ភ្នំពេញ ៖ ជនសង្ស័យពាក់ព័ន្ធករណីប្លន់៤នាក់និងស្ត្រីម្ចាស់ហាងម្នាក់ដែល សមត្ថកិច្ចចម្រុះបាន ចុះឡោមព័ទ្ធបង្ក្រាបកាលពីវេលាម៉ោង១និង៣៥នាទីរសៀលថ្ងៃទី២២ កុម្ភៈ ២០១៤ នៅក្នុងហាងកែសម្ផស្សមួយកន្លែង យីហោ "សៀង ម៉ី មេកអាប់ កាត់សក់បុរសនារី " ផ្ទះលេខ១១៧Bផ្លូវ១៩៨៦ សង្កាត់ភ្នំពេញថ្មី ខណ្ឌសែនសុខ រហូតមកដល់ពេលនេះបានដោះលែង៣នាក់ ហើយទុក២នាក់បញ្ជូនទៅតុលាការ។ មន្ត្រីប៉ូលិសព្រហ្មទ័ណ្ឌមួយរូបបង្ហើបឲ្យដឹងថា ការដោះលែងជនសង្ស័យ៣នាក់ដោយស្ងាត់ៗនោះ ដោយសមត្ថកិច្ចស្រាវជ្រាវទៅឃើញថាគឺពុំមានការពាក់ព័ន្ធនឹងករណីប្លន់ខាងលើនេះឡើយ។ ក្នុងនោះគឺមានតែជនសង្ស័យ២នាក់ប៉ុណ្ណោះដែលជាមុខសញ្ញាធ្វើសកម្មភាពប្លន់។
. ប៉ុន្តែមន្ត្រីរូបនេះពុំបានបញ្ជាក់ឈ្មោះអ្នកដែលត្រូវបានដោះលែងនោះឡើយ តែគេជឿថា ស្ត្រីម្ចាស់ហាងអាចនឹងត្រូវដោះលែង ។ គួររំលឹកថា ជនសង្ស័យដែលត្រូវសមត្ថកិច្ចឃាត់ខ្លួន ទី១-ឈ្មោះ អ៊ាន ស៊ីតា ភេទប្រុស អាយុ៣១ឆ្នាំ ,ទី២-ឈ្មោះ ងិន សេងហ៊ុត ភេទប្រុស អាយុ២៥ឆ្នាំទី៣-ឈ្មោះ អ៊ាង វាសនា ភេទប្រុសអាយុ២៥ឆ្នាំ ជាប្អូនប្រុសម្ចាស់ហាង ទី៤-ឱក ឆាយឌី ភេទប្រុសអាយុ២៥ឆ្នាំ និង ម្ចាស់ហាងឈ្មោះ អ៊ាង សៀងម៉ី ភេទស្រីអាយុ២៦ឆ្នាំ មុខរបរអ៊ុតសក់ ។
ជនរងគ្រោះក្នុងអំពើប្លន់ឈ្មោះ អ៊ាង វិច្ឆិកា បានឱ្យដឹងថា កាលពីយប់ថ្ងៃទី១០ កុម្ភៈ ខ្លួនបានចោរប្លន់ម៉ូតូ នៅម្ដុំផ្លូវរថភ្លើងត្រឡោកបែក ស្រាប់តែឃើញជនសង្ស័យជិះ ម៉ូតូនៅមុខផ្សារសុវណ្ណា ហើយស្គាល់ច្បាស់ថា ជាម៉ូតូរបស់ខ្លួន ក៏ជិះតាមពីក្រោយ រហូតដល់ចំណុចកើតហេតុខាងលើ រួចរាយការណ៍ទៅសមត្ថកិច្ចចុះឡោមព័ទ្ធតែម្តង។
បច្ចុប្បន្ន ជនសង្ស័យ២នាក់កំពុងឃាត់ខ្លួនបណ្តោះអាសន្ននៅការិយាល័យព្រហ្មទណ្ឌកម្រិតស្រាលរាជធានីភ្នំពេញ ហើយគ្រោងនឹងបញ្ជូនទៅតុលាការឆាប់ៗនេះ ដើម្បីចាត់ការតាមច្បាប់ ៕
