ខេត្តប៉ៃលិន ៖ ដោយគ្រាន់តែមន្ត្រីនៃការិយាល័យអប់រំស្រុកសាលាក្រៅម្នាក់ កាន់ផ្នែកបេឡា និងបឋម ត្រួវបានដកហូតចេញពីដំណែង ដោយគ្មានមានមូលហេតុច្បាស់សាស់ ស្រាប់តែលេចនូវរឿងអាស្រូវ ឃុបឃិតគ្នា រវាងមន្ទីរអប់រំយុវជននិងកីឡាខេត្ត ជាមួយនឹងការិយាល័យអប់រំ
ស្រុកសាលាក្រៅ ក្នុងការកឹបកេងប្រាក់គ្រូបង្រៀនបឋម និងគ្រូបង្រៀនអនុវិទ្យាល័យ ព្រមទាំងបំប៉ោងពេលវេលា ដើម្បីបើកប្រាក់បៀវត្សន៍យកទៅចែក គ្នា ។ ប្រភពព័ត៌មានបានបង្ហើបឱ្យដឹងថា ប្រហែលជាជាងមួយខែកន្លងទៅនេះ លោកគ្រូ អ្នកគ្រូមួយចំនួន ត្រួវបានបើកប្រាក់បៀរវត្តន៏ប្រចាំខែ ,ហើយមានគ្រូបង្រៀនខ្លះ ត្រូវបានប្រធានការិយាល័យអប់រំស្រុក លួចបំប៉ោងតួលេខ ដោយមានគ្រូខ្លះបង្រៀនតែមួយពេល ដាក់ទៅដល់២ពេល ដើម្បីកិបកេងយកប្រាក់ខែ ជាប្រចាំ ។
ប្រភពបន្តទៀតថា៖ គ្រូបង្រៀនមួយចំនួន នៅស្រុកសាលាក្រៅ បានឈប់ពីការងារជាយូឆ្នាំមកហើយ ប៉ុន្តែត្រួវបានលោក ដួង ស្នា ប្រធានការិយាល័យអប់រំ ស្រុកសាលាក្រៅ យកឈ្មោះរបស់ពួកគាត់ ជាលេសក្នុងការបើកប្រាក់ខែយកទៅចែកគ្នា និងបក្សពួកដែលស្និតស្នាល ។ ប្រភពដដែលបន្តទៀតថា៖ ឥលូវនេះប្រាក់បង្វែរបៀរវត្សន៍ប្រចាំខែ ខាងមន្ទីរទំលាក់ទៅឱ្យខាងការិល័យអប់រំស្រុក ដើម្បីបើកប្រាក់ខែជួនដល់មន្ត្រី តែត្រូវបង្វែរប្រាក់នេះជូនទៅឱ្យមន្ទីរអប់រំវិញ ។ចំណែកការបើកប្រាក់របៀបនេះ ពុំមែនបើកតែមួយឆ្នាំនោះទេ គឺបើកតាំងពីលោកប្រធានការិយាល័យអប់រំស្រុក មកកាន់ទីនេះជាយូឆ្នាំមកហើយ ។
ការបើកថវិកាម្តងៗ លោកប្រធានការិយាល័យអប់រំស្រុក តែងតែកាត់ពីនាយកសាលា និងបុគ្គលិកទាំងអស់ ហើយបុគ្គលិកដែលបង្រៀន២ពេល ផ្សេងទៀត ត្រួវកាត់ម្នាក់៣ម៉ឺនរៀល ,ថវិកា PB មួយសាលា កាត់៥ម៉ឺនរៀល , ចំណែកថវិកាថ្ងៃព្រហស្បត៏ថ្នាក់បំប៉ោងតាមសាលា មួយៗកាត់១ម៉ឺន៥ពាន់រៀល ។ លោក អ៊ឹម រតនៈ ជាមន្ត្រីកាន់ផ្នែកបេឡា និងបឋម នៅការិយាល័យអប់រំស្រុកសាលាក្រៅ ដែលត្រូវគេដកពីតំណែង បានរៀបរាប់ឱ្យដឹងថា៖នៅល្ងាចថ្ងៃទី៦ ខែឧសភា ២០១៤ ប្រធានការិយាល័យអប់រំស្រុកលោក ដួង ស្នា បានមកដកកូនសោទូដែកពីលោក ហើយប្រាប់លោកថា ការដកកូនសោទូដែកនេះជាបណ្តោះអាសន្ននោះទេ ។
លុះដល់ថ្ងៃទី៧ ខែឧសភា មន្ត្រីធ្វើការនៅ មន្ទីរអប់រំចំនួន៤នាក់ បានចុះមកការិយាល័យអប់រំស្រុក ដោយមានលោក ជួប សម្បត្តិ ជា អនុប្រធានមន្ទីរអប់រំ លោក គង់ ស៊ីយ៉ាន ប្រធានការិយាល័យគណនេយ្យមន្ទីរអប់រំ លោក ទ្រឿង រដ្ឋវាសនា ជាបេឡានៃមន្ទីរអប់រំខេត្ត បានមករាប់សាច់ប្រាក់នៅក្នុងទូដែកនោះ ។ ប្រភពបន្តថា៖ ក្រោយមកលោកពិន តារ៉ា ជាអនុប្រធានការិយាល័យបុគ្គលិកនៃមន្ទីរអប់រំខេត្តប៉ៃលិន បានមកសួរនាំគាត់ ពីរឿងលោក ឆយ សុជាតិ នាយកអនុវិទ្យាល័យផ្សារព្រំ ដែលបើកប្រាក់បៀរវត្សន៍ជំនួសបុគ្គលិក ។
