ខេត្តកំពង់ឆ្នាំង: ចំណុចព្រៃធំ ជាព្រៃលិចទឹកនៅចំណុចហាមច្បាប់ឃាត់ ស្ថិតនៅក្នុងឃុំ ពាម ឆ្កោក ស្រុក ជលគីរី ខេត្តកំពង់ឆ្នាំង ត្រូវបានគ្រឿងចក្រសំរុកចូលឈូកឆាយ រួចជាស្ថាពរ ប្រមាណ៣ហិតាហើយកាលពីបំណាច់ខែមិថុនាឆ្នាំ២០១៤កន្លងមកថ្មីៗនេះ ហើយបច្ចុប្បន្ននេះ
ជន ដែលរំលោភទន្ទ្រានដីព្រៃលិចទឹកនៅចំណុចហាមឃាត់បាននិងកំពុងនាំក្រុមគ្រួសារទៅកាប់ទន្ទ្រាន បន្តទៀត ជាប្រយោជន៍ពង្រីងនិងកាន់កាប់ដីព្រៃនេះ ជាកម្មសិទ្ធ។
លោកទិត្យ អឿន ជាប្រជាពលរដ្ឋនៅភូមិពាមឆ្កោក ឃុំពាមឆ្កោកបានប្រាប់កម្ពុជាថ្មីថា កាលពីថ្ងៃទី២៥ ខែមិថុនា ឆ្នាំ២០១៤ លោកបានទទួលដំណឹងថាមានគ្រឿងចក្រចូលមកឈូកឆាយ ដីព្រៃធំ ជាចំណុចច្បាប់ហាមឃាត់ ប៉ុន្តែ លោកមិនបានទៅមើលនោះទេ ក្រោយមកនៅថ្ងៃទី៣០ ខែដដែលលោកបានទៅមើលឃើញព្រៃធំនៅចំណុចច្បាប់ហាមឃាត់នោះ ត្រូវបានគេឈូកឆាយ រួចស៊ើមៗប្រមាណជា៣ហិតា ដោយដើមឈើដែលគរទុកនោះនៅស្រស់ៗនៅឡើយ ហើយក៏មាន មនុស្ស៥នាក់កំពុងកាប់ទន្ទ្រានដីព្រៃនោះបន្តទៀត។ ចំពោះជនដែលកំពុងកាប់ព្រៃនេះ បានឆ្លើយ ដោយអារម្មណ៍ទើសទាល់ថាពួកគាត់ជាឈ្នួលរបស់គេតែប៉ុណ្ណោះ។
លោកទិត្យអឿនបានបន្តឲ្យដឹងថា ទោះជាយ៉ាងនេះក្ដី ក៏ប្រជាកសិករនៅក្បរបាននិយាយឲ្យ ដឹងថាកាលពី៤-៥ថ្ងៃមុនមានគ្រឿងចក្រ ចូលមកឈូកឆាយនៅដីព្រៃហាមឃាត់នេះ ហើយកន្លែង នេះជាព្រៃសុទ្ធសាធសំរាប់ត្រីពងកូនតែម្ដង។ លោក សេង ប៊ុនឈឿន នាយខណ្ឌរដ្ឋបាលកំពង់ឆ្នាំង បានប្រាប់កម្ពុជាថា ថ្មីលោកមិនដឹង រឿង នេះទេ រង់ចាំលោកឲ្យខាងសង្កាត់ទៅមើល។ ព័ត៌មានចុងក្រោយនៅថ្ងៃទី៣នេះ លោកសុង សារឿន នាយខណ្ឌរដ្ឋបាលជលផល សង្កាត់ ជលគីរីបានប្រាប់កម្ពុជាថ្មីតាមទូរស័ព្ទថា លោកទៅត្រួតពិនិត្យតាមបញ្ជារបស់ លោកនាយខណ្ឌរួច ហើយគឺមានការឈូកឆាយដីព្រៃធំនៅតំបន់ច្បាប់ហាមឃាត់មែនប៉ុន្តែមានទំហំប្រមាណ១.៨០ហិតា តែប៉ុណ្ណោះ ចំពោះដីព្រៃសុទ្ធ។
