយៈពេល ២ឆ្នាំ មកហើយ ដោយដឹកជញ្ជូននៅពេលយប់។
ពាក់ព័ន្ធករណីនេះលោក សាត គឹមសាន្ត នាយនគរបាលចរាចរណ៍ផ្លូវគោក ខេត្តបាត់ដំបង បានអោយដឹងថា រថយន្តកែច្នៃដែល មិនមានឯកសារគ្រប់គ្រាន់ និងដឹកសំពីងសំពោង ត្រូវឃាត់ធ្វើការផាកពិន័យ ហើយអប់រំអោយម្ចាស់ ធ្វើសំបុត្រអាជីវកម្ម និងទៅសុំមន្ទីរសាធារណការ ធ្វើឈៀកទើបអោយ ដំណើរការឡើងវិញបាន ដើម្បីរក្សាសណ្តាប់ធ្នាប់តាមដងផ្លូវ និងកុំឲ្យមានការគ្រោះថ្នាក់ ដល់អាយុជីវិត អ្នកដំណើរ ៕
