បន្ទាយមានជ័យ ះ ឯកឧត្ដមឧបនាយករដ្ឋមន្ត្រី ប៊ិន ឈិន ប្រធានអាជ្ញាធរជាតិដោះស្រាយវិវាទដីធ្លីបានស្នើរដល់មន្ត្រីដែលទទួលការងារដោះស្រាយវិវាទដីធ្លីក្នុងខេត្តបន្ទាយមានជ័យទាំងអស់សូមកុំបីឈរនៅក្រោយជម្លោះ ដែលធ្វើ អោយការដោះស្រាយគ្មានប្រសិទ្ធភាពហើយវាបានក្លាយជាជម្ងឺមហារីកមិនអាចព្យាបាលបាន។ 
ថ្លែងបែបនេះក្នុងវេទិការនៃអង្គប្រជុំត្រួតពិនិត្យការដោះស្រាយវិវាទដីធ្លីក្នុងសាលប្រជុំសាលាខេត្តបន្ទាយមានជ័យនាព្រឹកថ្ងៃ១៧ខែ០៩ឆ្នាំ២០១៤ ដែលមានការចូលរួមពីគ្រប់ប្រធាន អនុប្រធានមន្ទីរជុំវិញក្នុងខេត្តនិងកងកម្លាំងគ្រប់ប្រភេទ។ ឯកឧត្ដម គោ ស៊ុមសារឿត អភិបាលខេត្តបន្ទាយមានជ័យនិងជាប្រធានគណះកម្មការដោះស្រាយវិវាទដីធ្លីថ្នាក់ខេត្តបានលើកឡើងថា បញ្ហាទំនាស់ដីធ្លីនៅក្នុងខេត្តពិតជាបញ្ហាដ៏ស្មុគស្មាញ ពិបាកក្នុងការដោះស្រាយ ហើយវា ក៏បានបន្តភាពស្មុគស្មាញនេះដល់អាជ្ញាធរខេត្តពីមួយអាណត្តិទៅមួយអាណត្តិ ក្នុងនោះលោកក៏បានទទួលបន្ទុកនូវអំរែកនេះដែរ។
ឯកឧត្ដម គោ ស៊ុមសារឿត បានលើកបន្ថែមដោយបញ្ជាក់ថា មានការវិវាទខ្លះបានផ្តើមចេញពីអ្នកមានអំណាច ពីការសម្បទានដីសេដ្ឋកិច្ច តែខ្លះប្រជាពលរដ្ឋក៏ខូចណាស់ដែរដែលដីរបស់ពួកគាត់លក់អស់កាលដីនៅមិនទាន់មានហាងឆេង លុះដល់ដីឡើងថ្លៃក៏វិលចូលទៅកាន់កាប់ជាថ្មីហើយចោទប្រកាន់គេថារំលោភយក ។ឯខ្លះទៀតបានចូលកាន់កាប់ដោយខុសច្បាប់នូវដីព្រៃឈើរបស់រដ្ឋ ។ 
ឯកឧត្ដម ឧបនាយករដ្ឋមន្ត្រី ប៊ិន ឈិន បានថ្លែងថា វិវាទដីធ្លីវាបានកើតមានគ្រប់ខេត្តក្រុង ការដោះ ស្រាយ ក៏បាននិងកំពុងបន្តដោះបានបន្តបន្ទាប់ ហើយខ្លះក៏មិនអាចដោះបានដោយគូរវិវាទមិនបានសម្របខ្លួនអោយមន្ត្រីជំនាញធ្វើការដោះស្រាយ ឬមិនទទួលយកលទ្ធផលនៃការដោះស្រាយរបស់ក្រុមគណះកម្មការ។ ឯកឧត្ដមបញ្ជាក់ពីការដោះស្រាយថា ការដោះស្រាយ
មិនអាចមានប្រសិទ្ធិភាពទេ ប្រសិនជាគណះកម្មការខ្លះទទួលយកប្រយោជន៍និងឈរនៅពីក្រោយនៃការវិវាទនេះ ក្នុងនោះឯកឧត្ដម បានជំរុញអោយមន្ត្រីជំនាញពាក់ពន្ធ័សូមអោយពិនិត្យឡើងវិញដល់ព្រៃសម្បទានចំនួនបីដែលកំពុងតែមានបញ្ហា និងប្រមានដកហូតដីសម្បទានសេដ្ឋកិច្ចពីក្រុមហ៊ុន ប្រសិនបើក្រុមហ៊ុនទុកអោយដីទំនេរមិនមានការដាំដុះឬ អភិវឌ្ឍន៍៕ ដោយ: ឃិន គន្ធា