ចំពោះសំណួរកម្ពុជាថ្មីសួរថា តើមានវិធានដូចម្ដេច បើមានដូច្នេះ លោកសុង សារឿន ហាក់ ពុំហាក់មានចម្លើយច្បាស់លាស់នោះទេ គ្រាន់តែតបថា ដីព្រៃនេះពុំមែននៅជាតំបន់នោះទេ ប៉ុន្តែវា ជាដីដែលច្បាប់ហាមឃាត់ ស្ថិតនៅព្រុំប្រទល់តំបន់៣និងតំបន់២ ។ គួរបញ្ចាក់ថានៅស្រុកជលគីរី ដែលជាស្រុកមានប្រជាពលរដ្ឋ៥ឃុំ រស់នៅតាមដងទន្លេសាប នោះ បាននិងកំពុងគ្រឿងចក្រ សំរុកចូលធ្វើសកម្មភាពប្រមាណជាង២០គ្រឿង ក្រោមរូបភាព មាន ច្បាប់អនុញ្ញាតិពុំគ្រប់គ្រាន់របស់អាជ្ញាធរស្រុកជលគីរី ដែលធ្វើឲ្យសមត្ថកិច្ចរដ្ឋបាលជលជាសមត្ថ កិច្ចជំនាញក្នុងរឿងនេះល្វីងមុខ។
ចំណែកគ្រឿងចក្រទាំងនេះ មានគ្រឿងចក្រ ប្រភេទត្រាក់ទ័ររុញពី មុខនិងនង្គ័លភ្ជួរពីក្រោយ មានប្រមាណ១០គ្រឿង ជារបស់កសិករផ្ទាល់និងជួលគេមកពីខាងក្រៅ ចំណែកត្រាក់ទ័រ ប្រភេទ អាប៊ុល គឺមានជាង១០ គ្រឿង គឺជួលគេមកពីខាងក្រៅ ទាំងអស់។ ដោយសារឆ្នាំនេះ លោកអភិបាលខេត្តឡើងថ្មី ដោយទំនងស្លុងអារម្មណ៍នឹងការបញ្ចូល សម្លេងរបស់អាជ្ញាធរស្រុក ជលគីរី ក៏បន្ធូរដៃឲ្យចុះហត្ថលេខាត្រឹមស្រុក។ ទីផុតការឈូកដីមាត់បឹង មាត់ព្រែកនិងទន្លេចាប់ផ្ដើមគគ្រឹក ក្រោមរូបភាពឈូកដីស្រែចំការ និងបែរក្បាលឈូកចួលដីព្រៃ តំ បន់ហាមឃាត់តែម្ដង គឺ
មួយពព្រិចភ្នែក អង្ករក្លាយជាបាយ ដីព្រៃក្លាយជាដីស្រែចំការ ចំណែកសម ត្ថកិច្ចអាជ្ញាធរប្រើក្បាច់ កន្ទេលធំប្រលំដេក លូកដៃយកលុយសម្ងុំស្ងៀម។ឯសមត្ថកិច្ចរដ្ឋបាល ជលផលរត់បាតជើងស ព្រាតដើម្បីទប់ស្ដាត់។អង្គហេតុខាងលើនេះ សូមលោក ឈួរ ចាន់ឌឿន អភិបាលខេត្តកំពង់ឆ្នាំងមេត្តាជ្រាប វាជាដំណឹងរបស់ប្រជាពលរដ្ឋ ហើយជាលទ្ធផលជាក់ស្ដែងការ អស់ជំនឿរបស់ប្រជាពលរដ្ឋគឺបានសំដែងចេញឲ្យដឹងកន្លងមករួចហើយ៕
