សៀមរាប ៖ នារសៀលថ្ងៃទី ២៤ ខែកក្តដា ឆ្នាំ២០១៤ នេះ ឯ.ឧ នាយឧត្តមសេនីយ៍ ចាន់ អ៊ាន អគ្គស្នងការរងនគរបាលជាតិ និងជាប្រធាននាយកដ្ឋានបុគ្គលិកតំណាងដ៏ខ្ពង់ខ្ពស់ឯ.ឧ នាយឧត្តមសេនីយ៍ នេត សាវឿន អគ្គស្នងការនគរបាលជាតិ និងលោកជំទាវ ឯម ផល្លាមុនី
អភិបាលរង នៃគណៈអភិបាលខេត្តសៀមរាប បានអញ្ជើញជាអធិបតីក្នុង ពិធីប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្តរសក្ដិ ដល់នគរបាលជាតិ នៃស្នងការដ្ឋាននគរបាលខេត្តសៀមរាប ដោយពិធីនេះប្រព្រឹត្តទៅនៅស្នងការដ្ឋាននគរបាលខេត្តសៀមរាប ដោយមានការអញ្ជើញចូលរួមពីសំណាក់ ឯ.ឩ អស់លោក លោកស្រី ជាថ្នាក់ដឹកនាំក្នុងជួរកងកម្លាំងប្រដាប់អាវុធនិងតំណាងមន្ទីរអង្គភាព ស្ថាប័ននានាមួយចំនួនជុំវិញខេត្តព្រមទាំងប្រតិភូអមគណះអធិបតីបានអញ្ជើញចូលរួមព្រមទាំងនគរបាលមកពីបណ្ដាក្រុង/ស្រុកទាំង១២ ក្នុងខេត្តសៀមរាប ជាច្រើនរូបផងដែរ ។ 
យោងតាមរបាយការណ៍របស់លោកឧត្តមសេនីយ៍ទោ សត ណាឌី ស្នងការនគរបាលខេត្តសៀមរាប បានឲ្យដឹងថា នគរបាលជាតិ នៃស្នងការដ្ឋាននគរបាលខេត្តសៀមរាប ដែលត្រូវបានប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្តរសក្ដិ មានចំនួន៦២នាក់ក្នុងនោះមានថ្នាក់ វរសេនីយ៍ទោ ចំនួន ២៥ នាក់ វរសេនីយ៍ត្រី ចំនួន ៣៤ នាក់ អនុសេនីយ៍ឯក ១ នាក់ និងប្រកាសផ្ទេរភារះកិច្ច តែងតាំងមុខតំណែងចំនួន ៣ នាក់ ក្នុងនោះមានប្រកាសលោកស្នងការរងបន្ថែមថ្មី ១ រូបទៀតឲ្យទទួលបន្ទុកអត្តសញ្ញាណកម្ម នៃស្នងការដ្ឋាននគរបាលខេត្តសៀមរាប ។លោកជំទាវ ឯម ផល្លាមុនី អភិបាលរង នៃគណៈអភិបាលខេត្តសៀមរាប ព្រមទាំងឯ.ឧ នាយឧត្តមសេនីយ៍ ចាន់ អ៊ានអគ្គស្នងការរងនគរបាល
ជាតិ និងជាប្រធាននាយកដ្ឋានបុគ្គលិកតំណាងដ៏ខ្ពង់ខ្ពស់ឯ.ឧ នាយឧត្តមសេនីយ៍ នេត សាវឿន អគ្គស្នងការនគរបាលជាតិបានមានប្រសាសន៍សំណេះសំណាលនិងធ្វើការផ្តាំផ្ញើដល់កងកម្លាំងនាឱកាសនោះដោយបានធ្វើការកោតសរសើរចំពោះកិច្ចខិតខំប្រឹងប្រែងរបស់កងកម្លាំងនគរបាលខេត្តសៀមរាបលើការបំពេញនូវតួនាទីភារះកិច្ចស្នូលរបស់បានយ៉ាងល្អប្រសើរ ។
ដោយគណះអធិបតីទាំងពីរក៏បានដាស់តើនក្រើនរំលឹកក៏ដូចជាផ្តល់ជូននូវបទពិសោធន៍ល្អៗបន្ថែមទៀតដល់អស់លោក លោកស្រី ដែលទើបនិងបានប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្តរសក្ដិថ្មីពិសេសគឺស្នងការរងទទួលបន្ទុកអត្តសញ្ញាណកម្មត្រូវធ្វើយ៉ាងណាចេះរក្សាឲ្យបាននូវសាមគ្គីភាពផ្ទៃក្នុងឲ្យបានល្អ ត្រូវមានក្រមសិលធម៍ និង វិជ្ជាជីវ: រក្សាឲ្យបានជាខាតគោរពនិងអនុវត្តតាមបទបញ្ជាជាកងកម្លាំងនគរបាលជាតិដោយមិនគិតផលប្រយោជន៍ផ្ទាល់ខ្លួនជាធំ ។លោកជំទាវ ឯម ផល្លាមុនី និង ឯ.ឧ នាយឧត្តមសេនីយ៍ ចាន់ អ៊ាន បានបន្តប្រសាសន៍ផ្ដាំផ្ញើដល់កងកម្លាំងទាំងអស់ធ្វើយ៉ាងណាពង្រឹងបន្ថែមនូវការងារភូមិឃុំមានសុវត្ថិភាពនៅតាមមូលដ្ឋានរបស់ខ្លួនឲ្យបានម៉ឺងម៉ាត់ ដើម្បីរក្សាឲ្យបាននូវសន្តិសុខ សុវត្ថិភាព ជូនបងប្អូនប្រជាពលរដ្ឋ ក៏ដូចជាភ្ញៀវជាតិ អនុ្តរជាតិដែលបានមកបំពេញទស្សនកិច្ច នៅក្នុងខេត្តសៀមរាបនេះឲ្យកាន់តែមានតម្លាភាព ៕ ដោយ លោក ខេង ខេមរា