ស្រប ពេលនោះដែរលោកអនុប្រធានការិយាល័យបុគ្គលិក បានប្រើពាក្យសំដីមិនសមរម្យ ដោយ ឱ្យរូបគាត់និយាយរឿងរ៉ាវទាំងអស់ដែលកើតមាននៅក្នុងការិយាល័យអប់រំស្រុកឲ្យស្តាប់ បើសិនជាគាត់មិនព្រមនិយាយប្រាប់ទេ មិនអាចជួយបានទេ ដោយភ័យខ្លាចក្នុងការគំរាមរូបគាត់ក៏រៀបរាប់ប្រាប់ថា ប្រធានការិយាល័យអប់រំស្រុក ឱ្យបើកប្រាក់បៀរវត្សន៍ជំនួស គឺបើកជារៀងរាល់ឆ្នាំ ។ ចំពោះការបើកថវិកាគ្រូបង្រៀនពីរពេលរួចរាល់ហើយ លោកក៏ប្រាប់ពីរឿងឱ្យចែកថវិការវាងប្រធានការិយាល័យ និងនាយកសាលាផ្សារព្រំ ជារៀងរាល់ឆ្នាំ មិនមែនទើបតែឆ្នាំនេះទេ ។ ពាក់ព័ន្ធករណីខាងលើ លោកដួង ស្នា ប្រធានការិយាល័យអប់រំស្រុកសាលាក្រៅ បានឲ្យដឹងថា៖ ចំពោះរឿង ការកាត់ប្រាក់គ្រូបង្រៀន ,បំប៉ោងតួលេខ ,កាត់ប្រាក់PB តាមសាលា លោកមិនដឹងនោះទេ ។
ដោយឡែក លោក តង់ ធារ៉ា ប្រធានមន្ទីរអប់រំ យុវជន និងកីឡាខេត្តប៉ៃលិន មានប្រសាសន៏ឲ្យដឹងថា៖ តាមពិតគ្រូបង្រៀននៅស្រុកសាលាក្រៅ មិនមានគ្រូណា បានឈប់យូរទេ តែបើឈប់យូរ ខាងមន្ទីរនិងហៅមកនែនាំ ហើយបើឈប់២ទៅ៣ខែ ខាងមន្ទីរនិងបង្វិលថវិកានេះ ចូលថវិការដ្ឋវិញ ។ លោកប្រធានមន្ទីរបន្តថា៖ ចំពោះការលប់ឈ្មោះពួកគាត់នេះ ដោយសារវាអសកម្មក្នុងការងារ ណាមួយ ជួនកាលគាត់ទៅប្រទេសថៃមិនបានបម្រើការងារ ប៉ុន្តែមុននិងលប់ ខាងមន្ទីរខិតខំស្វែងរកគាត់ ឲ្យអស់លទ្ធភាព ប្រសិនរកមិនឃើញ ខាងមន្ទីរនិងស្នើរសុំទៅថ្នាក់លើ ដើម្បីលប់ឈ្មោះតែម្តង ។
ក្នុងករណីគ្រូឈប់ ហេតុអ្វីបានបើកប្រាក់ខែ នេះដោយសារតែខាងមន្ទីរកំពុងស្វែងរក មានគ្រូខ្លះទៅតាមប្តី នៅឆ្ងាយផងដែរ ។ សូមបញ្ជាក់ថា៖ យោងតាមច្បាប់ ស្តីពីសហលក្ខន្តិកៈមន្ត្រីរាជការស៊ីវិល នៃព្រះរាជាណាចក្រកម្ពុជា បានចែងថា៖ ការតែងតាំង ការដំឡើងថ្នាក់ ការផ្លាសប្តូរ ការដាក់ក្រៅដំណែង ឫការដាក់ឲ្យនៅក្រៅក្របខ័ណ្ឌ ត្រួវសម្រេចដោយព្រះរាជក្រិត្យ អនុក្រិត្យ ឫប្រកាស។
ការបញ្ឈប់លែងឲ្យធ្វើការដោយបង្ខំ ការដាក់ឲ្យចូលនិវត្តន៏មុនកំណត់ និងការហូតងារនៃអ្នករាជការក្របខ័ណ្ឌ ត្រួវសម្រេចដោយព្រះរាជក្រិត្យ អនុក្រិត្យ ឫប្រកាស ស្របតាមលក្ខន្តិកៈដោយឡែកនៃអ្នករាជការនេះ (មាត្រា៥) ។ ចំពោះមាត្រា៧ និយាយថា អ្នករាជការក្របខ័ណ្ឌអាចដាក់ឲ្យទៅ បំរើការ ឫបំពេញមុខងារក្រៅពីក្របខ័ណ្ឌ ដើមរបស់ខ្លួនបាន ក្នុងករណីចំបាច់ និងមានការយល់ព្រមពីសាម៉ីខ្លួន ។ អ្នករាជការក្របខ័ណ្ឌ មានសិទ្ធិសុំផ្លាសកន្លែងធ្វើការទៅតាមប្តី ឫប្រពន្ធបាន ៕
