កំពង់ធំៈ ក្រោមការយកចិត្តទុកដាក់ របស់ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានជម្រុញឲ្យតាមផ្នែកសឹករងតាមបណ្តាល ស្រុក ក្រុង ចុះសួរសុខទុក្ខដល់ ក្រុមគ្រួសារអតីតយោធិន ដែលបានចូលនិវត្តន៍ជន ដើម្បីផ្តល់នូវគ្រឿងឧបភោគបរិភោគ ក្នុងឳកាសពិធីបុណ្យភ្ជុំបិណ្ទប្រពៃណីខ្មែរ ដើម្បីផ្សារភ្ជាប់នូវចំណងមិត្តភាព រវាងថ្នាក់ដឹកនាំ និងអតីតកងយោធពលខេមរៈភូមិន្ទ។ 
ផ្នែកសឹករងក្រុងស្ទឹងសែន ដឹកនាំដោយលោកវរៈសេនីយ៍ឯក ថៃ សុវណ្ណ បាននាំយកអំណោយចែកជូនលោក ជឿប ហឿន ប្រព្ឋនឈ្មោះ សែម អ៊ុច គ្រួសារអតីតយោធិន ស្ថិតនៅភូមិ ស្រយូវ សង្កាត់ស្រយូវ ក្រុងស្តឹងសែន ខេត្តកំពង់ធំ នៅព្រឹកថ្ងៃទី ១៥ ខែ កញ្ញា ឆ្នាំ ២០១៤ រួមមានមី២កេស ប្រេងឆា១ធុង ប៊ីចេង១ថង់ ទឹកត្រីមួយយួរ សាប៊ូ២ថង់ ស្កស១គ.ក មុងជ្រលក់ថ្នាំ១ ទឹកបរិសុទ្ធ២យួរ ព្រមទាំងថិការ២០ម៉ឺនរៀល ផ្នែកសឹករងស្រុកប្រាសាទបល្ល័ង ដឹកនាំដោយលោកវរៈសេនីយ៍ ប៉ែន ឡន នាំយកគ្រឿងឧបភោគបរិភោគ ជូនដល់គ្រួសារ ឈ្មោះ ហ៊ិច ហ៊ី រស់នៅភូមិ ជន្លូស ឃុំទួលគ្រើល ស្រុកប្រាសាទបល្ល័ង្គ សម្ភារៈមាន ទឹកត្រី ២យួរ ទឹកស៊ីអ៊ីវ២យួរ ខោជើងវែង២ អាវ៦ សារ៉ុង១ ព្រមទាំងថវិការ ៥០ម៉ឺនរៀល។
អង្គភាពវរៈសេនាតូចលេខ២ បានដឹកនាំដោយលោក វរៈសេនីយ៍ត្រី ឡឹង ឡន បាននាំយកអំណោយទៅចែក ជូនដល់គ្រួសារអតីតយោធិន ចំនួន៣គ្រួសារ ស្ថិតនៅភូមិ បុស្សធំ ឃុំ ក្រយា ស្រុកប្រាសាទបល្ល័ង្គ ក្នុង១គ្រួសារទទួលបាន អង្ករ១បេ មី១កេស ក្រម៉ា១ មុងជ្រលក់ថ្នាំ១ ប៊ីចេង១កញ្ចប់ និងថវិការ៥ម៉ឺនរៀល។ 
ដោយមានការចូលរួម ពីសំណាក់លោក វរៈសេនីយ៍ មេបញ្ជាការផ្នែកសឹករង តាមបណ្តាស្រុក ព្រមទាំងមន្ត្រីក្រោមឳវាទ ដោយមានការចង្អុលបង្ហាញពីឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់សឹករងកំពង់ធំ ។ លោកមេបញ្ជាការតំណាងឲ្យអង្គភាពនីមួយៗ បានពាំនាំនូវការសួរសុខទុក្ខ ពី ឯកឧត្តម ឧត្តមសេនីយ៍ត្រី សោម ស៊ុន និងថ្នាក់ដឹកនាំ ដោយការគោរព អាណិតស្រឡាញ់ និងជាការរំលឹកនូវអនុស្សាវរីយ៍ ធ្លាប់កំសត់កម្រ ព្រមទាំងបានតស៊ូ ក្នុង សម័យសង្គ្រាមកន្លងមក ទើបបានផ្តួចផ្តើមឲ្យមានការនាំយកនូវអំណោយ ចែកជូនក្នុងឳកាសបុណ្យភ្ជុំបិណ្ឌ ក៏ដូចជាការបង្ហាញឲ្យឃើញថា ក្រុមគ្រួសារអតីតយោធិន មិនបាននៅឯកកោម្នាក់ឯងនោះទេ ។ 
