ភ្នំពេញ ៖ ស្ត្រី៣នាក់ដែលត្រូវបានតុលាការថ្នាក់ក្រោមផ្តន្ទាទោសក្នុងម្នាក់ៗ៧ឆ្នាំ ពីបទលក់ព្រហ្មចារីយកុមារីពីរនាក់ទៅឲ្យបុរសជនជាតិចិនម្នាក់តែមិនទាន់បាន សម្រេច ខណៈត្រូវសមត្ថកិច្ចបង្ក្រាបទាន់ពេលវេលា នោះ ត្រូវបានតុលាការកំពូល កាលពីថ្ងៃទី១៩ ខែកុម្ភះ ឆ្នាំ២០១៤ បង្វិលសំណុំរឿងទៅសាលាឧទ្ឋរណ៍ ដើម្បីធ្វើការជំនុំជម្រះសារជាថ្មី ។
ស្ត្រីជាប់ចោទទាំងនេះឈ្មោះ អេង ផាត អាយុ៤៥ឆ្នាំ ឈ្មោះ ចែម ពៅ អាយុ៥៤ឆ្នាំ និងឈ្មោះ ហុង ធី អាយុ៤៧ឆ្នាំ ត្រូវបានសាលាដំបូងរាជធានីភ្នំពេញ និង សាលាឧទ្ឋរណ៍ ផ្តន្ទាទោសដាក់ពន្ឋនាគារក្នុងម្នាក់ៗ៧ឆ្នាំ និង ពិន័យ៤លានរៀលចូលថវិកា រដ្ឋ ប្រព្រឹត្តកាលពីថ្ងៃទី២៥ ខែកុម្ភះ ឆ្នាំ២០១០ មុខសណ្ឋាគារឡាក់គីស្តារ ម្តុំផ្សារដើមគ ។ ប៉ុន្តែការសម្រេចនេះ ត្រូវបានជនជាប់ចោទទាំងអស់ប្តឹងសាទុក្ខមកតុលាការកំពូល ។
តាមដំណើរឿងក្តីនេះគឺ ស្ត្រីជាប់ចោទទាំង៣នាក់បាននាំក្មេងស្រីមិនទាន់គ្រប់អាយុ ពីរនាក់ ទៅពេទ្យឯកជនមួយ ដើម្បីពិនិត្យឈាមនិង ពិនិត្យមើលព្រហ្មចារីយ រួចក៏បានណាត់ជួបបុរសជនជាតិចិនម្នាក់នៅក្នុងហាងកាហ្វេ បម្រុងយកទៅរួមភេទ ក៏ត្រូវ សមត្ថកិច្ចឃាត់ខ្លួនជនសង្ស័យជាក់ស្តែងតែម្តង ។
ដោយឡែកក្នុងសវនាការតុលាការកំពូល ស្ត្រីជាប់ចោទទាំង៣នាក់បានបដិសេធដូច គ្នា ថា ពួកគេពុំបាននាំក្មេងស្រីទៅរួមភេទជាមួយជនជាតិចិននោះទេ រាល់ចម្លើយនៅកន្លែង ប៉ូលិសសុទ្ឋតែការជាបបង្ខិតបង្ខំទាំងអស់ ។ ពួកគេទាំង៣នាក់ បានសូមឲ្យតុលាការរក យុត្តិធម៌ ៕ 
